Փաստ ինֆո

«Բարգավաճ Հայաստան» խմբակցության նախկին պատգամավոր Ջանիբեկ Հայրապետյանն առաջադրված մեղադրանքը չի ընդունում։ Այս մասին «Փաստինֆո»-ի հետ զրույցում ասաց փաստաբան Ռաֆայել Ամիրխանյանը։

Հիշեցնենք, որ հոկտեմբերի 23-ին Երևանի ընդհանուր իրավասության դատարանը՝ դատավոր Վաչե Մարգարյանի նախագահությամբ, բավարարել է Ջանիբեկ Հայրապետյանի նկատմամբ կալանավորումը որպես խափանման միջոց ընտրելու մասին միջնորդությունը։ Նախկին պատգամավորը մեղադրվում է տարիներ առաջ՝ 2016թ մայիսի 9-ին տեղի ունեցած ծեծկռտուքի գործով՝ ՀՀ քրեական օրենսգրքի 112-րդ հոդվածի 1-ին մասով՝ դիտավորությամբ մեկ ուրիշին մարմնական վնասվածք պատճառելու կամ առողջությանն այլ ծանր վնաս պատճառելու հատկանիշներով։

Պաշտպան Ռաֆայել Ամիրխանյանը մեզ հետ զրույցում նշեց, որ պաշտպանության կողմը մեղադրանքն անհիմն է համարում, չի ընդունում։ Ինչ վերաբերում է 2016թ տեղի ունեցած դեպքին, ապա այն ժամանակ նախապատրաստված նյութերի հիման վրա քրեական գործի հարուցումը մերժվել էր, գործը վերաբացվել է տարիներ անց՝ տուժող կողմի բողոքի հիման վրա։ Թեև դեպքից տուժած տղամարդն արդեն մահացել է, բողոք ներկայացրել է նրա իրավահաջորդը՝ կինը, ինչի հիման վրա էլ վերաբացվել է քրեական գործը և շուրջ մեկ տարի է, ինչ նախաքննություն է ընթանում։ Պաշտպանի փոխանցմամբ՝ վերաբացված գործի շրջանակներում Հայրապետյանի մասնակցությամբ որևէ գործողություն չի եղել, օրերս նա հրավիրվել էր հարցաքննության, սակայն պաշտպանության կողմը չի հասցրել ներկայանալ, առավոտյան ձերբակալման որոշում է կայացվել և անմիջապես մեղադրանք է առաջադրվել։

«Ավելի քան մեկ տարի է, ինչ գործը քննում են, ինչ հնարավոր է՝ արել են»,- նշեց փաստաբանը։

Ըստ նրա՝ Հայրապետյանի մասնակցությամբ առերես հարցաքննություն դեռևս տեղի չի ունեցել, իսկ իրենց հասանելի գործի նյութերով՝ այլ անձինք ցուցմունք չեն տվել Հայրապետյանի դեմ։

Ինչ վերաբերում է Հայրապետյանին կալանավորելու մասին առաջին ատյանի դատարանի որոշմանը, ապա դրա դեմ վերաքննիչ բողոք արդեն ներկայացվել է։ Փաստաբանն առաջին ատյանի դատարանի որոշումը որակեց որպես անհիմն՝ նշելով, որ այն պատճառաբանված չէ և չկա որևէ հիմք և հիմնավորում, որ կարելի էր Ջանիբեկ Հայրապետյանին կալանքի տակ վերցնել։ Առաջին ատյանի դատարանը կալանավորման հիմքերից հավանական է համարել միայն խոչընդոտման ռիսկը, սակայն, ըստ փաստաբանի, որևէ հիմնավորում չի ներկայացվել։

«Ուղղակի օրենսդրական ձևակերպումներ անելով՝ իր առաքելությունն ի վերջո կատարել է՝ ամեն գնով միջնորդությունը բավարարելու »,- նշեց Ամիրխանյանը։

Հեղինակ՝ Իզաբել Սահակյան

Աղբյուր` Փաստինֆո