Փաստ ինֆո

Իշխանությունները հերթական գործիքակազմն են մշակել իրենց համար անցանկալի համայնքապետերից ազատվելու համար:

Այսպիսով՝ խորհրդարանում այսօր քննարկվեց կառավարության հեղինակած «Տեղական ինքնակառավարման մասին» օրենքում փոփոխություն կատարելու վերաբերյալ նախագիծը, համաձայն որի՝ համայնքի ղեկավարի կողմից պարտականությունների կատարումը 1 ամիս անհնար լինելու դեպքում նրա պարտականությունները կփոխանցվեն համայնքապետին:

Նախագիծը ԱԺ Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի այսօրվա նիստում դրական եզրակացություն ստացավ, առաջիկայում այն կընդգրկվի նաև ԱԺ քառօրյա նիստերի օրակարգ:

Հատկանշական է, որ իշխանությունը նման նախագծի քննարկման անհրաժեշտություն տեսել է հատկապես հոկտեմբերի 17-ի ՏԻՄ ընտրություններից հետո, որի արդյունքում երեք խոշոր համայնքներում պարտություն կրեց իշխող ՔՊ-ն, հատկապես ջախջախիչ պարտություն կրեց Գորիսում, որտեղ կրկնակի ձայներով ՔՊ-ական թեկնածուին հաղթեց կալանքի տակ գտնվող Առուշ Առուշանյանը:

«Հայաստան» խմբակցության պատգամավոր Աշոտ Սիմոնյանը, որը հանդիսանում է նաև Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովի անդամ, մեզ հետ զրույցում պարզաբանեց, որ պարտականությունների կատարման անհնարինությունն առնչվելու է ինչպես հիվանդության, երկրից բացակայելու դեպքերին, այնպես էլ այն դեպքերին, երբ համայնքապետը գտնվելու է կալանքի տակ:

Ճշգրտող հարցին՝ օրենքի նախագիծը կարո՞ղ է առնչվել օրինակ Գորիսի համայնքապետ Առուշ Առուշանյանին, պատգամավորը պատասխանեց.

«Այո, նրա պարտականությունները կարող են փոխանցվել տեղակալին»

Աշոտ Սիմոնյանը մեզ հետ զրույցում ընդգծեց, որ նախագծում քաղաքական կոմպոնենտն ակնհայտ է.

«Քաղաքական կոմպոնենտը միշտ էլ կա: Այսօր հիմնական նախագծի զեկուցողն էլ չբացառեց այդ քաղաքական կոմպոնենտի առկայության փաստը:

Հանուն արդարության պետք է ասենք, որ այդ քաղաքական կոմպոնենտը միշտ է եղել, բայց եթե մենք ուզում ենք ինչ-որ բան շտկել, պետք է մոռանանք, որ նախկինում եղել է, հիմա պետք է շարունակվի:Քաղաքական իշխանությունն անում է գործընթաց, որի մեջ կան քաղաքական կոմպոնենտներ»,-ասաց նա:

Հարցին՝ նախագիծն ունի՞ հետադարձ ուժ, վերջինս պատասխանեց.

«Իրավական ակտերը սովորաբար հետադարձ ուժ չունեն»:

«Փաստինֆո»-ն զրուցեց նաև Գորիս համայնքի ղեկավարի տեղակալ Մենուա Հովսեփյանի հետ, վերջինս էլ « իշխանության համար ավելի շահավետ առաջարկությամբ հանդես եկավ».

«Ես կառաջարկեմ իշխանություններին այդ օրինագիծն խորհրդարան մտցնելու փոխարեն, ուրիշ օրինագիծ ներկայացնեն, որ համայնքապետերը և համայնքի ավագանին այլևս չընտրվի ժողովրդի կողմից, այլ նշանակվի վարչապետի կողմից ու վերջացնենք այս ամեն ինչը»,-ասաց Հովսեփյանը:

Փոխքաղաքապետի խոսքով՝ իշխանությունները պատրաստ են ամեն քայլի՝ «բացի նորմալ մրցակցային պայմաններում հաղթելը և պարտվելը»:

Մեզ հետ զրույցում Մենուա Հովսեփյանը նաև վստահություն հայտնեց, որ Գորիսի համայնքապետ Առուշ Առուշանյանը շուտով ազատության մեջ կլինի, ուստի պարտականությունների կատարման անհնարինության խնդիր չի առաջանա.

«Առուշ Առուշանյանը դեռևս հանդիսանում է Գորիս համայնքի ղեկավար, ինքն ընտրվել է 2017 թ-ին և իր պարտականությունները կատարելու է մինչև 2021թ-ը: Այսպես` թե այնպես, համայնքի ղեկավարը, երբ լիազորությունների կատարման անհնարինություն ունի, ապա իր պարտականությունները կատարում է տեղակալներից որևէ մեկը, ում ինքը հարմար է գտնում:Երկրորդ՝ մենք համոզված ենք, որ Առուշ Առուշանյանը մոտ օրերս կլինի ազատության մեջ և կշարունակի պաշտոնավարումը, քանի որ որևէ հիմք չի կարող լինել իրեն անազատության մեջ պահելու համար » ,-մեզ հետ զրույցում ասաց փոխքաղաքապետը:

Աղբյուր` Փաստինֆո