Փաստ ինֆո

Այս պահին թուրքը գտնվում է Սիսիանի վարչական տարածքում. Այս մասին լրագրողների հետ զրույցում հայտարարեց «Հայաստան» խմբակցության պատգամավոր Արթուր Սարգսյանը։

Վերջինս հայտարարեց, որ իր պայքարը սկսվել է սահմանների անվտանգությունից ելնելով։

«Այն ժամանակ դեռ համայնքի ղեկավար էի՝ մայիս 23-ից հունիսի 8-ը եղել եմ Իշխանասարի հատվածում՝ համայնքի ղեկավարների, ավագանու հետ ու 15 օր սահմանի պաշտպանություն ենք իրականացրել։ Այս պահին թուրքը գտվում է Սիսիանի վարչական տարածքում՝ Սև լճից վերև՝ Իշխանասարի հատվածում»։

Սարգսյանը նաև պատերազմից հետո ՀՀ սահմանների փոփոխությանն է անդրադարձել։ Ըստ նրա՝ պաշտպանության նախկին նախարար Վաղարշակ Հարությունյանը դեկտեմբերի 17-ին Գորիս է հրավիրել հայանքի ղեկավարներին՝ ասելով, որ մինչև հաջորդ օրը ժամը հինգը ժամանակ է տալիս՝ բոլոր դիրքերից հետ գալու համար։

«Մեր մոտ մտահոգություն առաջացավ։ Բարձրաստիճան պաշտոնյաներն ասել էին, որ ով որտեղ կանգնած է, այդտեղ պետք է մնա։ Նոյեմբերի 9-ի պայմանագրում գրված չէր, որ մենք պետք է հետ գանք։ Նախարարին ինչ հարցնում ենք, ասում է՝ ես տեղյակ չեմ, ասում է՝ ժամը հինգին պետք է հետ գանք։ Հարցրել եմ, կարո՞ղ է այնպես լինի, որ գաք ասեք Սիսիանն էլ է տված հետ քաշվեք»։

Պատգամավորը նշեց, որ Գորիսի և Կապանի հատվածում 25 կմ հետ են եկել՝ դիրքերը թողնելով թշնամուն։

Սարգսյանը Սիսիանի համայնքապետ է եղել շուրջ հինգ տարի, տիրապետում է ՏԻՄ-երին ամբողջությամբ, ուստի խորհրդարանում ընդգրկվել է այդ հանձնաժողովում։ Սարգսյանը հիշեց, որ դեկտեմբերի հինգին՝ իշխանությանը դեմ արտահայտվելուց հետո իր նկատմամբ սկսվել է քաղաքական հետապնդում։

«Մեր պայքարի մասին, համայնքի ղեկավարներով, դեռ դեկտեմբերի 5-ին ենք հայտարարել՝ նշելով որ դեմ ենք այս իշխանություններին։ Մեր պայքարը սկսել ենք համայնքի ու բնակչության անվտանգությունից ելնելով։ Քաղաքական շահարկումներ չեն եղել»։

Սարգսյանը նշեց, որ անցած ՏԻՄ ընտրություններով Գորիսում, Մեղրիում՝ բնակիչները հայտնեցին իրենց հաստատակամ կարծիքը։ Սարգսյանը հույս ունի, որ Կապանում սպասվող ՏԻՄ ընտրություններին նույն կերպ հաղթանակ կտանի նաև Գևորգ Փարսյանը։

«Այս տարիների ընթացքում ինքը մեծ աշխատանք է արել համայնքի համար ու վստահ եմ, որ կապանցիներն իրենց ձայնը կտան Փարսյան Գևորգին»,- եզրափակեց նա։

Աղբյուր` Փաստինֆո