Փաստ ինֆո

ՀՔԾ-ն որևէ իրավական հիմք չի գտել հայկական ռազմավարական նշանակության տարածքներն ադրբեջանցիներին հանձնելու համար, սակայն չեն համարձակվում նաեւ պատշաճ իրավական գնահատական տալ ու մեղադրանք առաջադրել՝ տարածքները թշնամուն հանձնելու հրաման տված ռազմաքաղաքական ղեկավարությանը։

Ինչպես արդեն տեղեկացրել ենք՝ 2020թ դեկտեմբերին ադրբեջանցիների հսկողության տակ են անցել Սյունիքի ռազմավարական նշանակության բարձունքները, Որոտանի, Շուռնուխի, Քարահունջի որոշ տներ, դաշտավայրեր, ինչպես նաեւ արոտավայրեր, այգիներ՝ Սյունիքի այլ բնակավայրերից, Գորիս-Կապան ճանապարհի մի մասը, թեեւ 2020 թվականի նոյեմբերի 9-ին Փաշինյանի կողմից ստորագրված եռակողմ հայտարարությամբ նման զիջումներ նախատեսված չէին։ Ավելին՝ ուղղակի ամրագրված էր, որ կողմերը մնում են այն դիրքերում, որտեղ գտնվում են հայտարարությունն ստորագրելու պահին։

«Փաստինֆո»-ն ամիսներ առաջ հարցում էր ուղարկել ՀՀ գլխավոր դատախազություն՝ պարզելու, թե արդյո՞ք ՀՀ տարածքային ամբողջականության դեմ իրականացվող գործողությունների առնչությամբ քրեական գործ հարուցվել է։ Ի պատասխան ՀՀ գլխավոր դատախազությունը 2021 թվականի հունվարի 12-ին գրավոր հայտնել էր, որ նշված հանգամանքները քննության առարկա են դարձել ՀՀ ՊՆ ռազմական վերահսկողության ծառայության նախկին պետ Մովսես Հակոբյանի հարցազրույցի ընթացքում հայտնած փաստերի հիման վրա ՀՀ ՀՔԾ-ում ՀՀ քրեական օրենսգրքի 308-րդ հոդվածի 2-րդ մասով հարուցված քրեական գործի շրջանակներում, որոնց կտրվեն քրեաիրավական գնահատականներ։

Ամիսներ անց՝ 2021 թվականի հոկտեմբերին, «Փաստինֆո»-ն կրկին գրավոր հարցում ուղարկեց ՀՔԾ՝ պարզելու, թե ինչ փուլում է գտնվում նախաքննությունը, արդյոք պարզվել են ՀՀ տարածքային ամբողջականության դեմ իրականացված գործողությունների հանգամանքները, թե ինչ հիմնավորմամբ են Սյունիքի ռազմավարական նշանակության տարածքները, ենթակառուցվածքները հանձնվել թշնամուն։ Ի վերջո, քրեաիրավական գնահատականներ տրվել են, թե ոչ։

Առավել եւս, երբ փոխվարչապետ Մհեր Գրիգորյանը եւս ԱԺ ամբիոնից հայտարարեց, որ սահմանազատման-սահմանագծման աշխատանքներ դեռ չեն իրականացվում եւ պարզ էլ չէ, թե ինչ քարտեզով է իրականացվելու։ Ի պատասխան ՀՔԾ-ից պաշտոնապես հայտնել են, որ քրեական գործով նախաքննությունը շարունակվում է։ Ասել է թե՝ ՀՔԾ-ն այս անցած ամիսների ընթացքում եւս համոզվել է, որ բազմաթիվ իրավական խնդիրներ կան Սյունիքի տարածքներն ադրբեջանական հսկողության տակ հանձնելու գործում ու որեւէ սողանցք անգամ չի գտել ՀՀ տարածքային ամբողջականության դեմ իրականացված գործողությունների դրվագով վարույթը կարճելու կամ քրգործի հարուցումը մերժելու համար։ Այլ հարց է, որ որեւէ մեկի մեղադրանք եւս չի առաջադրել, թերեւս սա էլ ունի իր բացատրությունը՝ չունեն համապատասխան համարձակություն, սակայն նախաքննությունը շարունակվում է, որը ցանկացած պահի կարող է Փաշինյանի համար անկանխատեսելի շրջադարձ ունենալ։

Ինչ վերաբերում է Ն. Փաշինյանի, Մհեր Գրիգորյանի հարցաքննությանը, ապա ՀՔԾ-ն խուսափել է այդ հարցին պատասխանել՝ պատճառաբանելով նախաքննության գաղտնիությունը։

Աղբյուր` Փաստինֆո