Փաստ ինֆո

Նիկոլ Փաշինյանը ԱՊՀ պետությունների ղեկավարների խորհրդի առցանց տեսաժողովի ընթացքում հայտարարել է, որ կարևոր է Հայաստանի ու Ադրբեջանի միջև խաղաղության պայմանագրի ստորագրումը.

«Գլխավոր հարցը Ադրբեջանի և Հայաստանի միջև խաղաղ պայմանագրի ստորագրումն է: Սրա համար կարևոր ենք համարում ԵԱՀԿ Մինսկի խմբի համանախագահների շրջանակում բանակցային գործընթացի վերականգնումը »,- ասել է Փաշինյանը:

Նա նաև խոսել է տարածաշրջանում կայուն խաղաղության հաստատելու անհրաժեշտության մասին և շեշտել, որ դրա անհրաժեշտ նախապայմանը երկու երկրների միջև սահմանազատումն ու սահմանագծում անցկացնելն է: Նիկոլ Փաշինյանը նաև հաստատել է, որ Հայաստանը պատրաստ է սկսել սահմազատման և սահմանագծման աշխատանքները.

«Բարդ է սահմանագծման ու սահմանազատման աշխատանքներ կատարել այն սահմաններին, որոնք Ադրբեջանը շարունակում է խախտել, որտեղ կանոնավոր կրակոցներ են հնչում: Հատկապես նկատի ունեմ Սոթք-Խոզնավար հատվածը»,-ասել է Նիկոլ Փաշինյանը:

Նրա խոսքով՝ մեր տարածաշրջանը կանգնած է կարևոր փոփոխությունների շեմին, իսկ այդ փոփոխություններին պատրաստ է Հայաստանը.

«Մեր կառավարության նպատակներից է խաղաղության դարաշարջանի բացումը, սակայն կան գործոններ, որոնք հարցականի տակ են դնում տարածաշրջանում խաղաղության հասնելու գործընթացը: Չնայած բոլոր ջանքերին՝ մարդիկ շարունակում են զոհվել Լեռնային Ղարաբաղում, հայ-ադրբեջանական սահմանին»,-ասել է Փաշինյանը և առաջարկել ուժեղացնել եռակողմ մեխանիզմները՝ միջադեպերի քննության ու հրադադարի ռեժիմի պահպանման համար.

«Շատերը չեն ցանկանում խաղաղություն ու կայունություն մեր երկրում, ուստի այս պայմաններում շատ դժվար է առաջ տանել խաղաղության օրակարգը: Մենք վճռական ենք տրամադրված և կանենք մեզնից կախված ամեն ինչ մեր տարածաշրջանում խաղաղության ու կայունության հաստատման համար: Մենք ունենք հստակ պատկերացում, թե ինչպես հասնենք այդ նպատակին՝ երկխոսություն և թշնամանքի մթնոլորտի աստիճանաբար հաղթահարում, որը, ցավոք մեր տարածաշրջանում գոյություն ունի, տրանսպորտային և տնտեսական հաղորդակցությունների ապաշրջափակում. դա այն միակ ճանապարհն է, որը կբերի այդ նպատակին»,- ասել է Նիկոլ Փաշինյանը:

Աղբյուր` Փաստինֆո