Փաստ ինֆո

«Ինչո՞ւ որոշ պաշտոնյաների նկատմամբ հնարավոր չէ կիրառել պատվաստման սերտիֆիկատ կամ ՊՇՌ թեստ չներկայացնելու դեպքում աշխատանքից ազատելու կանոնը»՝ սույն հարցի ծագման հեղինակն էլ, պատասխանողն էլ՝ չզարմանաք՝ Հայաստանի Հանրապետության արդարադատության նախարարությունն է։ Մինչ խնդրո առարկա կապույտ արյուն ունեցող պաշտոնյաներին անդրադառնալը արդարադատության գերատեսչությունն իր պատասխանով  շատ հստակ և բազմաբովանդակ ձևակերպում է, որ  մահաբեր քովիդի դեմ պատվաստման առաջնահերթ կարևորությունը  բոլորովին էլ հանրային առողջությունը չէ, պատվաստվելն ուղղված չէ վարակվելու դեպքում  մարդու կյանքը երկարացնելուն և կամ՝ դիմացինին չվարակելուն, հարցը հաճախ հենց աշխատանքից ազատել-չազատելուն է վերաբերվում։ Տեսեք՝ շատ մարդիկ կան, որոնց չպատվաստվելը հղի է ամենամյա  արձակուրդից, ստաժից զրկվելուց մինչև  աշխատանքից ազատվելու վտանգով, բազմաթիվ այլ վտանգներով ևս, իսկ այ, պաշտոնյա-մարդիկ էլ կան՝ արտոնյալներ, որոնք ազատվում են պատվաստվելուց, և նրանց՝ այդ  «որոշ պաշտոնյաների նկատմամբ հնարավոր չէ կիրառել պատվաստման սերտիֆիկատ կամ ՊՇՌ թեստ չներկայացնելու դեպքում աշխատանքից ազատելու կանոնը»։

Զավեշտ է, բայց սույն գերատեսչությունն ի պատասխան իր հարցադրման մեկ առ մեկ դեպքեր է թվարկում, պատճառներ նշում։ «Օրինակ՝ Ազգային ժողովի պատգամավորներին ընտրում է ժողովուրդը, Հանրապետության նախագահին, Մարդու իրավունքների պաշտպանին, անկախ մարմինների անդամներին և այլն՝ Ազգային ժողովը: Իր հերթին, օրինակ, դատավորների լիազորությունները դադարում են Սահմանադրությամբ նախատեսված սահմանափակ հիմքերով, վարչապետը՝ նշանակվելով սահմանադրական գործընթացների արդյունքում, ըստ էության, չունի այնպիսի վերադաս մարմին, որը վերջինիս կազատի կամ կնշանակի այդ պաշտոնին և այդպես շարունակ: Հետևաբար, նույնիսկ ցանկության դեպքում էլ հնարավոր չի լինի վերոնշյալ անձանց նկատմամբ կիրառել այդ հետևանքը, այսինքն՝ վերջիններիս այդ հիմքով ազատել աշխատանքից:

Ստացվում է, որ վերջին շրջանի պատժամիջոցների միտք բանին ո՛չ թե ՀՀ քաղաքացու առողջությունն է, այլ իշխանության պահանջը չկատարողներին՝ պատժելը և հատկապես՝ պատժելը՝ գրպանին խփելով՝  շաբաթը մեկ վճարովի թեստեր պահանջելով, հիվանդանալիս՝ անվճար չբուժելով կամ մարդուն ուղղակի մահվան դատապարտելով։ Բայց՝ կարևորը մնում է աշխատանքից ազատելը։

Ընդ որում, շատ լավ հասկանում են մարդիկ, որ տարեցների, ռիսկի խմբում գտնվող անձանց մասին խոսք անգամ չկա, հիմնական թիրախը՝ աշխատող և վերարտադրող տարիքի մարդիկ են։

