Փաստ ինֆո

Հոկտեմբերի 4-ին հարցում եմ ուղարկել ՊՆ՝ պարզելու՝արդյո՞ք 2020թ-ի դեկտեմբերի 17-ին և դրան հաջորդող օրերին ԶՈՒ ստորաբաժանումների և կամավորական խմբավորումների ետքաշման համար տրվել է գրավոր պաշտոնական հրաման, ու՞մ կողմից, ինչի հիման վրա: Մեկ ամիս հետո ՊՆ-ն պատասխանել է, որ բարձրացված հարցերը Պաշտպանության նախարարության լիազորությունների դուրս են: Այս մասին խորհրդարանում Կառավարության հետ հարցուպատասխանի ժամանակ ասաց պատգամավոր Գեղամ Մանուկյանը և հարց ուղղեց ՊՆ նախարարին .

«Ո՞ւմ ուղղեմ հարցս, ԿԳՄՍ նախարարի՞ն, թե՝ Առողջապահության նախարարին»:

Գեղամ Մանուկյանի հարցն իրարանցում առաջացրեց խորհրդարանում: Ալեն Սիմոնյանը նախ առաջարկեց հարցն ուղղել գրավոր տարբերակով, սակայն երկար քննարկումներից հետո որոշվեց, որ հարցին պատասխանելու է ՊՆ նախարար Արշակ Կարապետյանը:
ՊՆ նախարարը խուսափեց հստակ պատասխանել պատգամավորի հարցին.

«Դուք ԱԺ -ում համապատասխան հանձնաժողով եք ստեղծել, դուք այդ հարցերի պատասխանները պետք է ակնկալեք ձեր կողմից ստեղծված հանձնաժողովից:Կարծում եմ, եթե նորից մեզ հարցում, գրեք, նույն պատասխանը ստանալու եք»,-ասաց Արշակ Կարապետյանը:
Գեղամ Մանուկյանն էլ նշեց, որ այս հարցը բազմիցս քննարկվել է, սակայն որևէ գերատեսչություն չի պատասխանել՝ ինչի՞ հիման վրա են դեկտեմբերի 17-ից հետո հայկական զորքերը ետ քաշվել դիրքերից.
«Պատգամավոր Արթուր Սարգսյանը բարձրաձայնեց՝ թե ինչպես է Վաղարշակ Հարությունյանը զորքերի հետ քաշման մասին բանավոր ասել, որևէ գերատեսչություն մինչ օրս չի ասում՝ ինչի՞ հիման վրա են զորքերը ետ քաշվել
Եթե գրավոր պատասխանեն, վաղը նաև պատասխան են տալու՝ ի՞նչ թղթեր են ստորագրվել, որի հիման վրա հպարտանում են, թե Փելասարի վրա մեր դիրքերն են, թեև Կապանը և Սյունիքը վտանգի տակ են»,-ասաց Գեղամ Մանուկյանը:
Ինչին ի պատասխան ՊՆ նախարարը կրկին հորդորեց հարցերի պատասխանը ստանալ քննիչ հանձնաժողովների միջոցով.

«Դուք հնարավորություն ունեք ստեղծել բազմաթիվ հանձնաժողովներ և ստեղծել եք, խնդրում եմ, այդ հարց ինքներդ ձեզ ուղղեք: ՊՆ-ն այն կազմակերպությունը չի, որ թեկուզ դուք՝ ինչ-ուզեք հարցնեք, մենք էլ ինչ-ուզենք պատասխանենք, մենք եթե պատասխանում ենք, պարտավոր ենք հիմնովին պատասխանել»,-ասաց Արշակ Կարապետյանը:

Աղբյուր` Փաստինֆո