Փաստ ինֆո

ՀՀ նախկին զինդատախազ Գագիկ Ջհանգիրյանը, որն այսօր ժամանակավորապես զբաղեցնում է ԲԴԽ նախագահի պաշտոնը, դեմ է եղել «Հոկտեմբերի 27»-ի գործից մաս անջատելուն։

Հիշեցնենք, որ «Հոկտեմբերի 27»-ի վերաբերյալ քրեական գործից մաս անջատելու մասին որոշում կայացվել է 2000թ հուլիսի 11-ին՝ հանցագործության հնարավոր կազմակերպիչների, մասնակիցների, օժանդակողների հայտնաբերման համար։ Անջատված մասի նախաքննության ժամկետը երկարացվել է 25 անգամ, սակայն բացի դատապարտված անձանցից, հանցագործության այլ մասնակիցներ, կացմակերպիչներ, կատարողներ, դրդիչներ և օժանդակողներ չեն հայտնաբերվել, ուստի 2004թ. նոյեմբերի 11-ին կայացված պատճառաբանված որոշմամբ անջատված մասով քրեական գործի վարույթը կարճվել է։

Ընդ որում՝ մայր քրեական գործով նախաքննությունն իրականացվել է հենց Գագիկ Ջհանգիրյանի հսկողության ներքո՝ զինդատախազությունում, իսկ Գ.Ջհանգիրյանը զբաղեցնում էր զինդատախազի պաշտոնը։ Գլխավոր դատախազն էր Բորիս Նազարյանն էր, որն այդ պաշտոնին նշանակվել էր որպես Վազգեն Սարգսյանի ընտանիքի վստահելի անձ։ Ավելին, երկրի վարչապետ էլ նշանակվել էր Վազգեն Սարգսյանի եղբայրը՝ Արամ Սարգսյանը։ Ըստ էության՝ նախաքննությունը գտնվում էր ոճրագործությունից զոհ դարձած նախկին վարչապետ Վազգեն Սարգսյանի ընտանիքի կողմից վստահելի անձանց տիրույթում, աայդուհանդերձ, կազմակերպիչների մասով որեւէ ռեալ ապացույց ձեռք բերել չի հաջողվել։ Ահաբեկիչների մասով գործն ուղարկվել էր դատարան, որից անջատվել էր առանձին վարույթ՝ հնարավոր այլ մեղսակիցներին հայտնաբերելու համար։ Տարիներ շարունակ տեւած նախաքննության արդյունքում որոշվել էր այդ գործը կարճել, ինչին կողմնակից էր եղել նաեւ ինքը՝ Ջհանգիրյանը։

Մինչ կարճելու մասին որոշում կայացնելը նախաքննության արդյունքները քննարկվել են ՀՀ դատախազության 2004 թվականի նոյեմբերի 9-ին տեղի ունեցած կոլեգիայի նիստում, որին հրավիրվել եւ մասնակցել են «Հոկտեմբերի 27-ի» քրեական գործի եւ դրանից անջատված մասի նախաքննության մեջ ներգրավված բոլոր քննիչները, օպերատիվ աշխատողները, նրանց թվում՝ զինվորական դատախազության քննիչները եւ զինվորական դատախազ Գագիկ Ջհանգիրյանը՝ կոլեգիայի անդամի կարգավիճակով:

«Փաստինֆո»-ի հաղորդմամբ՝ դատախազության՝ տարիներ առաջ տարածած պաշտոնական հաղորդագրության համաձայն՝ «Քննարկման ժամանակ ելույթ է ունեցել նաեւ զինվորական դատախազ Գագիկ Ջհանգիրյանը եւ ընդգծել քրեական գործի վարույթը կարճելու անհրաժեշտությունը՝ նշելով, որ իրականում «Հոկտեմբերի 27-ի» քրեական գործից մաս անջատելու 2000 թվականի հուլիսի 11-ի որոշումը եղել է անօրինական՝ թելադրված քաղաքական իրավիճակով: Ըստ նրա՝ 2000 թվականի հուլիսին 11-ի որոշումը նպատակ է ունեցել հանդարտեցնել քաղաքական լարվածությունը, որին, ի պատասխան, ՀՀ գլխավոր դատախազի տեղակալ, կոլեգիայի անդամ Գ.Դանիելյանը նկատել է, որ այդ որոշումը ճիշտ հակառակ ազդեցությունն է ունեցել եւ քաղաքական լարվածությունն ավելի է սրել:

Կոլեգիայի արձանագրությունը եւ բոլոր նյութերը դատախազության արխիվում պահպանվում են:

Աղբյուր` Փաստինֆո