Փաստ ինֆո

Շուրջ երկու ամիս է Կապանի շրջանի սահմանամերձ դարձած Շիկահող գյուղը չունի վարչական ղեկավար։ Նախկին վարչական ղեկավարը՝ Նարե Ղազարյանը, պաշտոնավարել է 5 տարի ու 2021-ի սեպտեմբերի երկուսին վայր դրել իր լիազորությունները՝ հայտարարելով, որ այլևս չի զբաղեցնում այդ պաշտոնը։

«Փաստինֆո»-ի հետ զրույցում որոշման պատճառները չհայտնեց՝ նշելով, անպայման կմեկնաբանի ավելի մանրամասն, երբ ժամանակը գա։

«Քաղաքական այսպես ասած իրավիճակներից ելնելով այդպես եմ ճիշտ գտել։ Ինքնակամ եմ հեռացել, երբ այնպիսի հարցեր են առաջացել, որ իմ սրտով չի եղել ու ես որոշել եմ, որ այլևս չպետք է ղեկավարեմ»։

Հարցին՝ արդյոք քաղաքական ճնշումներ եղե՞լ են՝ Ղազարյանն ասաց, որ որպես այդպիսին ճնշումներ չեն եղել ու չցանկացավ դա էլ մեկնաբանել։

Փաստացի՝ Շիկահող գյուղը հիմա չունի ղեկավար։

«Այս պահին հատուկ որոշում կայացնող չկա։ Երկու ամիս է լրանում, որ ես այլևս վարչական ղեկավար չեմ։ Թե ինչո՞ւ գյուղը չունի ղեկավար՝ չեմ կարող ասել»։

Փորձեցինք տեղեկանալ՝ արդյոք որոշումը կապ ունի՞ նաև սահմանների ու անվտանգության հետ։ Մասնավորապես, «Հայաստան» խմբակցության պատգամավոր Վահե Հակոբյանը հայտնել էր, որ Շիկահող, Սրաշեն, Ճակատեն հատվածներում խնդիր կա: Ադրբեջանական զինված ուժերը՝ չհանդիպելով որևէ դիմադրության, քայլելով գալիս են առաջ: Պատգամավորը ենթադրել է, որ կկորցնենք նաև Շիկահողի դիմացի բարձունքը։ Ղազարյանը նշեց, որ պատերազմական ամենալուրջ պահերին շիկահողցիները ինքնապաշտպանվել են, պահպանել են սահմանները ու անվտանգության մասին հարցերը չէր կարող վախեցնել իրեն։

Նրա փոխանցմամբ՝ պատգամավորի հայտնած մտահոգությունների մասին որեւէ այլ պաշտոնական տեղեկություն չունեն ու նրանից են առաջին անգամ լսել, իսկ այսօր արդեն բազմաթիվ բնակիչներ են  զանգել ու փորձել իրենից ճշտել, թե ինչ է կատարվում։

Ղազարյանը չբացառեց, որ գուցե ինչ-որ գործընթացներ կան, որոնց մասին իրենք դեռ տեղյակ չեն, սակայն նշեց, որ այս պահին սահմաններում իրավիճակը հանգիստ է. Հայ եւ ադրբեջանցի սահմանապահները կանգնած են դեմ դիմաց, իսկ ռուս սահմանապահներն էլ իրենց հատվածում։

Աղբյուր` Փաստինֆո