Փաստ ինֆո

Սևանի ձկնորսների այսօրվա ըմբոստացումը ժողովրդական առակների և ասացվածքների բազմաթիվ օրինակներ հիշելու առիթ է տալիս։ Իրականում, մարզերում շատ ակտուալ է դառնում և դեռ դառնալու՝ «Ճտերն աշնանն են հաշվում» ասացվածքը։

Ընդ որում, եթե Գորիսում /կարծում ենք՝ նաև Կապանում նույն կերպ կլինի/՝անվտանգային խնդիրներով պայմանավորված՝ տեղացիները ՏԻՄ ընտրություններում վերանայումներ կատարեցին՝ ձայն չտալով խոստումներ տված և չկատարած իշխանության ներկայացուցիչներին՝ ընտրելով մարտիկի տեսակը, այսինքն, համայնքային ընտրության ենթատեքստը քաղաքական էր, ապա՝ Գեղարքունիքի մարզում Սևանի ձկնորսների սկսած բողոքի ակցիան՝ այսօր նրանք փակել էին Երևան-Սևան մայրուղին՝ նախևառաջ սոցիալական էր։

Նորություն չի՝ այս տարածաշրջանում ապրող ընտանիքներն իրենց ապրուստի հիմնական միջոցը հայթայթում են ձկնորսությամբ։ Եվ ձկնորսության արգելքի դեմ դուրս եկած ձկնորսների բողոքն արդարացված է, քանի որ մարզի բնակիչների համար աշխատանքային պայմաններ չստեղծելով հանդերձ՝ նրանց զրկում են իրենց իսկ ապրուստի միջոցից։ Ակցիայի մասնակիցների թիրախում իրենց խոսքով՝ տվյալ թեմայից անտեղյակ բնապահպանության նախարարն է, որը, նրանց բնորոշմամբ՝գործից չհասկանալով կամայական որոշումներ է ընդունում։ Բայց խոշոր հաշվով՝ նրանց կռիվը վարչապետի հետ է, քանի որ իրենք ԱԺ ընտրություններին նրան են ձայն տվել՝ «լավ կյանքի» արդյունք ակնկալելով։ Այսինքն, նրանք պարտություն արձանագրած և կապիտուլյացիոն պայմանագիր ստորագրած Փաշինյանի քաղաքական ուժին կրկին վստահության քվե էին տվել։ ՈՒ հիմա, ըստ ամենայնի, իրենց արածի վերագնահատման փուլում են։

Իշխող ուժին վստահության «քվե տալու» պատմությունը, տարբեր տեղատարածքներում՝ ելնելով մարզի և բնակչության առանձնահատկություններից՝ որքան էլ տարբեր լինի, առկա է մեկ ընդհանուր մոտիվ, այն է՝ մարզաբնակների համար եկել է ճտերը հաշվելու, բերքահավաքի, արդյունքների ամփոփման ժամանակը, որն, ի դեպ, ներկա իշխանության օգտին չէ։

Նկատենք, որ հանրապետության մեկ այլ՝ Շիրակի մարզում երաշտի և չհաշվարկված ջրտուքի հետևանքով անջրդի մնացած կարտոֆիլի որակական հատկանիշներին և գնային թռիչքաձև աճի փաստին /ընդհանրապես՝ ամենօրյա սպառման ապրանքների աննախադեպ գնաճին/՝ արդեն իսկ բոլորս ենք բախվում։ Իսկ կարտոֆիլը շատ ընտանիքների համար ամենօրյա սնունդ է։

Բնականաբար, վերը նշված խնդիրները կաթիլ են այն բազմաթիվ պրոբլեմների շարքում, որին բախվում են ՀՀ և Արցախի ժողովուրդը, պարզ քաղաքացիները։ Այս հարցերի մի զգալի մասը չէր լինի, եթե պետական կառավարման համակարգը նորմալ հունով աշխատեր, մինչդեռ այն արդեն մի քանի տարի է պարալիզացված վիճակում է։

Բնականաբար, սոցիալական բունտի կորն առաջիկայում ավելի է բարձրանալու։

Զուգահեռաբար, սահմանամերձ մարզերում այն ուղեկցվելու է նաև անվտանգային խնդիրների սաստկացմամբ։ Թշնամու կողմից սահմանային միջադեպերը, սահմանախախտումները և այս տարվա մայիսից ի վեր քայլ առ քայլ ՀՀ տարածքի մեջ թուրքադրբեջանական տանդեմի խորանալու, կեղծ խաղաղասերի դիմակ հագած ՀՀ իշխանության կամոք, առանց զենքի, մեր ռազմավարական բարձունքներին տիրանալու հետևանքը ե՞րբ է անմիջականորեն զգալու մայրաքաղաքի բնակիչը, ե՞րբ է ողջ ազգը համակվելու ազգային անվտանգությունն իբրև թիվ մեկ առաջնահերթություն դիտարկելուն, առաջիկայում արդեն շոշափելի և տեսանելի կլինի։

Հեղինակ՝ Ա․Ե․

Աղբյուր` Փաստինֆո