Փաստ ինֆո

Կամավոր ատեստավորման համար դիմել էր 1372 ուսուցիչ, որոնցից ատեստավորման գործընթացին մասնակցել է 996-ը։ Կառավարության նիստի ժամանակ ասաց ՀՀ ԿԳՄՍ նախարար Վահրամ Դումանյանը։

Նախարարի խոսքով կամավոր ատեստավորմանը մասնակցած 996 ուսուցչից 468-ն ըստ գիտելիքների ստուգման արդյունքում ստացած միավորների՝ կստանա 30, 40 կամ 50 տոկոս հավելավճար։

«Ուսուցչի մեկ դրույքի միջին աշխատավարձը կազմում է շուրջ 125 հազար դրամ։ Այսպիսով, 30 տոկոս հավելավճար ստացող ուսուցիչների աշխատավարձը կբարձրանա շուրջ 37 հազար դրամով, 40 տոկոս ստացածներինը՝ 50 հազար դրամով, իսկ 50 տոկոս ստացածներինը՝ 61500 դրամով»,-ասաց Վահրամ Դումանյանը։

Վերջինս հավելեց, որ այս փուլում կամավոր ատեստավորմանը մասնակցել են 7-12-րդ դասարաններում դասավանդող ուսուցիչները՝ 7 առարկաների գծով, այդ թվում հայոց լեզու և գրականություն, հայոց պատմություն, հանրահաշիվ, երկրաչափություն, ֆիզիկա, քիմիա, կենսաբանություն և աշխարհագրություն։

ՀՀ վարաչապետ Նիկոլ Փաշինյանը նկատեց՝ ստացվում է, որ 528 ուսուցիչ ատեստավորումը չի անցել։

Նախարարը նշեց, որ ամենաբարձր ցուցանիշը գրանցվել է մաթեմատիկա առարկայից, ատեստավորմանը մասնակցած ուսուցիչների 87 տոկոսը հաղթահարել է շեմը։ Հաջորդ լավ արդյունքը գրանցվել է ֆիզիկա առարկայից, այնուհետև հայոց լեզու առարկայից։

«Ամենացածր ցուցանիշը գրանցվել է քիմիա առարկայից՝ 11 տոկոս և աշխարհագրություն առարկայից՝ 20 տոկոս»,-ասաց Վահրամ Դումանյանը։

Աղբյուր` Փաստինֆո