Փաստ ինֆո

Այսօր առավոտյան Երևան-Գյումրի ավտոճանապարհին ուղևորատար «ԳԱԶԵԼ»-ը կողաշրջվել էր։ Ողբերգական ավտովթարի հետևանքով երթուղայինի վարորդը և նույն ավտոմեքենայի չորս ուղևոր մահացել են, իսկ 17-ը՝ տարբեր աստիճանի վնասվածքներով տեղափոխվել են հիվանդանոց։ Արագածոտնի մարզային քննչական վարչությունում հարուցվել է քրեական գործ։ Քննչական կոմիտեից «Փաստինֆո»-ի հետ զրույցում հայտնեցին, որ դեպքի վայրի զննությամբ պարզվել է, որ տվյալ վայրում ճանապարհաշինարարական աշխատանքներ իրականացնելիս չի պահպանվել անվտանգության կանոնները, ինչն էլ, ըստ նախնական տվյալների, կարող էր վթարի պատճառ դառնալ։

Տարածվել է նաև ՀՀ քննչական կոմիտեի հաղորդագրությունը, որը ներկայացնում ենք ստորև.

«2021թ. հոկտեմբերի 20-ին՝ ժամը 07:00-ի սահմաններում, Գյումրի քաղաքի 59-ամյա բնակիչն իր վարած ուղևորատար «ԳԱԶԵԼ» մակնիշի ավտոմեքենայով դեպի Երևան ընթանալիս, Երևան-Գյումրի ավտոճանապարհի 51-րդ կմ-ի հատվածում, ավտոմեքենան դուրս է բերել ճանապարհի երթևեկելի գոտուց աջ և կողաշրջվել, որի հետևանքով վերջինս և նույն ավտոմեքենայի չորս ուղևոր մահացել է,  ևս 17-ը, տարբեր մարմնական վնասվածքներով, տեղափոխվել են բժշկական կենտրոններ:

Դեպքի վայրի զննությամբ պարզվել է, որ Երևան-Գյումրի ավտոճանապարհի 51-րդ կմ-ի շրջադարձային հատվածում իրականացվող ճանապարհաշինարարական աշխատանքների ընթացքում չեն ապահովվել անվտանգության կանոնները։

Դեպքի առթիվ ՀՀ քննչական կոմիտեի Արագածոտնի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 242-րդ հոդվածի 3-րդ մասով և 230-րդ հոդվածի 2-րդ մասով:

Կատարվում են քննչական և դատավարական այլ գործողություններ՝ դեպքի բոլոր հանգամանքները պարզելու ուղղությամբ:

Նախաքննությունը շարունակվում է»,-ասված է հաղորդագրության մեջ:

Աղբյուր` Փաստինֆո