Փաստ ինֆո

ՔԿ նախագահ Արգիշտի Քյարամյանն անգնահատելու ծառայություն է մատուցում Ադրբեջանին՝ որոշելով գաղտնի պահել Բաքվում հայ ռազմագերիների, քաղաքացիական անձանց խոշտանգելու, կյանքի իրավունքից զրկելու, նվաստացնելու, ընդհանրապես պատերազմական հանցագործությունների դեպքերի առթիվ հարուցված քրեական գործերը։

Ինչպես արդեն հայտնի է՝ Ադրբեջանում գերության մեջ գտնվող հայ ռազմագերիների, այդ թվում՝ քաղաքացիական անձանց սպանության կապակցությամբ իրավապաշտպաններն արդեն 38 գանգատ են ներկայացրել ՄԻԵԴ՝ կյանքի իրավունքի խախտման հիմքով, որոնց թիվը կարող է ավելանալ եւս 30-ով։ ՀՀ ՄԻՊ-ը հրապարակել էր հայ ռազմագերիների նկատմամբ անմարդկային վերաբերմունքի դրսեւորումները, այն դժոխային իրավիճակը, որի պայմաններում նրանք ստիպված են եղել կյանքի ու մահվան կռիվ տալ Բաքվում։ Վերջերս նաեւ հայտնի դարձավ, որ ամիսներ շարունակ Բաքվում գտնվող գերու մարմինը Հայաստան է ուղարկվել ինքնաթիռով՝ գլխատված։

«Փաստինֆո»-ն գրավոր հարցում էր ուղարկել ՔԿ՝ խնդրելով տեղեկություններ տրամադրել, թե քանի՞ քրեական գործ է հարուցվել՝ Ադրբեջանում հայ ռազմագերիների, այդ թվում՝ քաղաքացիական անձանց սպանության հատկանիշներով, քրեական գործերով քանի անձ է տուժող ճանաչվել և արդյոք քննությամբ պարզվել է սպանության եղանակը, մասնավորապես՝ ինչն է դարձել մահվան պատճառ։ Հետաքրքրվել էինք, թե քանի անձ է ներգրավվել որպես մեղադրյալ՝ հայ ռազմագերիների սպանության համար, որևէ անձի նկատմամբ հետախուզում հայտարարվել է, թե ոչ և ադրբեջանցի քանի ռազմական գործչի նկատմամբ է ընդհանրապես հայտարարվել միջազգային հետախուզում։ Հարց էր բարձրացվել նաև գերիների խոշտանգման մասին։ Բացի այդ նկատի ունենալով, որ առ այսօր պաշտոնական հաղորդագրություններ են տարածվում ադրբեջանցիների կողմից շփման գծում հայկական կողմին փոխանցվող դիերի մասին՝ հետաքրքրվել էինք, թե արդյոք նշանակված փորձաքննություններով պարզվել են նշված հայորդիների մահվան պատճառը. Նպատակը մեկն էր՝ տղաները զոհվել են ռազմական գործողությունների ընթացքում, թե հայկական կողմին են փոխանցվում գերության մեջ խոշտանգված ու սպանված մեր զավակների մարմինները, որոնք համարվում էին անհետ կորած։

ՔԿ-ից մերժել են պատասխանել բարձրացված հարցերին՝ պատճառաբանելով, թե տեղեկատվության տրամադրումը հնարավոր չէ, քանի որ պարունակում է հրապարակման ոչ ենթակա նախաքննական քննության տվյալներ։ Ասել է թե՝ այս գերատեսչության համար նախաքննական գաղտնիք է, թե քանի ադրբեջանցու նկատմամբ է հետախուզում հայտարարվել՝ ռազմական հանցագործությունների համար։ Ընդգծենք՝ ոչ թե անուն-ազգանունը, այլ ինքնին թվի հրապարակումն է գաղտնի համարվում։ Թեեւ ամիսներ առաջ նույն գերատեսչությունը մեր համանման հարցմանը գրավոր պատասխան տվել էր։

