Փաստ ինֆո

Հանրապետության նախագահ Արմեն Սարգսյանը բացառիկ հարցազրույց է տվել ռուսաստանյան РБК հեռուստաալիքի գլխավոր տնօրեն Իլյա Դորոնովին։ ՀՀ նախագահը հայտնել է, որ ինքը և Ադրբեջանի նախագահը միմյանց նամակ գրելու խողովակներ չունեն, սակայն ՀՀ նախագահի խնդրանքն ու առաջարկը շարունակում է մնալ նույնը՝ «վերադարձրեք տղաներին տուն»: Արմեն Սարգսյանը նշեց, որ տղաների վերադարձի հարցում դիմել է հնարավոր բոլոր ատյաններ:

Արմեն Սարգսյանը հայտնել է, որ ՀՀ-ի առջև դրված հիմնական խնդիրներից են ռազմագերիների վերադարձը, անհետ կորածների ճակատագիրը: Խաղաղություն այնտեղ, որտեղ խաղաղություն չկա՝ սահմանին, հայ-ադրբեջանական զինված ուժերի շփման գծում: Որպեսզի խաղաղություն լինի, հրադադարը պահպանվի:

«Եվս մեկ անգամ երախտագիտություն եմ եմ հայտնում Վլադիմիր Պուտինի և Ռուսաստանի ջանքերի համար, որ հրադադարը հնարավոր եղավ: Հրադադարները կարևոր են՝ ինչպես 1994 թվականին, այնպես էլ հիմա»։

Անդրադառնալով ներհասյաստանյան խնդիրներին՝ ՀՀ նախագահը հայտնել է, որ մեր հասարակությունն ամեն օր ապրում է խնդիրներով, որոնք կապված են սահմանի, ռազմագերիների հարցերի հետ: Սրանք հասարակությանը շարունակում են լարվածության մեջ պահել: Նախագահի մոտեցումն է՝ այսօրվա հարցերը լուծելու համար հարկավոր է աշխատել ապագայի համար:

«Որպեսզի լուծենք այսօրվա խնդիրները, պետք է ելնել ապագայից, նայել դեպի ապագան, աշխատել ապագայի համար: Կարևորն ապագան կառուցելն է, իսկ այդ ապագան Հայաստանում կապված է տարբեր բաների հետ: Բնականաբար, կապված է տնտեսության հետ: Պետք է կառուցել նոր տեխնոլոգիաների վրա հիմնված տնտեսություն՝ արհեստական բանականությունից սկսած մինչև կենսատեխնոլոգիաներ, նոր գյուղատնտեսություն, նոր սննդային ոլորտ, նոր առողջապահական համակարգ: Մենք արդեն 21-րդ դարում ենք: Եթե ապրենք այնպես, ինչպես նախորդ դարում էր, Հայաստանը կդառնա գնացքի վերջին վագոնը»։

Սարգսյանը կարևորում է, որ պետության կառուցվածքը՝ սկսած Սահմանադրությունից, ժամանակակից լինի: Շատ կարևոր է որոշումների ընդունման մեխանիզմը:

«Ուստի ես ասում եմ, որ պետք է փոխել Սահմանադրությունը: Մեր խնդիրները չեն սկսվել կամ ավարտվել պատերազմով, դրանք առջևում են, ուստի հարկավոր են մեխանիզմներ, որպեսզի պատասխանատվություն կրող անձինք ընդունեն արդյունավետ որոշումներ, որոնք կյանքի կկոչվեն: Եթե կառավարման համակարգն արդյունավետ չէ, ցանկացած որոշում, որը ճշմարիտ կթվա, այդպես էլ կմնա թղթի վրա: Ուստի պետք է փոխել Սահմանադրությունը»։

Նա խոսել է «Մտքերի հայկական գագաթնաժողով» անցկացնելու որոշման մասին, որն արդեն զուտ «հայկական պատմություն» է դարձել։ Նախագահը կարծում է, որ նման համաժողովները (ռուսական Վալդայի պես) աշխարհի գլխավոր խնդիրների մասին խոսելու հնարավորություն են տալիս պետական գործիչներին: Սարգսյանի խոսքով` աշխարհն այլևս դասական չէ, մենք վերադառնում ենք վերածննդի ժամանակաշրջան, երբ կարող են ծնվել նոր Լեոնարդո Դա Վինչիներ, ովքեր կարող են և՛ նկարել, և՛ լինել հանճարեղ ինժեներներ:

Աղբյուր` Փաստինֆո