Փաստ ինֆո

Քրեական գործեր քննող դատավորների նկատմամբ ամենաշատ վարույթները սկսվել են հարուցվել վերջին շրջանում։ Այս մասին ԲԴԽ նիստին ասաց Վերաքննիչ քրեական դատարանի դատավոր Սերգեյ Մարաբյանը՝ մտահոգություն հայտնելով առ այն, որ հիմնական սուբյեկտը դարձել է գլխավոր դատախազը եւ քրեական գործեր քննող դատավորների նկատմամբ վարույթներ հարուցում են դատախազի զեկույցի հաղորդումների վրա։

Ինչպես արդեն տեղեկացրել ենք՝ դատավոր Սերգեյ Մարաբյանը միջնորդություն էր ներկայացրել՝ ՍԴ դիմելու մասին։ Դատավորը բարձրացրել էր ՀՀ արդարադատության նախարարության կողմից դատավորների նկատմամբ վարույթներ հարուցելու լիազորության սահմանադրականության հարցը։

Բանն այն է, որ վարույթների հարուցման համար նախարարությանը հաղորդում ներկայացնող հիմնական սուբյեկտը ՀՀ գլխավոր դատախազն է։

Դատավոր Սերգեյ Մարաբյանը, որը նաև Դատավորների ընդհանուր ժողովի Էթիկայի և կարգապահական հանձնաժողովի նախագահն է, նշեց, որ կառույցը տևական ժամանակ է, ինչ գործում է, սակայն որևէ հաղորդում ՀՀ գլխավոր դատախազության կողմից չի ներկայացվել, բոլոր հաղորդումները դատախազությունը ներկայացնում է նախարարությանը, ուստի, կասկածներ կան որոշակի կոալիցիոն համագործակցության։ Դատավորը կասկածներ ունի, որ դատախազությունը փորձում է նախարարության միջոցով կասկածի տակ դնել դատարանների անկախությունը։ Առարկություններ ներկայացրեց նաև ՀՀ արդարադատության փոխնախարար Սուրեն Գրիգորյանը՝ նշելով, թե նախարարության ներգրավվումը վարույթների հարուցման փուլում անընդունելի չէ և, որ նախարարությունը չէ վերջնական որոշում կայացնողը։ Գագիկ Ջհանգիրյանն ընդհատեց Գրիգորյանին՝ նշելով, որ համբերատար լսում է, բայց դա ԱԺ-ի համար նախատեսված ելույթ է։
Լսելով կողմերի դիրքորոշումը՝ ԲԴԽ-ն որոշեց մերժել ՍԴ դիմելու մասին միջնորդությունը։

Հիշեցնենք, որ Վերաքննիչ քրեական դատարանի դատավոր Սերգեյ Մարաբյանի նկատմամբ կարգապահական վարույթ է հարուցվել ՀՀ արդարադատության նախկին նախարար Ռուստամ Բադասյանի կողմից՝ ՀՀ գլխավոր դատախազի հաղորդման հիման վրա՝ ԱԺ նախկին նախագահ Արարատ Միրզոյանին ծեծի ենթարկելու գործով մեղադրյալներից մեկի՝ Ժիրիկ Սիրեկանյանի խափանման միջոցը փոխելու համար։ Մասնավորապես, ինչպես արդեն տեղեկացրել էինք, առաջին ատյանի դատարանը, քննելով Սիրեկանյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը, որոշել է բավարարել այն, ինչը պաշտպանության կողմը վիճարկել է։ Վերաքննիչ քրեական դատարանը՝ դատավոր Սերգեյ Մարաբյանի նախագահությամբ, բավարարել էր փաստաբանի բողոքը՝ բեկանելով Սիրեկանյանին կալանավորելու մասին առաջին ատյանի դատարանի որոշումը՝ հիմքում դնելով մեղադրյալի այլուրեքությունը՝ դեպքի վայրում չգտնվելու հանգամանքը փաստող տվյալները։ Այսինքն՝ վերծանումներ են եղել, որոնք հաստատել են, որ դեպքի ժամին մեղադրյալը գտնվել է այլ տեղանքում։ Վերաքննիչ քրեական դատարանի որոշման դեմ էլ վճռաբեկ բողոք էր ներկայացրել արդեն դատախազությունը, որի արդյունքում այն բեկանվել էր։ Վճռաբեկ դատարանի սույն որոշումից հետո դատավորի նկատմամբ վարույթ է հարուցվել։

Հեղինակ՝ Իզաբել Սահակյան

Աղբյուր` Փաստինֆո