Փաստ ինֆո

Համապետական և ՏԻՄ ընտրությունները իրարից 180 աստիճանով տարբերվում են: Այն տրամաբանությունը, որը գործում է համապետական ընտրությունների ժամանակ, ՏԻՄ ընտրությունների պարագայում չի գործում, այստեղ այլ օրենքներ են:«Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով կիրակի օրը տեղ ունեցած ՏԻՄ ընտրությունների արդյունքներին:

Քաղտեխնոլոգի արձանագրմամբ՝ եթե համամասնական ընտրությունների ժամանակ գործում էր նախկին-ներկա գործոնը , ապա համայնքներում ընտրությունների ժամանակ գործում է «մեր քաղաքի տղա, մեր գյուղի տղա, մեր համար ընդունելի տղա» հասկացությունները:

Գորիսում կայացած ՏԻՄ ընտրությունների արդյունքում՝ կալանքի տակ գտնվող Առուշ Առուշանյանը ջախջախիչ հաղթանակ տարավ ՔՊ-ական թեկնածու Վլադիմիր Աբունցի նկատմամբ:

Զրուցակցի արձանագրմամբ՝ Գորիսում պայքարն իրականում Առուշ Առուշանյանի և Նիկոլ Փաշինյանի միջև է ընթացել,նրանցից առաջինն ասոցացվել է «պայքարող հերոսի», իսկ մյուսը՝ «կապիտուլյացիայի» հետ.

«Պայքարը չէր գնում ՔՊ-ի թեկնածուի և «Առուշ Առուշանյան» դաշինքի միջև, պայքարը Առուշ Առուշանյանի և գործող վարչապետի միջև էր, այսինքն՝ հերոսի և կապիտուլյանտի, բնականաբար, ընտրությունը եղավ հօգուտ հերոսի»,-ասաց զրուցակիցը:

Ըստ փորձագետի՝ ՔՊ-ն ՏԻՄ ընտրությունների դեպքում չկարողացավ կիրառել նախկին- ներկա իր հայտնի գործիքակազմը, քանի որ ընտրություններին «Առուշ Առուշանյան» դաշինքն էր մասնակցում, այլ ոչ՝ «Հայաստանը»:

ՏԻՄ ընտրությունները հատկապես լարված անցան Գորիսում:

Ընտրություններին ընդառաջ Գորիս էին բերվել ոստիկանական մեծաթիվ ուժեր, բերման ենթարկվեցին «Առուշանյան» դաշինքի անդամները, խուզարկություն իրականացվեց դաշինքի շտաբում, իսկ ինքը՝ դաշինքը գլխավորող Առուշ Առուշանյանը ողջ քարոզարշավի ժամանակ եղել է կալանավայրում:

Փորձագետի գնահատմամբ՝ սա իշխանության կողմից վարչական ճնշման փորձ էր, որպեսզի ժողովուրդը վախենա և քվեարկի իշխանության թեկնածուի օգտին, սակայն այս մեթոդը հակառակ ձևով աշխատեց, ավելի զայրացրեց մարդկանց և քվեարկեցին հօգուտ Առուշ Առուշանյանի:

Գյումրիում «Քաղաքացիական պայմանագիր» կուսակցությունը պարտվել էր գործող քաղաքապետի գլխավորած «Բալասանյան դաշինքին»: Գյումրիում ՔՊ թեկնածուն Շիրակի մարզպետ Հովհաննես Հարությունյանը:

Անդրադառնալով Գյումրիում տեղի ունեցած ընտրության արդյունքներին՝քաղտեխնոլոգն արձանագրեց, որ եթե Գորիսում ընդգծված քաղաքական ընտրություն էր, ապա Գյումրիում ապաքաղաքական ընտրություն էր.

«Գյումրիում պատկերը հետևյալն էր՝ մարդ, որը կարողանում է քաղաք ղեկավարել, և մարդ, որը քաղաքի կառավարումից բան չի հասկանում: Բնականաբար ձայնը տրվեց հօգուտ «Բալասանյան դաշինքի», որովհետև նրա աշխատանքը տեսել են, իսկ ՔՊ-ական թեկնածուն որևէ բանով աչքի չի ընկել, ընդամենը վարչապետի ընկերն է , դրա համար էլ պաշտոն է ստացել: Այս դեպքում ոչ մի բանը մրցում էր ինչ-որ գործ արած թեկնածուի հետ»,-ասաց Արմեն Բադալյանը:

Ինչ վերաբերվում է Մեղրիում գրանցած արդյունքներին, որտեղ հաղթել էր «Հանրապետություն» կուսակցության թեկնածուն, քաղտեխնոլոգը նկատեց, որ այդ կուսակցությունը հաղթեց ոչ թե այն պատճառով, որ Մեղրիում այդ ուժը մեծ ազդեցություն ունի, այլ այն պատճառով, որ այդ ուժը արևմտամետ ուժ է.

«Սյունիքում որոշակի գործընթացներ կան, որոնք կապված են ամերիկյան ազդեցության հետ՝ ճանապարհներ բացել, միջանցքներ տրամադրել և այլն, որոնք տեղավորվում են ամերիկյան գործընթացներում: Բնականաբար, այս ամենը հօգուտ այդ թեկնածուի դասավորվեց»,-ասաց Արմեն Բադալյանը:

Ինչ վերաբերում է Դիլիջանում ՔՊ-ական թեկնածուի հաղթանակին, ապա զրուցակցի դիտարկմամբ՝ այս դեպքում չկար «Դիլիջանի Առուշանյանը» , բնականաբար, իշխանությունը դիմադրության չհանդիպելով անցկացրեց իր թեկնածուին:

Աղբյուր` Փաստինֆո