Փաստ ինֆո

Մեր պետության հարատևությունն ապահովելու համար անհրաժեշտ են երկարաժամկետ ներդրումներ գիտության և կրթության բնագավառում, ինչը մեզ համար չափազանց կարևոր առաջնահերթություն է։ ԱԺ հանձնաժողովների նիստում 2022-ի պետբյուջեն ներկայացնելիս հայտարարեց ՀՀ վարչապետ Նիկոլ Փաշինյանը։

Վարչապետը նշեց, որ 2022թ.-ին ԿԳՄՍ նախարարությանը հատկացվող գումարն աճելու է 27 %-ով։

«Այս պահի դրությամբ 76 դպրոց և 51 մանկապարտեզ արդեն գտնվում են կառուցման, վերակառուցման կամ հիմնանորոգման փուլում։ 2022թ.-ին միայն գիտության ուղղությամբ հատկացվելու է 83 %-ով ավելի գումար, իսկ գիտական թեմատիկ հետազոտություններին հատկացվող գումարը 2.5 անգամ ավել է՝ 6.7 մլրդ դրամ է»,-ասաց Նիկոլ Փաշինյանը՝ հավելելով, որ իրենց նպատակն է անձի կրթությունը և շարունակական զարգացումը դարձնել կենսակերպ։ Վարչապետի խոսքով գիտության և տեխնոլոգիական ոլորտի զարգացումն այս գործընթացի տրամաբանական շարունակությունն է, և կառավարությունն այստեղ ներդրում է ֆինանսավորման նոր բանաձևեր։

Նիկոլ Փաշինյանը նկատեց՝ գումարների ավելացումը բոլոր ոլորտներում անհրաժեշտ, բայց ոչ բավարար պայման է։ Կառավարության ծրագրերը կյանքի կոչելու համար անհրաժեշտ են ոչ միան տնտեսական միջամտություններ, այլև հասարակական և մշակութային վերափոխումներ։

Վարչապետի համոզմամբ՝ կառավարումը պետք է նպաստի, այլ ոչ թե խոչընդոտի ներդրումների իրագործմանը.

«Այս առումով կարևոր են պլանավորման և իրագործման մշակույթը, ծրագրերի իրագործման գործընթացները, որոնց անկատարությունը շատ դեպքերում բերում է կապիտալ ծախսերի թերակատարումների»,-նշեց վարչապետը։

Աղբյուր` Փաստինֆո