Փաստ ինֆո

Հայաստանը պետք է խաղաղության պայմանագիր ստորագրի, դրա համար էլ Ադրբեջանն ակտիվացել է: Պետք է խոնարհվենք, հիմա էլ պարտադրում են մեզ, որ արագ-արագ խոնարհվենք, որպեսզի այդ թուղթը ստորագրելու դեպքում ոչ մեկը ձայն չհանի, ասեն՝ աման, թուրքերն եկան, վախեցանք, ստորագրեցինք: «Փաստինֆո»-ի հետ զրույցում ասաց ազատամարտիկ, «Արաբո» ջոկատի հրամանատար Մանվել Եղիազարյանը:

Ադրբեջանը վերջին շրջանում սկսել է ակտիվացրել է թիրախավորված ագրեսիաները: Մասնավորապես, օրեր առաջ ադրբեջանցի դիպուկահարի թիրախավորված կրակոցով սպանվել արցախցի խաղաղ բնակիչ, նույն օրը Երասխում վիրավորվեց հայ զինծառայող։ Իսկ երեկ երեկոյան ադրբեջանական զինված ուժերը կրակ են բացել Արցախում հայ դիրքապահների վրանի ուղղությամբ, ինչի հետեւանքով հրազենային վիրավորում է ստացել վեց զինծառայող, իսկ այսօր էլ ադրբեջանցիները կրակել են Արարատի մարզի Երասխ գյուղի ուղղությամբ:

Ըստ ազատամարտիկի՝ սրանով Հայաստանի և Ադրբեջանի իշխանությունները համաձայնեցված փորձում են մեր հասարակության մոտ խուճապային տրամադրություն ստեղծել, որպեսզի ցանկացած նոր ստորագրվելիք համաձայնագիր, որը չի բխելու Հայաստանի շահերից, հասարակության կողմից որևէ դիմադրության չարժանանա.

«Հասարակության մոտ խուճապային տրամադրություն է ստեղծվում, որպեսզի նոր սրիկայությունն ավելի հեշտ մարսվի: Խնդիրը միայն դրա մեջ է, ուրիշ ոչ մի բան չկա, ադրբեջանցիներից ոչ մի վտանգ չկա։ Պարզ ասած՝ հերթական անգամ պաս են տալիս իրար, որպեսզի այդ փաստաթուղթը ստորագրեն ու ասեն՝ վիճակ չկար, կրակում էին, սպանում էին, մենք էլ խաղաղության պայմանագիր ստորագրեցինք »,-ասաց ազատամարտիկը՝ արձանագրելով, որ «այդ խաղաղության պայմանագիրը խայտառակության պայմանագիր է, դրա համար էլ մեզ պարտադրում են ստորագրել»։

«Ադրբեջանցիներն ակտիվանում են, այստեղ էլ վախկոտը, աննամուսը պանիկա է բարձրացնում, թե եկան, թուրքերը հասան, ստորագրենք, տանք-պրծնենք:Որ հասարակությունն էլ ասի՝ երեկ 6 մարդ մահացավ, էսօր մեկը վիրավորվեց, եկեք խաղաղության պայմանագիր ստորագրենք՝ առանց հասկանալու, թե այդ պայմանագրի մեջ ի՞նչ կա: Այդ խաղաղության պայմանագրով Հայաստանն Ադրբեջանի տարածքային ամբողջականությունը կճանաչի, վաղը երկու փամփուշտ ադրբեջանցիները կկրակեն՝ Ցեղասպանությունն էլ կմոռանանք, հետո ազգային պահանջներն էլ կմոռանանք»,-ասաց Մանվել Եղիազարյանը:

Ազատամարտիկը արձանագրեց, որ Հայաստանի վարվող քաղաքականությունն «աննամուսական է», ապա վրդովված արձանագրեց՝ դա շատ վիրավորական և ստորացուցիչ է այն տղամարդկանց համար, որոնք ի սրտե նվիրված են եղել մեր հայրենիքի պաշտպանությունը և կերտել են Հայաստանի հաղթանակը.

«Մենք նոյեմբերի 9-ից դադարել ենք կռվել, գիտե՞ք պատճառը որն է, որ մեզ ասել են՝ ով որտեղ կանգնած է, դրանք իրենց դիրքերն են, իրենց հողն է, երբ մենք կանգնել ենք ոչ Լաչին են տված եղել, ոչ Քելբաջարը, բայց հետո բռնեցին բոլորը հանձնեցին, ոչ մեկ ձայն չհանեց, կամաց-կամաց, խաբելով, մեր հայրենիքը ծախում են»,-ասաց Մանվել Եղիազարյանը:

Ադրբեջանի սադրանքների ֆոնին Նիկոլ Փաշինյանն ԱՊՀ պետությունների ղեկավարների խորհրդի առցանց նիստի ժամանակ այսօր կրկին խոսեց խաղաղության հաստատման անհրաժեշտության, ճանապարհների ապաշրջափակման մասին և հայտարարեց, թե «գլխավոր հարցը Ադրբեջանի և Հայաստանի միջև խաղաղ պայմանագրի ստորագրումն է»: Թե ինչո՞ւ է Հայաստանի իշխանությունը այսքան շտապում խաղաղության պայմանագիր կնքել թշնամի երկրի հետ, Մանվել Եղիազարյանն արձագանքեց.

«Մարդիկ հանձն են առել ծախել Հայաստանը, կատարում են: Ես չգիտեմ՝ կա՛մ թուրքասեր են, կա՛մ փող են վերցրել, երկուսից մեկը:

Ես չեմ հասկանում՝ օրինակ ի՞նչը կստիպի մարդուն՝ իր երկիրը մաս- մաս տալ թշնամուն , որը հայ ազգի մահն է ուզում: Ո՞նց կարելի է, Ալիևի նմանն ի՞նչ իրավունք ունի մեր ժողովրդին հաթաթա տալ, Ադրբեջանը մեզ համար, իմիջիայլոց, վտանգ չի ներկայացնում, ուղղակի մենք կա՛մ ուզում ենք դառնալ սարսափելի դեմոկրատ, բայց սա խելքին մոտ բան չի, կամ էլ պայմանավորվել են, պայմանները պետք է միջև վերջ կատարեն: Ես կարծում եմ՝ ամբողջ բեմականացումը նրա համար է, որ վերջնականապես ճանապարհն էլ տան, մեր ազատագրած տարածքներն էլ տան, ամբողջը տան Ադրբեջանին: Մեր իշխանությունները վախկոտ են, եթե վաղն օրենք ընդունեն ՝ ասեն Ալիևի արձանը պետք է կիսամերկ կանգնացնենք, ես չեմ զարմանա»,-ասաց Մանվել Եղիազարյանը:

Ազատամարտիկը մեզ հետ զրույցում նկատեց, որ ո՛չ բանակն է կարգի բերվում, ո՛չ դիրքերն են ամրացվում.

«Ադրբեջանն ասում է, մի երկու հատ կրակենք՝ տեսնենք՝ վերջն ի՞նչ է լինում: Արցախում ռուս խաղաղապահ զորքեր են տեղակայված, նրանք այնքան են արհամարհում, որ Արցախը ռմբակոծում են, ռուսները, կարծես, չեն ուզում խառնվեն, ուրիշ պետության խաղաղապահ զորքեր լիներ, ադրբեջանցիներին պատառ-պատառ կանեին»,-ասաց Մանվել Եղիազարյանը:

Աղբյուր` Փաստինֆո