Փաստ ինֆո

Ամենաանընդունելի քաղաքականությունը, որ այս իշխանություները որդեգրել են, դա շահառուների հետ չքննարկելն է այն նախագծերը, որոնք վերաբերում են Զանգվածային լրատվամիջոցներին: Ընդունում են ԶԼՄ-ների մասին օրենք, բայց լրատվամիջոցների տեսակետը չեն լսում, ասում են՝ մենք օրենքը կընդունենք, դուք էլ խելոք աշխատեք այն կարգավորումներով, որոնք մենք նախատեսել ենք: Այս մասին խորհրդարանում քննարկման ժամանակ ասաց «Հայաստան» խմբակցության պատգամավոր Էլինար Վարդանյանը ՝ անդրադառնալով ՔՊ-ական պատգամավորների նախաձեռնած՝ ԶԼՄ–ների մասին օրենքում փոփոխություններ կատարելու մասին նախագծին:

 Պատգամավորի դիտարկմամբ՝ նախագծով փորձ է արվում «անանուն աղբյուր հասկացությունը ծածկել».

«Չնույնականացվող աղբյուր հասկացության տակ ընդգրկվում է համացանցում գրանցված դոմեյնը, հոսթինգ ունեցող կայքը կամ համացանցային կայքի օգտահաշիվը, որի պարագայում անհրաժեշտ է նույնականացման տվյալներ, ընդհուպ՝ անուն ազգանուն, բնակության վայրը և այլն, եթե նույնականացման թվյալները բացակայում են կամ թերի են, ապա այս դեպքում այն չնույնականացվող աղբյուրն է համարվելու, և լրատվամիջոցը, որը հղում կանի չնույնականացվող աղբյուրին, որևէ կերպ չի ազատվելու պատասխանատվությունից»,-ասաց Էլինար Վարդանյանը:

Պատգամավորի խոսքով՝ նախագծով նախատեսվում են նաև լրատվամիջոցների հավատարմագրման կարգի հետ կապված մի շարք փոփոխություններ.

«Ֆինանսական հաշվետվության հետ կապված կարգավորում են նախատեսում: Ինձ համար սա մի փոքր անհասկանալի էր , այսպես թե այնպես, լրատվամիջոցները ֆինանսական հաշվետվություն ներկայացնում էին, լրացուցիչ հոդվածով լրատվամիջոցների ֆինանսական հաշվետվություն ներկայացնելու պարտականությանը ծանրաբեռնելու բուն նպատակը չգիտեմ՝ որն է»,-ասաց Էլինար Վարդանյանը:

Աղբյուր` Փաստինֆո