Փաստ ինֆո

Դատախազ Գևորգ Բաղդասարյանի՝ գլխավոր դատախազի տեղակալի պաշտոնում նշանակվելուց հետո նրա հայրը՝ Լոռու մարզի ընդհանուր իրավասության դատավոր Սուրեն Բաղդասարյանը, որը վերջերս նշանակվեց դատարանի նախագահ, դադարել է քննել քրեական գործեր, փոխել է մասնագիտացումը և այժմ քննում է քաղաքացիական գործեր։ Այս մասին Ռոբերտ Քոչարյանի եւ Արմեն Գեւորգյանի գործով դատական նիստում հայտարարել է փաստաբան Ալեքսանդր Կոչուբաեւը՝ պնդելով, որ դատավոր Աննա Դանիբեկյանը պետք է ինքնաբացարկ հայտնի ու հրաժարվի գործը քննելուց, քանի որ ինքը եւս շահագրգիռ անձ է նշված գործով։ 

Ինչպես արդեն տեղեկացրել ենք՝ այսօրվա դատական նիստի ընթացքում Արմեն Գևորգյանի պաշտպան Ալեքսանդր Կոչուբաևը միջնորդություն է ներկայացրել՝ դատավոր Աննա Դանիբեկյանին ինքնաբացարկ հայտնելու մասին՝ հիմքում դնելով Նարեկ Մանթաշյանի վերաբերյալ «Քթի» գործը, որի շրջանակներում Դանիբեկյանը ներգրավված է որպես տուժող, իսկ փաստաբանը՝ Կոչուբաևը, «Քթի» գործով հարցաքննվել է վկայի կարգավիճակով, բայց՝ կասկածանքի շուրջ։

«Փաստինֆո»-ի թղթակցի հաղորդմամբ՝ միջնորդության շուրջ առարկություններ ներկայացրեց մեղադրող դատախազ Գևորգ Բաղդասարյանը՝ նշելով, որ ցանկացած դեպքում կարելի է ցանկացածի հետ մտնել որևէ արհեստական դատավարական հարաբերության մեջ և դա պատճառ դարձնել, որ վարույթից այդ սուբյեկտը հեռանա. «Օրինակ՝ կարող են հաղորդում ներկայացնել իմ վերաբերյալ, վաղը՝ բացարկ հայտնել»։ Ըստ նրա՝ դա չափից պրիմիտիվ է։

Հատկանշական է, որ Բաղդասարյանը նման դիրքորոշում է հայտնում այն դեպքում, երբ հենց ինքը՝ երկու տարի առաջ Վերաքննիչ քրեական դատարանի դատավոր Մխիթար Պապոյանին սույն գործով ինքնաբացարկ հայտնելու միջնորդություն էր ներկայացրել՝ հիմքում դնելով Պապոյանի հաղորդման հիման վրա ԱԱԾ-ում արդեն 2.5 տարի քննվող քրեական գործը, որի շրջանակներում դատավորը բոլորովին վերջերս տուժող է ճանաչվել։

Փաստաբան Ալեքսանդր Կոչուբաևն էլ հիշեցրեց, որ Գևորգ Բաղդասարյանի հայրը՝ դատավոր Սուրեն Բաղդասարյանը ինքնաբացարկ է հայտնել բոլոր քրեական գործերով այն բանից հետո, երբ որդին դարձել է գլխավոր դատախազի տեղակալ։ Դատավորը Բաղդասարյանը գտել է, որ միայն այն հանգամանքը, որ իր որդին նշանակվել է գլխավոր դատախազի տեղակալ, կարող է կասկածի տակ դնել իր անաչառությունը։ Պաշտպան Լուսինե Սահակյանն էլ փաստեց՝ դատավոր Բաղդասարյանն այլևս քրեական գործեր չի քննում. «Սա է դատավորը, սա է դատավորի պարտականությունը»։ Սահակյանն ընդգծեց, որ եթե դատավոր Բաղդասարյանը նման որոշումներ է կայացրել բոլոր քրեական գործերով, փոխել իր կյանքը և սկսել է քննել քաղաքացիական գործեր, որ որևէ մեկի մոտ կասկածներ չլինի, ապա իր համար զարմանալի է, որ դատախազ Գևորգ Բաղդասարյանը, որն ունի նման հայր, այսօր կարող է կանգնել և ասել՝ ոչինչ, որ դատավորը տուժող է, փաստաբանը վկա-կասկածյալ է, Արմեն Գևորգյանի կինը հաղորդում է ներկայացրել։ Փաստաբան Լուսինե Սահակյանը հորդորեց՝ դատարանին ինքնաբացարկ հայտնել և մարդկանց ապացուցել, որ այս գործին կառչած չէ, որովհետև տպավորություն է, որ դատավորի համար այս գործը միակն է, ինքն էլ՝ ամենակարևոր դատավորը. «Տպավորություն է, որ սա Ձեր կյանքի նպատակն է, այլ նպատակներ է պետք ունենալ»։

Դատարանը հեռացավ խորհրդակցական սենյակ՝ միջնորդության վերաբերյալ որոշում կայացնելու։ Որոշումը կհրապարակվի այսօր՝ ժամը 16.00-ին։

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո