Փաստ ինֆո

ՀՀ քննչական կոմիտեի զինվորական վարչության շենքի դիմաց էին հավաքվել անհետ կորած և զոհված զինածառայողների հարազատները, պահանջում էին հանդիպել ՔԿ նախագահ Արգիշտի Քյարամյանի հետ։

Զինծառայողներից մեկի հարազատը՝ Սամվելը «Փաստինֆո»-ի հետ զրույցում նշել է, որ այլևս չեն հավատում ոչ մի պաշտոնյայի խոսքին։ Կարծում են, բոլորն էլ մեղավոր են։

«Դուք էսքան ժամանակ լսե՞լ եք, որ ինչ-որ մեկին դատեն, ասեն՝ էս մարդը մեղավոր է 10 կամ 20 երեխու համար։ Ոչ մեկին մինչեւ հիմա չեն դատել։ Քյարամյանը չկա, իր ենթականերին ասել է՝ լիազորում եմ, իմ տեղը հանդիպեք, բայց հասարակ քննիչը մեզ ի՞նչ պատասխան պիտի տա»,- ասաց Սամվելն ու տեղեկացրեց, որ պահանջում են գտնել գոնե մի քանի մեղավորների, քանի որ պատերազմի սկզբից անցել է մեկ տարի ու այս ընթացքում տարբեր գերատեսչությունների դռներ են թակել։

«Մեր երեխեքը երբ կռվի են բռնվել, մոտ երկու ժամ կռվել են։ Իրենց լեյտենանտն ասել է, թե փամփուշտ չկա, գնում է փամփուշտի հետեւից, այսինքն՝ փախել է։ Երեխեքը ասել են՝ բայց մագազինների մեջ փամփուշտ կա, ո՞ւր եք գնում, ասել է՝ չէ, չէ, պիտի գնամ դրանց հետևից։ Հիմա էդ լեյտենանտը գնացել է ուրիշ դիրքեր ծառայում է։ Ես իրենց հրամանատարին երբ տեսա, ասացի՝ ինչի եք այս լեյտենանտին տարել մեկ այլ տեղ, մեկ է էլի փախնելու է»,- ասաց նա։

Սամվելի խոսքով՝ երեխաները կռվել են հանուն հայրենիքի, իսկ հիմա պատերազմի դրվագները չեն բացահայտվում։ Իրենց ասել են, թե 2000 գործ կա՝ դավաճանների, երեխաներին խաբողների, սխալ հրաման տվողների մասին, բայց մեկ տարի ու մեկ ամիս է անցել, պատժված որևէ մեկի անունը չեն լսել։

«Այսօր մի հերոս տղա ունենք, որ ոնց որ թուրքերն են վերաբերվել մեր երեխեքի հետ, ինքն էլ մի հատ թուրքի գլուխ է կտրել ու հիմա ուզում են 18 տարուց մինչև ցմահ բանտարկեն, բայց մենք ունենք հազարավոր մարմիններ, որ բերել ենք ու ոչ մեկի գլուխը չի եղել։ Ինքը որբ երեխա է եղել, հայրենիքի համար կռվել է ու էսօր մենք դատում ենք։ Դե բերեք մնացածներին էլ դատենք։ Իմ տղայի զամպալիտ դիվիզիան հարցնում ա՝ Սաքոյից խաբարություն չունե՞ս։ Ես Հայաստանից պիտի գնայի տեղեկացնեի, թե որտե՞ղ է իմ տղան։ Ես զանգել եմ հրամանատարին, խնդրել, աղաչել եմ, որ գնանք մարմինները հանենք, ինքը ասում է՝ սխալ հասցեով եք զանգել»։

Սամվելի տեղեկություններով՝ հրամանատարի սխալ հրամանների պատճառով վեց զոհ են ունեցել, մյուսները փախել են մինչև Կարմիր Շուկա։ Զինծառայողի հարազատը նշեց, որ երեխաները «Ես եմ» ծրագրով ծառայողներ են եղել՝ 2 տարի 6 ամիս են ծառայել։ Կարմիր Շուկա հասնելուն պես, հոկտեմբերի 17-ին, ռազմական ոստիկանները նրանցից վեցին ձերբակալել են, յոթ օր ծեծել ու տանջել են՝ տեղեկություն ստանալու համար։

Մանրամասները՝ տեսանյութում

Աղբյուր` Փաստինֆո