Փաստ ինֆո

Այն, ինչ այսօր անում է Ադրբեջանը, երկու նպատակ ունի՝ վերցնել լրացուցիչ բարձունքներ և հայաթափել Արցախի բնակավայրերը։ «Փաստինֆո»-ի հետ զրույցի ժամանակ ասաց ռազմական փորձագետ Հայկ Նահապետյանը՝ անդրադառնալով ադրբեջանական կողմի հերթական սադրանքներին։

Նրա դիտարկմամբ՝ այժմ ադրբեջանցիների նպատակն է վերցնել լրացուցիչ բարձունքներ, որոնք լայնածավալ ռազմական գործողությունների ժամանակ չեն վերցրել։

«Ի դեպ դրանք դեպի Մարտունի տանող ճանապարհին հարակից բարձունքներն են։ Ըստ իս՝ դրա համար են կրակում։ Բացի այդ, քաղաքացիական բնակիչների, գյուղատնտեսական աշխատանք անող մեր հայրենակիցների սպանությունը հոգեբանական ամենամեծ ազդեցությունն է այնտեղի բնակիչներին այդ տարածքներից դուրս հանելու համար։ Երբ մարդկանց կյանքը վտանգված է, առավել ևս եթե սպանողն անպատիժ է մնում, ապա այդտեղ մնալն անհնարին է դառնում։ Հատկապես այն պարագայում, երբ աշխատելը, ընտանիք պահելը և կերակրելն անհնար է դառնում»,-ասաց Հայկ Նահապետյանը։

Վերջինս նշում է, որ ռուս խաղաղապահները, Արցախում գտնվելով, խոչընդոտում են Ալիևի հետագա ծրագրերին։
Ադրբեջանն ամեն ինչ անում է, որ այդ տարածքից հայ բնակչությունը դուրս գա։ Տարբեր միջոցներ ու ձևեր կան։ Իհարկե, Ադրբեջանը խնդիր է դրել ստեղծված իրավիճակն այլ գործիքակազմով ամբողջովին փոխել ի օգուտ իրեն, որովհետև ռուս խաղաղապահներն, այնուամենայնիվ, լինելով Արցախում խոչընդոտում են Ալիևի հետագա ծրագրերը։

Հիմա իրենք ճանապարհները գտել են։ Ալիևն առանձնապես նոր գյուտ չի արել։ Սա ընդունված ձև է, տարբեր պետություններ տարբեր ժողովուրդների նկատմամբ կիրառել են, հիմա նույն բանն Ալիևն է անում, առավել ևս, որ ունի պրոֆեսիոնալ խորհրդականներ՝ Թուրքիայի ԳՇ-ից ժամանած։ Նրանք գիտեն՝ ինչպես այդ ամենն անեն, որովհետև հսկայական փորձառություն ունեն, մասնավորապես Սիրիայում, Իրաքում, Կիպրոսում, Լիբիայում, և թուրք մասնագետները խորհուրդ են տալիս, նաև անհրաժեշտության դեպքում նաև կառավարում է այդ պրոցեսները։

Խնդիրն Արցախն ամբողջությամբ հայաթափելն է, որից հետո անցնելու են Հայաստանին։ Զուգահեռաբար հիմա հող են նախապատրաստում։ Ադրբեջանի ծրագրերը հեռանկարային են՝ վարկաբեկել ռուս խաղաղապահներին և շրջանառության մեջ դնել այն միտքը, որ Արցախում ռուս խաղաղապահների գտնվելն անիմաստ է։

«Հետևաբար եթե ռուս խաղաղապահը չի կարողանում պաշտպանել հայ բնակչության անվտանգությունը, սկզբունքորեն կա՛մ պետք է փոխարինվի այլոց կողմից, կա՛մ Ադրբեջանն ասելու է, որ ճիշտ կլինի նաև Թուրքիայի զինված ուժերի խաղաղապահները լինեն»,-նշեց փորձագետը։

Դիտարկմանը, որ հայկական կողմն էլ ամեն ինչ ուղղում է ռուս խաղաղապահների կողմ, կարծես ամեն ինչի համար նրանք են պատասխանատու, փորձագետը նկատեց՝ դրա մեջ բացասական երանգներ կան, քանի որ եթե պատկան մարմինները սկզբունքորեն պատասխանեն ադրբեջանցիներին, ապա զինվորների և բնակչության մոտ ճիշտ բարոյահոգեբանական վիճակ կձևավորվի։

«Նրանք անընդհատ ռուս խաղաղապահ են ասում։ Սա անօգնական, թույլի, տկարի, անպաշտպանի հոգեվիճակ է, որը նաև Հայաստանի քաղաքացիների վրա է ազդում։ Այստեղ մարդիկ էլ են մտածում, որ եթե Արցախում բնակչությունն անպաշտպան է, վաղը չէ մյուս օրն այդ նույն թուրքը Հայաստան է գալու և սկսում են ճամպրուկները կապել։ 10-ից մեկն էլ, եթե ճամպրուկը կապի, դա արդեն եղանակ կստեղծի Հայաստանի համար»,-ասաց Հայկ Նահապետյանը։

Փորձագետն ընդգծեց՝ Ադրբեջանն ամեն ինչ անելու է Արցախի բնակավայրերը հայաթափելու համար։ Առավել ևս այն դեպքում, երբ պրոֆեսիոնալ խորհրդականներ ունի՝ ի դեմս Թուրքիայի ԳՇ պետի։ Նրանք գիտեն՝ ինչպես այդ ամենն անեն, քանի որ հսկայական փորձառություն ունեն, մասնավորապես Սիրիայում, Իրաքում, Կիպրոսում, Լիբիայում։

«Դեռ չորս տարի խաղաղապահները պետք է մնան։ Այդ 4 տարվա ընթացքում ամեն ինչ անելու են, որ հայ չմնա, իսկ այդ դեպքում ռուս խաղաղապահն այնտեղ մնալու է, որ ի՞նչ անի։ Այսինքն` ՌԴ-ի ռազմաքաղաքական ղեկավարությունը որևիցե հիմնավորում չի կարող ունենալ, թե ինչու ՌԴ զինված ուժերը պետք է Արցախում լինեն, եթե հայ չկա»,-նշեց փորձագետը։

Հայկ Նահապետյանը գտնում է, որ Ադրբեջանի քայլերը միտված են հենց այս քաղաքականությանը՝ Արցախում ստեղծել անտանելի պայմաններ, անելանելի վիճակ, որ բնակավայրերը հայաթափվեն։ Փորձագետի կարծիքով այս քաղաքականությունից անմասն չի մնա նաև Հայաստանը, որտեղ ևս ադրբեջանական կողմն արդեն սկսել է նման սադրանքների դիմել։

Աղբյուր` Փաստինֆո