Փաստ ինֆո

Ինչպես կանխատեսում էինք, Գյումրիում ընտրությունների մասնակցությունը ցածր է, ինչը շատ բնական է: Այս մասին քվեարկությունից հետո լրագրողներին ասաց «Թասիբով» դաշինքի Գյումրիի քաղաքապետի թեկնածու Կարապետ Պողոսյանը և սա պայմանավորեց այն հանգամանքով, որ քարոզարշավի ժամանակ թեկնածուները պասիվ էին.

«Ես իմ եթերներից մեկի ժամանակ էլ ասել եմ, այս ընտրությունների ժամանակ ընտրողը պետք է գնահատի թեկնածու անկեղծությունը:Իշխանությունը գտնվում է գետնին, իսկ ժողովուրդը շատ ուշադիր նայում է այդ իշխանությանը, սակայն թույլ չի տալիս, որ որևէ մեկը գա ու վերցնի իշխանությունը: Նա թույլ կտա այն թեկնածուին, ով իսկապես անկեղծ է եղել այս ընթացքում ու իր անկեղծությամբ է ներկայացրել իր մոտիվացիան քաղաքապետի ընտրություններում»,- ասաց թեկնածուն:

Կարապետ Պողոսյանն անդրադարձավ նաև ՔՊ-ական թկենածուի այն հայտարարությանը, թե ընտրություններից առաջ քաղաքացիներին բաժանված 50 հազարական դրամների ընտրակաշառք չէ, այլ՝ սոցիալական աջակցություն.

«Այդ տղան փայլում է իր «հանճարեղությամբ»: Իր հայտարարությունն ավելի շատ ինքնախոստովանական ցուցմունք է, սա հերթական անգամ խոսում է այն մասին, որ ՀՀ-ում հստակ գործում են երկակի ստանդարտներ օրենքի առաջ՝ նույն արարքի համար Գորիսի համայնքապետ Առուշ Առուշանյանը գտնվում է կալանքի տակ»,-ասաց Կարապետ Պողոսյանը:

Թեկնածուն նշեց, որ այն գումարը, որը ծախսվում է նախընտրական քարոզարշավի, պաստառների համար, պետք էր ուղղել սահմանային խնդիրների լուծմանը

Կարապետ Պողոսյանի դիտարկմամբ՝ սա մեր հասարակության ամենագիտակցված ընտրություններից մեկն է, որը անակնկալներով լի է լինելու իշխանության համար.

«Այս պահին չեմ կարող ասել, բայց վստահ եմ, որ գոնե իշխանության համար շատ հետաքրքիր անակնկալներ կունենանք»,-ասաց նա:

Աղբյուր` Փաստինֆո