«ՀՀ քննչական կոմիտեի զինվորական քննչական գլխավոր վարչությունում շարունակվում է Ադրբեջանի Հանրապետության ռազմաքաղաքական ղեկավարության կողմից Արցախի Հանրապետության դեմ ագրեսիվ պատերազմ սանձազերծելու և վարելու, ռազմական գործողությունների ընթացքում նախապես հավաքագրված վարձկաններ օգտագործելու, պատերազմ վարելու արգելված մեթոդներ և միջոցներ կիրառելու, քաղաքացիական բնակիչներին զինծառայողներից չտարբերակելու և Արցախի Հանրապետության խաղաղ բնակավայրերի քաղաքացիական բնակչությանը համակարգված, կանխամտածված և նպատակաուղղված գրոհների թիրախ դարձնելու, մասնավորապես՝ խորը թիկունքում գտնվող քաղաքացիական բնակչությանը և քաղաքացիական օբյեկտները ոչ ընտրովի հարձակման թիրախներ դարձնելու և հրետակոծելու, միջազգային մարդասիրական իրավունքի նորմերի լուրջ խախտումներ համարվող արարքներ կատարելու, այդ թվում՝ ռազմագերիների նկատմամբ, փաստերի առթիվ հարուցված քրեական գործի նախաքննությունը»,- նշել են կառույցից՝ հավելելով, թե տեղեկության տրամադրումը հնարավոր չէ, քանի որ պարունակում է հրապարակման ոչ ենթակա նախնական քննության տվյալներ։

Այս տվյալների հրապարակումը ձեռնտու չէ միայն ադրբեջանցիներին, որոնք պետական մակարդակով բազում ռազմական հանցագործություններ հեղինակելով հանդերձ աշխարհին փորձում են ներկայանալ որպես «հումանիստ», միջազգային տեղեկատվական հոսքերը լցնում ի վնաս ՀՀ-ի կեղծ տեղեկատվությամբ, լուրեր տարածում մեր զինվորականների նկատմամբ հետախուզում հայտարարելու մասին։ Քննչական կոմիտեն իր անգործությամբ , նախաքննական գաղտնիության սկզբունքը չարաշահելով փաստացի օգնում է ադրբեջանցիներին՝ ի վնաս Հայաստանի իրականացվող տեղեկատվական պատերազմում՝ փոխանակ ինքը շահագրգռված լիներ պարբերաբար նոր տեղեկություններ հաղորդել ադրբեջանցիների ռազմական հանցագործությունների մասին։

Նախաքննության գաղտնիությունը բացարձակ սկզբունք չէ, ինչը շահարկելով դատախազաքննչական մարմինները վերջին շրջանում մերժում են ցանկացած տեղեկատվության տրամադրում։ Ի գիտություն՝ ՀՀ ՔԿ նախագահի, տեղեկացնում ենք, որ այսօրինակ գործելաոճով խախտում են նաեւ ԵԽԽՎ նախարարների կողմից դեռեւս 2003 թվականի թիվ 13 հանձնարարականի պահանջները, որոնք կանոնակարգում են քրեական գործերով տեղեկատվության տրամադրման կանոնները։ Թեեւ այս դեպքում դա էլ չէ կարեւոր, այլ պարզապես մի քիչ տրամաբանություն է պետք՝ ներքին ու արտաքին լսարանները եւ նրանց համար տեղեկատվական հոսքերը տարբերակելու համար։

Ի դեպ, նույն քննչական կոմիտեի համար նախաքննական գաղտնիք չէր շաբաթ օրով տեղեկատվություն տարածել, թե ժամկետային զինծառայողներ են կալանավորվել, իբր, ծառայությունից խուսափելու համար, որ այս կամ այն գործով հայ սպա է կալանավորել՝ ենթադրյալ ինչ-որ հանցավոր արարք կատարելու համար, բայց ադրբեջանցիների վերաբերյալ տվյալները գաղտնի են...

Աղբյուր` Փաստինֆո