Փաստ ինֆո

Մինչ թուրք-ադրբեջանական տանդեմը հարձակման է անցնում համայն հայության դեմ՝ Հայաստանի, Արցախի և Սփյուռքի դեմ,  ընդ որում, բազմաթիվ ճակատներով, Հայաստանի ներքին կյանքում   ուժգնանում են հակահումանիզմի, նաև՝ սադիզմի դրսևորումները։ Այս համատեքստում, բնականաբար, դոմինանտ է ներկա իշխանության  վարած հակասահմանադրական քաղաքականությունը, քանի որ այն ի սկզբանե է հակասում մեր սահմանադրաիրավական բնութագրին, այն է՝  Հայաստանի Հանրապետությունն ինքնիշխան, ժողովրդավարական, սոցիալական, իրավական պետություն է: Այսօր Հայաստանը ո՛չ ինքնիշխան է, ո՛չ սոցիալական, ո՛չ իրավական, և ո՛չ էլ՝ ժողովրդավարական․․․

Բազմաթիվ լրատվամիջոցներում և սոցցանցերում այսօր քննարկվում է ոստիկանի կողմից  մանկահասակ երեխաների առջև նրանց հոր հանդեպ բռնություն կիրառելը։ Դեպքը տեղի է ունեցել Երևանի Քեսաբի 6 հասցեում։  Ոստիկանների անմարդկային վերաբերմունքի հետևանքով  ամենափոքրին՝ 3 տարեկան, ցնցումների մեջ հիվանդանոց են տեղափոխել։ Սոցցանցերում կար տեղեկատվություն, թե՝ ինչ-որ ինքնակամ կառույցի թեմա է եղել։ Նաև՝ եղան  մարդիկ, որ ասում էին՝ սպասենք, տեսնենք, ի՞նչ է եղել նախապատմությունը։ Ծիծաղելի է։

Ոչ մի նախապատմություն, ոչ մի թեմա չի կարող արդարացնել սույն ոստիկանի անմարդկային արարքը, այնպես որ իրավապահները  ինչ մեղմացուցիչ որակում էլ փնտրեն, մեկ է՝ սարքովի ու շինծու է լինելու։

Ի վերջո,  ա՞յս է փաշինյանական «նոր, բարեփոխված»   ոստիկանության կերպարը։ Նրանցից քանի՞սը համապատասխան կրթություն ունի։  Սրա՞նց է, որ հասարակական կարգի պահապան են ասում այսօր։ Ամերիկյան երազանքի «mister policeman»- ի չստացված կապկումնե՞րն են սրանք, որոնք իբր՝  օրինակ պիտի լինեն երեխաների համար։ /Եվս մեկը՝ամերիկացիներից կապկած՝ կառավարության 3-րդ մասնաշենքի դիմաց արձանացած  մեզ անծանոթ՝ հայ ֆեմինիստուհու կերպարն է, չստացված կերպար՝ «անվախ աղջկա»/։

Իսկ մտածե՞լ ենք արդյոք, թե որտեղի՞ց բուսնեցին այս կարգի ոստիկանները, չէ՞ որ 2018-ին ոստիկանները, ըստ ժողովրդի և նրա առաջնորդների՝ իրենց  հետ էին, իրենց  կողքին։ Բայց տեսեք թե՝ ի՞նչ տեղի ունեցավ՝ այսօր ոստիկանները իշխանություն դարձած թավշյա առաջնորդների կողքին են, թիկունքին, բայց՝ ժողովրդի դեմ։ Սա գիտակցու՞մ է ժողովուրդը։ Այսինքն, ոստիկանները ոչ թե հասարակությանն են պաշտպանում, այլ իրենց բարձր աշխատավարձ վճարողներին։

Այս համատեքստում գոնե հիշենք՝  իսկ ու՞ր են մարդու իրավունքներն ու երեխաների պաշտպանությունը որպես իրենց գործունեության նպատակ ունեցող հասարակական կազմակերպությունները։ Ինչ-որ նրանց ձայնը չի լսվում։ Փաստորեն, -նրանց մեծ մասը փողով ճղճղացողներ էին, իսկ հիմա ինտեգրվել են իշխանությանը և այլևս փող տվողը այլ պահանջներ է դնում։

Շարքային ոստիկանի  համար օրինակը իշխանությունն է՝ իսկ իշխանությունն այսօր անհիմն, քաղաքական նախընտրության,  հայացքների համար  բազմաթիվ կյանքեր փրկած բժիշկ-պրոֆեսորին, որի առողջական վիճակը անհամատեղելի է որպես  խափանման միջոց կալանավորումն ընտրելու  հետ,  անազատության է դատապարտում։ Այն դեպքում, երբ պրոֆեսորը նաև ԱԺ պատգամավոր է, ասել է՝ անձեռնմխելի։ Կամ, սադիստական  վարք ցուցաբերող ոստիկանի համար ի՞նչ պակաս  օրինակ  է Սյունիքի մարզի հերոս համայնքապետերի հանդեպ իշխանության վերին մակարդակով կիրառվող պատժամիջոցները։ Չէ՞ որ նա արդեն տեսել է, թե ի՞նչպես էին պատերազմի հերոս համայնքապետին քննչական կոմիտեում հրապարակային «բերանքսիվայր գետին տապալում»։

Վերջապես, բոլորիս աչքի առաջ է իշխանության՝ քովիդի դեմ պայքարի մոտիվացիան։ Այն ոչ միայն պատեհապաշտական է, հակասական, ոչ գրագետ ու անարդյունավետ, այլև  անմարդկային է և տարբերակված մոտեցմամբ։ Այն ուղղակի հակասում է ՀՀ սահմանադրությանը, քանզի քովիդի դեմ պայքարի հրամանատարները սահմանադրորեն «սոցիալական» պետություն Հայաստանում առաջնորդվում են ոչ թե՝ օրենքով, ո՛չ թե մարդասիրությամբ, այլ՝   «պատվաստվածների թիվ տալու» պայման-պահանջով։ Այսինքն, քովիդի ահագնացող դեպքերը չէ, մահացությունների թիվը չէ, որ անհանգստացնում են հրամանատարներին, այլապես հանրային վայրերում, փակ տարածքներում այսօր բոլորովին այլ վիճակ կլիներ։ Այսինքն, մարդիկ հասկանում են, որ իշխանությանն անհանգստացնողը՝ իրենց առողջությունը չէ, այլ՝ պահանջվող թիվը, որ ոչ մի կերպ չի կարողանում ապահովել հանրային վստահություն չունեցող, հակահումանիստական իշխանությունը։

Հեղինակ՝ Ա․Ե․

Հ․Գ․ Երևանի քաղաքապետարանը արդարանում է, թե՝ օրենքի շրջանակում են գործել, ավտոպահեստամասերի համար է նախատեսված եղել տարածքը, բնակելիի շինարարություն է կատարվել, և այլն, և այլն։ Անհեթեթ է ձեր ամեն բառը։ Այսինքն, դուք այս կերպ արդարացնու՞մ եք ոստիկանական բռնության, ուժի, կիրառու՞մը։ Սադիզմը։ Հակահումանիստական այս գործողությունը։ Դուք հասկանու՞մ եք, թե ի՞նչը կամ ու՞մ եք արդարացնում։ Ավելի վաղ էլ նման վայրագություններ արել եք։ Երևի էլի հանձնարարական եք ստացել։ Ոստիկանների մասին՝ խոսք չկա, սրանք մարդ չեն, ենիչերի են։

Աղբյուր` Փաստինֆո