Փաստ ինֆո

Քաղաքականությամբ զբաղվող էլիտան պետք է հասկանա, որ երկիրը սխալ ճանապարհով է տանում։ Եթե երկրորդ քաղաքում ՏԻՄ ընտրությունների մասնակցության թիվը կազմում է 10 տոկոս, դա խայտառակություն է։ «Փաստինֆո»-ի հետ զրույցի ժամանակ ասաց ԱԺ նախկին պատգամավոր Վարդան Ղուկասյանը։

Վերջինս մեզ հետ զրույցի ժամանակ անդրադարձավ Գյումրիում տեղի ունեցած ՏԻՄ ընտրություններին։

Ինչպե՞ս եք գնահատում Գյումրիում տեղի ունեցած ընտրությունները։

Եթե երկիրն այս օրը գցողները փակում են անհատ, անկուսակցական մարդու ճանապարհը, որ չկարողանա իր թեկնածությունն առաջադրել, նշանակում է՝ նրանք հայրենիքի թշնամիներ են և չեն ուզում, որ երկիրը բնականոն զարգանա։ Պետք է մարդկանց ազատ թողնեն, չստիպեն, որ իրենց քծնվողը դառնա քաղաքապետ կամ պատգամավոր։ Պետք է թողնեն՝ ժողովուրդն իր ընտրությունն անի։ Ցավում եմ, որ այսօր այս կուսակցությունները փակում են երկրի բնականոն զարգացման գործընթացը։ Նախկին և ներկայիս նախագահները պետք է լուրջ մտածեն այդ մասին և թողնեն, որ մարդկանց մեջի այն հեղինակությունը, որին ժողովուրդը հարգում ու վստահում է, առաջ գնա։

Ստացվում է՝ նման մարդու դիմաց փակե՞լ են դռները։

Հա բա ինչ են արել։ Մեկը իմ ճանապարհը փակել են։ Արդեն քանի տարի է՝ իմ ճանապարհը փակում են։ Այսօր բնակչության 10-12 տոկոսը մասնակցել է ընտրություններին ու մարդիկ մտածում են, թե դա հաղթանակ է։ Դա խայտառակություն է։ Կուսակցություններով քաղաքապետ ընտրելը երկիրը հետ է տանում, ոչ թե առաջ։

Ուզու՞մ էիք Ձեր թեկնածությունն առաջադրել ՏԻՄ ընտրություններին։

Ես ավելի շատ ուզում եմ հանգիստ ապրել, որովհետև այս հասարակության մեջ, այս քաղաքական դաշտում չեմ ուզում գործել։ Այսինքն` հերոսին դարձնում են գող-ավազակ, պրոֆեսորին, ակադեմիկոսին, որն իրոք երկրի համար լավ բան է արել, սովորական մարդ  են համարում։ Մարդու կատարած աշխատանքը չի արժևորվում։ Պատերազմի հերոսին դարձնում են տրյապկա, էլ էս ավազակների հետ ո՞վ կարող է աշխատել։

Ամեն դեպքում պատրա՞ստ էիք անգամ այս միջավայրում առաջադրվել որպես Գյումրու քաղաքապետի թեկնածու։

Ճանապարհները փակ էին, ես ո՞նց առաջադրվեմ։ Եթե առաջադրվելու համար պետք է  մեկ կուսակցության մեջ մտնել, նշանակում է՝ այս կուսակցությունից այն կուսակցություն գնալ։ Այսինքն` այնպես են արել, որ անունս վարկաբեկեն, խայտառակեն։ Մենք եկանք, որ այս քաղաքը մեր ձեռքով կառուցենք։ Եվ իրոք կառուցեցինք։ Արյան գնով են ներկված այդ բնակարանները, բայց մեզ սարքեցին կրիմինալ, իսկ այս երկիրն ուտողները, օֆշորներում գրանցված, երկրի ամեն ինչը սեփականաշնորհած ավազակներն այսօր բարեպաշտ, մաքուր ճակատով ապրում են, մենք էլ քավության նոխազի տակ չգիտեմ ուր ենք գնում։

Ընտրություններում հաղթած քաղաքապետի թեկնածու Սամվել Բալասանյանին ինչպե՞ս եք վերաբերում։

Թույլ օղակ է էլի։ Նրան էլ են օգտագործում, առաջ գցում, հանձնարարական տալիս։ Ընտրություններին 10-12 տոկոս մասնակցությունը խայտառակություն է։ 2008-2012 թթ.-ի ՏԻՄ ընտրությունների ժամանակ միայն ես 38 հազար ձայն եմ տարել՝ առանց կաշառքի, կեղծիքի և պետական օգնության։ Դեռ մի բան էլ այն ժամանակ պետությունն ինձ դեմ էր։ Հիմա ամբողջ քաղաքից մասնակցել է 25 հազար մարդ։ 10-12 կուսակցություն է դրել իր թեկնածությունը ու մասնակցությունն ընդամենը 10-12 տոկոս է եղել։ Դա խայտառակություն է։ Այսինքն` ժողովուրդը չի վստահում այսօրվա քաղաքականությամբ զբաղվող մարդկանց։ Այս կուսակցություններին չի հարգում, չի ընդունում, բայց ցավոք սրտի ամբողջ երկիրը կուսակցականացրել են։

Արտահերթ խորհրդարանական ընտրություններից առաջ հույս հայտնեցիք, որ իշխանությունները չեն վերարտադրվի, ըստ Ձեզ ինչո՞ւ այսպիսի պատկեր ունեցանք

Գործող և նախկին իշխանությունները երկվորյակներ են, դրա համար էլ սայլը տեղից չի շարժվում։ Այն ժամանակ էլ խաբվեցինք, հիմա էլ խաբվեցինք։ Նրանք խաբելու մեծ վարպետ են։ Բոլորը միասին են, ամեն ինչ սուտ է։

Այսինքն՝ ընդդիմությունն ու իշխանությունը միասի՞ն են գործում

Բոլորն իրար հետ են, Ռոբերտ Քոչարյանին հանած։  Աստված չի թողնելու, որ թուրքական ցեղը Հայոց պետականությունը վերացնի։ Մենք մնալու ենք և սպասում ենք, որ սուրբ տոհմերի առաջնորդները հետ վերադառնան։

Աղբյուր` Փաստինֆո