Փաստ ինֆո

ԿԲ-ն բավարար չափով գործիքակազմ կիրառե՞լ է՝ գնաճը կասեցնելու և կառավարելու համար։ ԱԺ-ում ԿԲ խորհրդի անդամի թեկնածու Արտակ Մանուկյանին այս հարցն ուղղեց ԱԺ «Հայաստան» խմբակցության պատգամավոր Թադևոս Ավետիսյանը։

Ընդդիմադիր պատգամավորը հետաքրքրվեց՝ կայի՞ն գործիքներ կամ ծրագրեր, որոնք կառավարությունը պետք է իրականացներ, սակայն չի իրականացրել։

«Երբ դառնաք ԿԲ խորհրդի անդամ, ի՞նչ եք իրականացնելու այս կարևորագույն հարցի վերաբերյալ։ Այսօր մեր երկրի բնակիչներն ուղղակի գնաճով թալանվում են, և իրական եկամուտներն էապես նվազում են»,-նշեց պատգամավորը։

Արտակ Մանուկյանը նշեց, որ ԿԲ-ն սահմանափակ թվով գործիքներ ունի, որոնցով կանոնակարգում է գնաճային սպասումները, այսինքն ԿԲ-ն կարգավորում է մակրոմիջավայրը։

«Եթե ակնկալում եք, որ ԿԲ-ն պետք է գործիքակազմ կիրառի, որ կոնկրետ մի ապրանքատեսակի շուկայի գների վրա փոփոխություն կամ ազդեցության գործիքներ կիրառի, դա այդպես չէ։ Սոցիալական մեծ նշանակություն ունեցող ապրանքների մասով գնաճի հնարավոր հետևանքները մեղմելու համար կառավարությունն այստեղ անելիք ունի, և Էկոնոմիկայի նախարարն ասում է, որ այս մասով աշխատանքներ իրականացվում են»,-ասաց Արտակ Մանուկյանը։

Վերջինս հավելեց, որ արդեն 5 անգամ վերաֆինանսավորման տոկոսադրույքները փոփոխվել են, ինչը վարքագծային փոփոխություն է բերում։ Արտակ Մանուկյանի խոսքով աշխարհի գրեթե բոլոր երկրները համամիտ են, որ 2021-ում գնաճային միտումներն ավելին կլինեն, քան կանխատեսում են, բայց 2022-ի հատակապես երկրորդ եռամսյակից հետո ակնկալվում է, որ գնաճը կվերադառնա կառավարելի թիրախային մակարդակի։

Ընդդիմադիր պատգամավորը նկատեց՝ 2022-ի բյուջեում նվազագույն աշխատավարձը չի բարձրացվում, անապահովության նպաստի չափը չի բարձրացվում, պետական ծառայողների բազային վարձատրության նվազագույն չափը չի բարձրացվում, բայց գնաճ է տեղի ունեցել։

«Սա նորմա՞լ է, համարժե՞ք է այս իրավիճակը, որ ունենք 2022-ի բյուջեում»,-ասաց Թադևոս Ավետիսյանը։
ԿԲ խորհրդի անդամի թեկնածուն ասաց, որ հնարավորինս զերծ պետք է մնա քաղաքական գնահատականից։ Արտակ Մանուկյանի խոսքով միջին ամսական աշխատավարձը գրեթե համադրելի չափով է, ինչ գնաճը և նույնիսկ մի փոքր նվազ։

Աղբյուր` Փաստինֆո