Փաստ ինֆո

Զոհված և անհետ կորած զինծառայողների ծնողներն ակցիա են իրականացնում ՀՀ ՔԿ Զինվորական քննչական գլխավոր վարչության շենքի դիմաց։ Նախնական պայմանավորվածության համաձայն՝ ծնողներն այսօր պետք է հանդիպում ունենային նաև ՔԿ նախագահ Արգիշտի Քյարամյանի հետ, սակայն վերջինս չէր եկել հանդիպման, ուստի, ծնողները հրաժարվել են այլ պաշտոնյայի հետ հանդիպումից, քանի որ պահանջում են Քյարամյանի մասնակցությունը։ 

Ծնողներից մեկը «Փաստինֆո»-ի հետ զրույցում ասաց, որ արդեն անցել է մեկ տարի մեկ ամիս, բայց որևէ մեկն այդպես էլ պատասխանատվության չի ենթարկվել։

«Փաստորեն դուրս է գալիս, որ մեր երեխեքն են երևի մեղավոր, որ զոհվեցին»,-նշեց նա՝ հավելելով, որ գլխավոր մեղավորներին ոչ ոք չի ցանկանում բացահայտել։

Նա հայտնեց, որ ցանկանում են Արգիշտի Քյարամյանի ներկայությունը, որ վերջինս տեսնի, թե իր կառույցում ինչ է կատարվում. «Եթե մինչ օրս տեղյակ չէ, թե իր կառույցում ի՞նչ է կատարվում, ուզում ենք բացել իր աչքերը։ Չենք կարծում, որ ինքն այդքան էլ տեղյակ չէ, ուղղակի հրամաններ են կատարում։ Իրենք պետք է անուններ տան, թե ովքեր են խանգարում գործերի բացահայտմանը։ Եթե չեն ուզում բացահայտել, մենք կբացահայտենք։ Գիտենք մեղավորներին, հատ առ հատ կգնանք իրենց հասցեներով ու պատիժները կլինի ավելի դաժան»։

Աղբյուր` Փաստինֆո