Փաստ ինֆո

Գյումրու ՏԻՄ ընտրությունները համակարգող թիվ 31 ՏԸՀ-ն  հոկտեմբերի 24-ին հայտարարեց հոկտեմբերի 17-ին կայացած ընտրությունների արդյունքները: Թիվ 31 ՏԸՀ  նախագահ Տիգրան Ղազարյանն ընտրական շեմը հաղթահարած քաղաքական 5 ուժերի ներկայացուցիչներին շնորհավորեց Գյումրու ավագանու կազմում ընդգրկվելու ու քաղաքակիրթ պայքար մղելու համար:

Տիգրան Ղազարյանը շնորհավորեց նաև ընտրություններին մասնակցած, բայց անցողիկ շեմը չհաղթահարած ուժերին՝ իրենց մասնակցության համար: «Հաշվի առնելով այն, որ  ոչ մի բողոք ու վերահաշվարկի պահանջ հանձնաժողովը չի ստացել, այսօր 12:00-ին հանձնաժողովը արձանագրեց ընտրությունների արդյունքները»,- նշեց Տիգրան Ղազարյանը՝ տեղեկացնելով, որ 109 453 ընտրողից ընտրության մասնակցել է 26 468  քաղաքացի:
 
Համաձայն ընտրական օրենսգրքի 141 հոդվածի 3  և 4 կետերի՝ մանդատների բաշխումը իրականացվել  է հետևյալ կերպ. «Բալասանյան դաշինք» կուսակցություն՝ 14 մանդատ, «Քաղաքացիական պայմանագիր» կուսակցություն՝ 11, «Զարթոնք» կուսակցություն՝ 4 մանդատ, «Ապրելու երկիր» կուսակցություն՝  2, Հայաստանի Հանրապետական կուսակցություն՝ 2 մանդատ:

Գյումրիի նոր քաղաքապետն ընտրվելու է նորընտիր ավագանու առաջին նիստի ընթացքում, որը տեղի է ունենալու նոյեմբերի սկզբին։

Աղբյուր` Փաստինֆո