Փաստ ինֆո

ԶԼՄ ներկայացուցիչները վերջին երեք տարիների ընթացքում տեսել են՝ ինչպիսի գրոհներ են տեղի ունեցել իրենց նկատմամբ՝ հենց իշխանությունների կողմից, նրանք գիտեն՝ այս իշխանություններն ինչ անհանդուրժող են քննադատության նկատմամբ և այդ ամբողջի համակցությունն արտահայտվել է հենց այս օրենքի մեջ: Այս մասին խորհրդարանում «Զանգվածային լրատվության մասին» օրենքում փոփոխությունների նախագծի վերաբերյալ քննարկման ժամանակ ասաց «Հայաստան» խմբակցության պատգամավոր Արամ Վարդևանյանը:

Վարդևանյանի դիտարկմամբ՝ իշխանությունները նոր նախագծով, փորձում են պայքարել ֆեյքերի դեմ, բայց պայքարում են ԶԼՄ-ի դեմ.

«Այսինքն՝ ոչ թե ասում են անանուն դոմեյն ունենալն է խնդիր, այլ՝ անանուն դոմեյնին հղում տալն է խնդիր: Եթե ասում ենք՝ անաուն դոմեյնի խնդիր կա, ուրեմն պետք է ասենք՝ անանուն դոմեյնն է խնդիրը, ոչ թե ԶԼՄ-ն, որը հղում է տալիս այդ դոմեյնին: Լրատվամիջոցը իր գործունեության մեջ պետք է ունենա ազատություն, դա լինի ցանկալի, թե՝ ոչ»,-ասաց Վարդևանյանը:

Արամ Վարդևանյանը նաև նշեց, որ նախագծով պահանջվում է լրատվամիջոցից հաշվետվությունը ներկայացնել, իսկ պահանջը չկատարելու դեպքում առաջարկում են 500 000 դրամից մինչև 700 000 դրամ տուգանքի կենթարկել տվյալ լրատվամիջոցին:

«Այս իշխանությունը դրական վերաբերմունք ունի ցանկացած ֆեյքային գործունեության նկատմամբ: Ֆեյք նյուզի դեմ պայքարելու համար պետք է ունենալ մի իրականություն, որտեղ իշխանությունը չի հանդուրժում արծրունովհաննիսյանական ճշմարտությունը, բայց կարծես թե հենց իրենք էլ այդ ամենը գեներացնելն են»,-ասաց Վարդևանյանը:

Աղբյուր` Փաստինֆո