Փաստ ինֆո

Դավթաշեն վարչական շրջանում բազմաբնակարան շենքի կառուցապատումն արդեն 1.5 տարի է կիսատ է մնացել, իսկ բնակարան ձեռքբերելու համար 1 մլն 700 հազար դրամ գումար վճարած շուրջ 90 ընտանիք՝ մնացել առանց բնակարան։

Կառավարության շենքի դիմաց հավաքված քաղաքացիներից մեկը՝ Կորյուն Մխիթարյանը, «Փաստինֆո»-ին պատմեց, որ հարցը բազմիցս բարձրաձայվել է, քրեական գործ կա հարուցված, սակայն խնդիրը որևէ կերպ դեռևս չի լուծվել, այս իրավիճակը կարող է տարիներ տևել։ Վարույթ կա նաև Սնանկության դատարանում, սակայն, եթե կառուցապատողը սնանկ ճանաչվի՝ 90 ընտանիք մնալու է դրսում։

Բազմաբնակարան շենքի կառուցումը դադարել է՝ կառուցապատողի սնանկացման պատճառով, մասնավորապես, մոտ 4-5 մլն դոլարի պարտք են ունեցել, հարկը զրոյացվել է, սակայն, մեր զրուցակիցը տեղեկացրեց, որ, թեև կառուցապատողն այժմ գտնվում է հետախուզման մեջ, Ղազախստանում շարունակում է զբաղվել շենքերի կառուցապատմամբ։

Հարցին՝ արդյո՞ք քրեական գործի շրջանակներում իրենք տուժող ճանաչվել են՝ մեր զրուցակիցները հայտնեցին, որ առ այս պահը դեռևս որպես տուժող չեն ճանաչվել, թեև՝ փաստացի բոլորը տուժող են։

«Մեզ մինչև հիմա տուժող չեն ճանաչել։ Հարցաքննություն եղել է։ Բնակիչներով դիմում ենք ներկայացրել, մի մասին՝ հրավիրել են հարցաքննության, բայց մինչև հիմա մեր կարգավիճակը դեռ հայտնի չէ»,- հայտնեց ակցիայի մասնակիցներից մեկը։

Աղբյուր` Փաստինֆո