Փաստ ինֆո

Վերաքննիչ քրեական դատարանի դատավոր Նարինե Հովակիմյանը «Մխիթար Գոշի» մեդալով պարգևատրվել է ԲԴԽ նախագահի պաշտոնակատար Գագիկ Ջհանգիրյանի միջնորդությամբ, երբ Հովակիմյանի կողմից քննվում էր Ռոբերտ Քոչարյանի և մյուսների գործով վերաքննիչ բողոքները։ 

«Փաստինֆո»-ի թղթակցի հաղորդմամբ՝ թեև ՀՀ երկրորդ նախագահ Ռոբերտ Քոչարյանի և մյուսների նկատմամբ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու որոշման դեմ բողոքների քննությունն արդեն ավարտական փուլում էր, նախագահող դատավոր Նարինե Հովակիմյանին ինքնաբացարկ հայտնելու մասին միջնորդություն ներկայացվեց՝ նոր հանգամանքների առկայության հիմքով։ Նշենք, որ բողոքները քննվում են դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի։

Ինքնաբացարկի միջնորդության հիմքում դրվել է այն հանգամանքը, որ դատավոր Նարինե Հովակիմյանը «Մխիթար Գոշի» մեդալով պարգևատրվել է ԲԴԽ նախագահի պաշտոնակատար Գագիկ Ջհանգիրյանի միջնորդությամբ, ուստի, պաշտպանության կողմի կարծիքով Հովակիմյանը չի կարող անկողմնակալ դատարան լինել, չի կարող մասնակցել սույն գործով դատավարությանը։
Խնդիրն այն է, որ ԲԴԽ նախագահի պաշտոնակատար Գագիկ Ջհանգիրյանը 2008թ մարտի իրադարձություններին ակտիվ մասնակցել է, բազմիցս հանդես է եկել որպես այդ ժամանակվա իշխանությունների ընդդիմադիր, պահանջել հրաժարական։Իսկ հիմա միջնորդել է պարգևատրել դատավորին, երբ վերջինիս կողմից քննվում էր Քոչարյանի գործով բողոքները։

«Մի մարդ, ով ի սկզբանե՝ մարտի 1-ից սկսած, այս գործով ունի կտրուկ դիրքորոշում, որը հակասում է Ռոբերտ Քոչարյանի դիրքորոշմանը, Ձեզ ներկայացնում է պարգևատրման, և Դուք պարգևատրվում եք։ Սա ցանկացածի մոտ կասկած է առաջացնելու Ձեր անկողմնակալության վերաբերյալ։ Ակնհայտ է, որ Դուք չեք կարող մասնակցել սույն գործով դատավարությանը», - ասաց Ալումյանը։
Նախագահող դատավոր Նարինե Հովակիմյանն էլ հայտնեց, որ մինչ այս պահը տեղեկացված չի եղել, որ պարգևատրվել է Ջհանգիրյանի միջնորդությամբ, այդուհանդերձ, Ալումյանը գտնում է, որ զուգադիպության հավանականությունը քիչ է։ Պաշտպաններ Կարեն Մեժլումյանը և Էրիկ Ալեքսանյանը միացան միջնորդությանը։

Մեղադրող դատախազ Գևորգ Բաղդասարյանն էլ առարկեց՝ նշելով, որ ինքնաբացարկի միջնորդությունը 99 տոկոսով վերաբերում էր Գագիկ Ջհանգիրյանին, ով սույն գործով դատավոր չի հանդիսանում։

«Սա մոտավորապես ինքնաբացարկ էր՝ Գագիկ Ջհանգիրյանին, բայց թե ինչու էր դա այս դատարանում և ինչու էր կապվում այս գործի հետ, ի վերջո, չհասկացանք»,- նշեց Բաղդասարյանը։

Կողմերի դիրքորոշումը լսելուց հետո նախագահող դատավոր Հովակիմյանը հեռացավ խորհրդակցական սենյակ՝ որոշում կայացնելու։ Որոշումը կհրապարակվի հոկտեմբերի 18-ին՝ ժամը 10.55-ին։

Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։ ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։

Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։

Դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։

Հեղինակ՝ Իզաբել Սահակյան

Աղբյուր` Փաստինֆո