Հարց է ծագում , ՀՀ իշխանությունը բոլորովին չի մտածու՞մ ժողովրդի մասին, լավ, ընդդիմադիրների մասին որ չի մտածում, ծանր հիվանդներին է անգամ  ազատությունից զրկում, ոչ համապատասխան պայմաններում  պահում,  հայտնի է, բա իրենց ընտրող-ժողովրդի մասին էլ չեն մտածու՞մ։ Բա ասում էին՝ մենք ժողովրդի մասնիկն ենք, ժողովուրդը մեզ պատվիրակել է, ժողովուրդն էլ օրինակ, իր վարչապետի մասին ասում էր՝ մեզնից մեկն է․․․

Աշխատանքից ազատելու սպառնալիքի իմաստը ո՞րն է՝ իբր չպատվաստվող աշխատողին մեկ ուրիշո՞վ փոխարինելը։ ԽԾԲ-ի շրջանակում գերատեսչություններն իրենց տգետներով լցնե՞լը։

Ի վերջո, արդարադատության նախարարության բարձր  մակարդակով պարզաբանմամբ ժողովուրդը իմացավ, հասկացավ, ընկալեց իշխանության օղակներում իրենց առողջության մասին մտածող չկա, ամբողջ աժիոտաժը նրանց տուգանելու, տույժերի ենթարկելու, ազատելու, պատժելու համար է։

ՈՒ իրար հարցնում են ՀՀ  մոլորված քաղաքացիները, լավ, եթե պաշտոնյաներից մեկի արդարացումը  իր ընտրովի լինելն է,  մյուսինը՝ հստակ ժամկետով նշանակվելը, սահմանադրությամբ կարգավորված լինելը, մեկ ուրիշը՝ վերադաս չունի և այլն, բա սրանցից մեկնումեկը չի մտածու՞մ, որ կարող է վարակը պաշտոն-բան չհարցնել ու կպնել իրենց։

Փաստորեն, ոչ, նրանց չի դիպչի վարակը, նրանք ուրիշ են, արտոնյալ են։

Բնականաբար, ՀՀ քաղաքացին այս ամենից հետևություն է անում՝ եթե սա, սա, սա պատճառաբանություններով, զանազան հղումներով ազատվում են պատվաստվելուց, բայց իրեն պարտադրում են, ուրեմն, ճիշտը չպատվաստվելն է։ Այլապես՝ նրանք նույնպես կպատվաստվեին։ Ընդ որում՝ առաջնահերթության կարգով։ Եվ ուրեմն, արդարադատության նախարարությունն իր այս ֆեյսբուքյան հրապարակմամբ  շատ «հետաքրքիր» դեր խաղաց՝  մեծապես  վնասելով ՀՀ-ում պատվաստման գործընթացին։

Ընդհանրապես, տպավորությունն այն է, որ Հայաստանում պատվաստվողների հիմնական մոտիվացիան երկրից դուրս գալն է, արտերկիր մեկնելը։ Այլապես ոչ էլ կպատվաստվեին։ Այս հրապարակումից հետո՝ առավել ևս․․․

Ահավասիկ՝ նրանցից մի քանիսի մեկնաբանությունը՝

*Դուք վա՞տ եք, պատվաստումն ի՞նչ կապ ունի ներկայացված խեղկատակության հետ, էդ ինչ որ պաշտոն ունեցողը ազգից լավն ա՞, որ չպատվաստվի, հանկարծ գրող չկպնի՞։ Կամ քիչ ա՞ ստանում որ թեստ չտա, թե՝ ի՞նչ։ Դուք անհիմն փաստարկ եք ներկայացնում, ավելի շատ մոլորեցնող, քան պարզաբանող։

*Փաստորեն,պատվաստումը ոչ թե վիրուսից պաշտպանելու համար է,այլ գործից չազատվելու՞․․․

*Վերը թվարկված կետերից' կարող ենք հետևություն անել,որ պատվաստվել պետք չէ։

Աղբյուր` Փաստինֆո