Փաստ ինֆո

Գազի գնի շուրջ բանակցություններն անընդհատ շարունակվող պրոցես է. ՀՀ փոխվարչապետ Մհեր Գրիգորյանը լրագրողների հետ զրույցում անդրադարձել է սահմանին գազի գնի և ՀՀ տարածքում գործող սակագնին։

«ՀՀ տարածքում գործող սակագնի հետ կապված մենք կոնսենսուս ունենք։ 2019 թվականից ծանր ու երկարատև բանակցությունների մեջ ենք եղել, կարծում եմ, բավականին խորը քննարկել ենք այդ հարցը ու որոշակի իմաստով համաձայնեցրել ենք»,- հայտարարեց Գրիգորյանը՝ մանրամասնելով, թե գլովբալ առումով ինչ խնդիր ունեն «Գազպրոմ» խմբի հետ։

2013 թվականի համաձայնագրի հիման վրա կառուցվել է 5-րդ էներգաբլոկը, որը ջերմակայան է, որը հիմա չի աշխատում։ Միևնույն ժամանակ, բոլոր ներդրումները, որ իրականացվում են Հայաստանում «Գազպրոմ» խմբի կողմից, նույն թվականի համաձայնագրի ուժով պետք է ունենան տարեկան շուրջ 9 տոկոս եկամտաբերություն։

«Բնականաբար, կայանի կառուցումը լուրջ ու խոշոր ներդրում է, բայց դա այսօր չի գեներացնում այն հասույթը, որը կապահովի այն եկամտաբերությունը, որը պայմանավորված է 2013-ի համաձայնագրով, այդ հարցը մնացել է օրակարգում ու շարունակվում է քննարկվել»։

Փոխվարչապետի խոսքով, եթե հաջողվի այդ հարցին լուծում գտնել, ապա մենք կունենանք շատ կայուն իրավիճակ գազի գնի հետ կապված։

«Չնայած, որ աշխարհում գինն առնվազն 940 դոլարի է հասել, մեր 165-ի պարագայում, բայց, նույնիսկ այդ դեպքում, խնդիրներ չեն առաջանալու մոտակա տեսանելի ժամանակահատվածում, եթե մեզ հաջողվի 5-րդ էնեգաբլոկի հետ կապված լուծումներ գտնել ու աշխատանքի այնպիսի օպտիմալ ռեժիմ գտնել, որը կապահովի 2013 թվականի համաձայնագրից բխող տրամաբանությունը», - ասաց փոխվարչապետը։

Աղբյուր` Փաստինֆո