Փաստ ինֆո

Մենք այստեղ չենք եկել արցունքներ սրբելու կամ հուզվելու։ Եթե մտավոր ունակությունների հետ կապված խնդիր ունեք, բարձրաձայնեք։ Այս մասին պետական դավաճանության գործով դատական նիստին ասել է նախագահող դատավոր Գագիկ Պողոսյանը՝դիմելով ամբաստանյալին։ 

Նշենք, որ Երևանի ընդհանուր իրավասության դատարանում՝ դատավոր Գագիկ Պողոսյանի նախագահությամբ, այսօր կայացել է պետական դավաճանության գործով դատական նիստը։ Սույն գործի շրջանակներում ամբաստանյալի աթոռին են երիտասարդ ամուսիններ՝ Մայիս Սահակյանը և Ստելլա Սարգսյանը։

Թեև գործն արդեն տևական ժամանակ է, ինչ դատարանում է, սակայն այն դեռեւս գտնվում է դատաքննության նախապատրաստման փուլում։ Այսօրվա նիստին նախագահող դատավորն ամբաստանյալներից փորձեց պարզել՝ նախաքննության ընթացքում իրենց իրավունքներն ու պարտականությունները քննիչը բացատրել է, թե ոչ, ինչին ի պատասխան Ստելլա Սարգսյանը նշեց, որ իրեն չեն ծանոթացրել իր իրավունքներին։ Դատավորի դիտարկմանը, որ քրեական գործում առկա են փաստաթղթեր, որ քննիչի կողմից բացատրվել են մեղադրյալների իրավունքներն ու պարտականությունները, Ստելլա Սարգսյանն արձագանքեց. «Ես չեմ հասկացել, ընդամենը թուղթ է եղել, որի տակ գրված է եղել»։ Ինչ վերաբերում է դատարանի կողմից ամբաստանյալին ուղարկված հուշաթերթիկին՝ ամբաստանյալի իրավունքների և պարտականությունների վերաբերյալ, ամբաստանյալը նշեց, որ իր համար հասկանալի չէր։

Դատավորի ճշգրտող հարցին, թե ինչը չի հասկանում, ինքը կբացատրի՝ Սարգսյանը պատասխանեց, որ ամեն գրած տողը չի հասկացել, բացարձակ ոչինչ չի հասկացել։

«Եթե Դուք կարդում և չեք հասկանում, հիմա այդ նույն բանը ես պետք է կարդամ Ձեզ համար, հասկանալու՞ եք»,- նշեց Պողոսյանը, ապա, դիմելով պաշտպան Տաթևիկ Հակոբյանին հետաքրքրվեց, թե ինչ նկատի ունի ամբաստանյալը՝ ընդգծեցելով, թե որոշակի վրդովմունք է տեսնում։

Փաստաբանը հայտնեց, որ անհրաժեշտության դեպքում, եթե որևէ անհասկանալի բան մնացած լինի, ինքը կբացատրի իր պաշտպանյալին, ապա ավելացրեց, որ նա պարզապես մի փոքր հուզված է, ինչից հետո ամբաստանյալը սկսեց արտասվել։

«Մենք չենք եկել այստեղ արցունքներ սրբելու կամ հուզվելու, ամբաստանյա՛լ։ Ես ընդամենը շատ նորմալ հարց եմ տալիս՝ հիմա, եթե ես կարդամ Ձեր իրավունքները և պարտականությունները, հասկանալու՞ եք։ Եթե խնդիր ունեք հասկանալ-չհասկանալու, մտավոր ունակությունների հետ կապված՝ բարձրաձայնեք, որոշենք, թե ինչ անենք»,- դիմելով ամբաստանյալին ասաց դատավոր Գագիկ Պողոսյանը, ինչին ի պատասխան Սարգսյանն ասաց, որ ունի խնդիրներ։

Ամբաստանյալ Մայիս Սահակյանը, որը Սարգսյանի ամուսինն է, դատավորից խնդրեց, որ իրեն հնարավորություն տա՝ կնոջ հետ խոսելու, ինչից հետո դատավորը նիստն ընդմիջեց. «Հանգստացրե՛ք»։

Ընդմիջման ավարտից հետո պաշտպանության կողմը միջնորդություն ներկայացրեց՝ դատավարությունը դռնփակ ռեժիմով անցկացնելու համար, ինչը բավարարվել է։

Ըստ մեղադրանքի՝ Մայիս Սահակյանը՝ կնոջ՝ Ստելլա Սարգսյանի օժանդակությամբ, լրտեսության, ռազմական բնագավառում պետական և ծառայողական գաղտնիքի շարքին դասվող տեղեկություններ հավաքելու ու հանձնելու, ինչպես նաև թշնամական գործունեություն իրականացնելու համար օտարերկրյա կազմակերպության ներկայացուցչին այլ օգնություն ցույց տալու եղանակով կատարել է պետական դավաճանություն՝ ի վնաս Հայաստանի Հանրապետության տարածքային անձեռնմխելիության և արտաքին անվտանգության: Ինչ վերաբերում է Ստելլա Սարգսյանին, ապա նրան մեղադրանք է առաջադրվել ամուսնուն օժանդակելու հատկանիշներով, մասնավորապես, ըստ մեղադրանքի, Սարգսյանն ամուսնու՝ Մայիս Սահակյանի կողմից, լրտեսության, ռազմական բնագավառում պետական և ծառայողական գաղտնիքի շարքին դասվող տեղեկություններ հավաքելու ու հանձնելու, ինչպես նաև թշնամական գործունեություն իրականացնելու համար օտարերկրյա կազմակերպության ներկայացուցչին այլ օգնություն ցույց տալու եղանակով պետական դավաճանություն կատարելուն օժանդակելու դիտավորությամբ, տրամադրել է անհրաժեշտ միջոցներ, ինչպես նաև վերացրել է այդ կապակցությամբ առկա խոչընդոտները:

Հեղինակ՝ Իզաբել Սահակյան

Աղբյուր` Փաստինֆո