Փաստ ինֆո

Հայ ժողովրդին մեկ անգամ ևս ստորացնելու փորձ է արվում: Այս մասին «Փաստինֆո»-ի հետ զրույցում ասաց ԱԺ փոխնախագահ, «Հայաստան» դաշինքի անդամ Իշխան Սաղաթելյանը՝ մեկնաբանելով հայկական և ռուսական մամուլում ակտիվ շրջանառվող լուրերը, որ նոյեմբերի 9-ին Մոսկվայում կայանալիք հանդիպման ժամանակ Ադրբեջանը և Հայաստանը պատրաստվում են երկու նոր փաստաթուղթ ստորագրել:

Իշխան Սաղաթելյանի դիտարկմամբ՝ այդ փաստաթուղթը հերթական ստորացուցիչ, հայ ժողովրդի արժանապատվությունը և կենսական շահերը ոտնահարող թուղթ է լինելու:

Հարցին՝ ընդդիմությունն արդյո՞ք տեղյակ է՝ ի՞նչ նոր փաստաթղթի մասին է խոսքը, ի՞նչ է ենթադրվում դրանցով, Սաղաթելյանն ասաց.

«Գործընթացներ են տեղի ունենում, որոնց համադրությամբ և վերլուծությամբ, նաև տարբեր կողմերի հայտարարությունները մեզ հուշում են, որ լավ ճանապարհով չենք գնում: Իշխանությունը չի էլ թաքցրել, որ գնալու է այս ճանապարհով, իսկ ընդդիմությունը դրա մասին խոսել է ամեն օր, այնպես չի, որ առաջին անգամ է խոսում: Եթե ես խորհրդարանում 10 ելույթ եմ ունեցել, 7-ը դրան է նվիրված եղել: Շատ մեծ անակնկալ չի եղել, որ երկիրը կտանեն նոր կործանարար ճանապարհով»,-ասաց նա։

Իշխան Սաղաթելյանը երեկ լրագրողների հետ զրույցում ասել էր՝ «լինելու է նոր կապիտուլյացիայի պայմանագիր, Հայաստանն իրականացնելու է նոր զիջումներ»:

Ճշգրտող հարցին՝ արդյո՞ք իր այս հայտարարության մեջ հենց նոր ստորագրվելիք փաստաթղթերը նկատի ուներ, Սաղաթելյանը հաստատեց.
«Այո, դա նկատի ունեմ»:

ԱԺ փոխնախագահը նաև վստահեցրեց, որ նոր ստորագրվելիք փաստաթղթերը իշխանությունը կրկին կփորձի ներկայացնել որպես ձեռքբերում, տարածաշրջանում խաղաղության հաստատելու փորձ.

«Այն, որ Հայաստանի իշխանությունները չեն սպասարկում և չեն էլ կարող սպասարկել Հայաստանի, Արցախի և հայ ժողովրդի շահերը, այդ մասին մենք վերջին մեկ տարում անընդհատ խոսել ենք: Մենք պարբերաբար ասել ենք, որ այս իշխանությունն ի վիճակի չէ բանակցություններ վարել և մտածում ենք, որ երկիրը կտանեն նոր կապիտուլյացիայի:

Մենք գտնում ենք, որ այս ամեն ինչը ավարտվելու է նոր զիջումներով՝ նաև կենսական զիջումներով:Պետք է ամեն ինչ անենք, որպեսզի կանխենք սա, բոլորը հասկանան, որ հայ ժողովուրդը պատրաստ չէ նոր զիջում ների գնալ»,-ասաց Սաղաթելյանը:

Նկատենք, որ, ըստ մամուլի,Հայաստանը և Ադրբեջանը նոր փաստաթուղթը ստորագրելու են հենց նոյեմբերի 9-ին՝ եռակողմ կապիտուլյացիոն փաստաթղթից ուղիղ մեկ տարի անց:

Ըստ Սաղաթելյանի՝ սրանով փորձ է արվում հայ ժողովրդին երկրորդ անգամ ստորացնել։

«Միայն այն, որ այդ փաստաթուղթն ամսի 9-ին է կնքվում, արդեն իսկ արժանապատվության, ինքնասիրության հարց է:
Հայ ժողովրդին մեկ անգամ ևս ստորացնելու փորձ է արվում: Միայն սա բավարար է, որ ողջ ժողովուրդը դուրս գա սրա դեմ»,-ասաց ԱԺ փոխնախագահը:

Իշխան Սաղաթելյանը նաև հայտնեց, որ ընդդիմության ներսում քննարկումներ են ընթանում, իսկ նոյեմբերի 9-ին մեծ հանրահավաք է սպասվում.
«Մինչ այդ կորոշենք՝ ի՞նչ ենք անում: Քննարկումներ են ընթանում, պետք է հասկանանք՝ ինչ է կատարվում»։

Աղբյուր` Փաստինֆո