Փաստ ինֆո

Արցախի Հանրապետության ԱԺ պատգամավոր Մետաքսե Հակոբյանը վստահեցնում է՝ Արցախում պաշարված դիրքեր չկան։

Հիշեցնենք, որ սոցիալական ցանցերում տարբեր տեղեկություններ են շրջանառվել առ այն, որ Արցախի ՊԲ տարբեր դիրքեր և դիտակետեր պաշարված են ադրբեջանցիների կողմից։ Նման հայտարարությամբ է հանդես եկել նաև «Ադեկվադ» միաբանության համահիմնադիր Արթուր Դանիելյանը, որը հայտարարել էր, թե Արցախի ՊԲ 5-րդ ՊՇ (Մարտակերտի) 4-րդ ՀՎ ՀԴԿ-ն ( Օմեգա կոչեցյալը) հիմա փաստացի պաշարված է։ Թեև ՊԲ-ն պաշտոնական հաղորդագրություն էր տարածել՝ հերքելով տեղեկությունները, սակայն Դանիելյանը գրառմանը կից տեղադրել է նաև նամակագրության սքրինշոթ։
«Փաստինֆո»-ն կապ հաստատեց Մետաքսե Հակոբյանի հետ՝ պարզելու համար, թե Արցախում ինչ իրավիճակ է ի վերջո, արդյո՞ք ունենք պաշարման մեջ գտնվող զինվորներ, ինչին ի պատասխան Հակոբյանը նշեց, որ նման բան չկա, չի կատարվում։

Պատգամավորի խոսքով՝ որևէ տարածք չի գրավվել, իսկ ինչ վերաբերում է պաշարմանը, ապա նոյեմբերի 9-ից հետո Արցախի՝ մեր վերահսկողության տակ մնացած հատվածը պաշարված է այն մասերից, որտեղ այսօր տեղակայված է թշնամին։
«Այդ բառը կարելի է օգտագործել։ Այո, մենք այսօր պաշարված ենք։ Օրինակ՝ Ստեփանակերտն օդային տարածքով ընդամենը 800 մետրի վրա է գտնվում թշնամուց, այդ առումով բոլորս ենք պաշարված։ Ձեր նշածը կարելի է բնութագրել որպես պատերազմական իրավիճակ, այդպիսի բան չկա»,- նշեց Հակոբյանը՝ հավելելով, որ քիչ առաջ է խոսել՝ թշնամու կողմից մի քանի օր առաջ մարտական գործողությունների շրջանի բնակիչների հետ, որևէ բան չկա, խաղաղ է, իսկ բնակիչներն էլ իրենց առօրյա գործով են զբաղվում։

Հակոբյանն ընդգծեց, որ ցանկացած շարժ այսօր բոլորն են տեսնում, բնակիչներն են տեսնում և ՊՆ-ն, ՊԲ-ն ցանկության դեպքում էլ չեն կարող թաքցնել. «Այլ հարց է՝ պատրաստվող որևէ բան, ինչից իրենք կարող են տեղյակ լինել և տեղյակ չենք մենք։ Եթե նման բան կա, դա չեմ կարող մեկնաբանել, բայց չեմ կարծում, որ կա այն առումով, որովհետև այսօր ցանկացած գործողության արձագանքում են ռուս խաղաղապահները»։

Աղբյուր` Փաստինֆո