Փաստ ինֆո

Իհարկե, «ինքնապահպանական բնազդ» ասվածն, այս դեպքում միանշանակ ընկալում չունի։ Գործող քաղաքապետ, ապօրինի կալանքի տակ գտնվող Առուշ Առուշանյանի տպավորիչ հաղթանակը Գորիսի բնակիչների համար հնագույն բնակավայր և քաղաքակրթությունների կենտրոն հայրենի քաղաքի, համայնքի անվտանգության և իրենց իսկ անվտանգության և ապահովության երաշխիք էր, նաև վերջին ԱԺ ընտրությունների ժամանակ իրենց գործած սխալի սրբագրում և սեփական քվեի արժեքի վերանայում։ Վստահաբար, գորիսեցիների մի մասի մոտ Առուշանյանի՝ անազատության մեջ գտնվելու համար նաև մեղքի զգացում կար՝ խորհրդարանական ընտրության ժամանակ իրենց քաղաքապետի թիկունքին պինդ չկանգնելու և իշխանությունների սադրանքներին տեղի տալու համատեքստում ինչն, ի դեպ, նրանցից ոմանք նույնիսկ հրապարակային խոսքում խոստովանել են։

ՈՒշագրավ էր եղել նաև ներկա մարզպետի՝ Մելիքսեթ Պողոսյանի հրճվանքն ու ուրախությունը՝ Առուշ Առուշանյանի հաղթանակով, ինչն արձանագրել է մամուլը։ Եւ սա այն դեպքում, երբ Մելիքսեթ Պողոսյանը միշտ առանձնացել է փաշինյանական իշխանությանն իր ենթակայական կեցվածքով․ հիշենք թեկուզ թշնամու զինուժի կողմից անցյալ մայիսին ՀՀ սահմանը խախտելու սկզբնական օրերը․․․

Իսկ նրա ուրախության համար անձնական առիթ կար նաև։ Բանն այն է, որ վերջին շրջանում քպական դարձած՝ իշխանության թեկնածու Վլադիմիր Աբունցից ավելի Աբունցի հաղթանակը տենչում էր մեկ այլ քպական։ Խոսքը ԱԺ պատգամավոր Արմեն Խաչատրյանի մասին է, ով քաղաքապետի իր թեկնածուի հաղթանակի պարագայում ակնկալում էր Սյունիքի մարզպետի պաշտոնը ստանալ և բնականաբար, ամեն կերպ խանգարել էր ներկա մարզպետին՝ իր տեղակալ Կարո Ավանեսյանին քաղաքապետի թեկնածու առաջադրելուն։ Ավելին՝ հենց Արմեն Խաչատրյանին էր Փաշինյանը վստահել Գորիսի ընտրությունների կազմակերպումը ու իրենց թեկնածուի անցկացումը։

Այնպես որ, Գորիսի քաղաքապետի ընտրություններում Առուշանյանի հաղթանակը ինչ-որ առումով նաև ԱԺ պատգամավոր Արմեն Խաչատրյանի պարտությունը Մելիքսեթ Պողոսյանին կամ ներկա մարզպետի անձնական հաղթանակն էր եղել՝ Արմեն Խաչատրյանի նկատմամբ։ Չմոռանանք, որ Մելիքսեթ Պողոսյանը նաեւ նեղացվածություն ունի Փաշինյանից, որ իր որդին այս պահին կալանավայրում է։

Մեծ հաշվով, կարող ենք ասել, որ Գորիսում երկիր պահող ազգային տեսակը հաղթեց պարտվողական իշխանությանը:

Ի վերջո, այս ընտրությունը, ինչպես նաև՝ Գյումրիում իշխանության թեկնածուի պարտությունը «Բալասանյան դաշինքին»՝ նախկին քաղաքապետ Սամվել Բալասանյանին ձնագնդու էֆեկտ կարող է ունենալ Հայաստանի մյուս հատվածներում տեղի ունեցող համայնքային ընտրություններում։

Այսինքն, անկախ՝ այս ու այն լոկալ խարդավանքից, մարդիկ, մարզերի բնակիչները նախորդ ողջ շրջանում ու հատկապես՝ հունիսին տեղի ունեցած խորհրդարանական ընտրություններից հետո խորքային առումով իրենց կաշվի վրա զգացին ու հասկացան՝ ներկա իշխանությունը նախընտրական ասֆալտապատումից ու հիմա էլ՝ ջրի հարցը լուծելու փոխարեն՝ կաթիլայինի վրա նստեցնելուց զատ իրենց ոչ մի դարդին դարման անելու մասին չի մտածել, չի մտածում ու ձեռք չի մեկնում։ ՈՒ եթե արտագաղթի ճանապարհը չեն բռնում, պիտի իրենք առնվազն տեղական իշխանության մակարդակում վերանայեն իրենց սխալ ընտրությունը։

Գորիսն ու Գյումրին օրինակը տվել են․․․

Աղբյուր` Փաստինֆո