Փաստ ինֆո

Հայաստանում իրականացվող սուբվենցիոն ծրագրերը շատ կարևոր նշանակություն են ունեցել։ Ազգային ժողովում հայտարարեց ՀՀ վարչապետ Նիկոլ Փաշինյանը: Վերջինս պնդեց, որ 2019 թվականից մինչ օրս քաղաքներում և խոշորացված համայնքներում լայնածավալ ծրագրեր են իրականացվում:

Վարչապետը պնդեց, որ հիմնանորոգվում են փողոցներ, որ 30-40 տարի չեն հիմնանորոգվել, նորոգվում են տանիքներ, վերակառուցվում են մանկապարտեզներ, որ 25-30 տարի չեն նորոգվել։ Ըստ նրա՝ դա եղել է կառավարության դրած պահանջը համայնքների առաջ:

2018-2020 թվականների ընթացքում սուբվենցիոն ծրագրերի վրա ծախսվել է 47,5 միլիարդ դրամ: Փաշինյանը հայտարարեց, որ համայնքները չաշխատելու ու աշխատանք չանելու տարբերակ չեն ունեցել:

«Կառավարությունը որևէ համայնքապետի թույլ չէր տա, որ ինքը նստի ու ոչ մի բան չանի: Մենք բյուջետային կարգապահությանն ենք հետևել։ Մենք չենք թողել, որ տարածքները վարձով տան, այդ գումարները բյուջե չմուտքագրեն, տասնյակ քրեական գործեր են հարուցվել, շատերն ասում են՝ «ո՞ւր է, չդատվեցին»։ Մարդկանց նստացնելը մեր միակ նպատակը չէ, բայց քրեական գործերով պրակտկա է փոխվել, որ 10 դրամով հողը տան իրենց եղբորը, հետո իրենց եղբայրը 100 000 դրամով այդ նույն հողը վարձակալության տա ինչ-որ կազմակերպության: Մենք ասել ենք՝ ոչ, այդ գումարները բերեք բյուջե, որի գումարից կապիտալ ծախսեր պետք է արվեն՝ պիտի կառուցվեն մանկապարտեզներ, փողոցներ, դպրոցներ»,-ասաց նա:

Աղբյուր` Փաստինֆո