Փաստ ինֆո

Երեկ հայտնի դարձավ, որ «Standard and Poor’s» միջազգային գործակալությունը ՀՀ-ին վարկանիշ է շնորհել։ Կառավարության նիստի մեկնարկին այս մասին ասաց ՀՀ վարչապետ Նիկոլ Փաշինյանը։

Վարչապետը ՀՀ ֆինանսների նախարարին խնդրեց ներկայացնել, թե ինչ է դա նշանակում, և ինչ է փոխելու մեր կյանքում։
Ֆինանսների նախարար Տիգրան Խաչատրյանն ասաց, որ առաջին տարին է, երբ «Standard and Poor’s» կազմակերպությունը վարկանշել է ՀՀ-ին և շնորհել է արտարժույթով ու ազգային արժույթով երկարաժամկետ պարտավորությունների թողարկման B+ սուվերեն վարկանիշ՝ դրական հեռանկարով։

«Առաջին տարին է նաև, որ միաժամանակ Հայաստանին վերաբերող զեկույցներ են հրապարակել վարկանշավորման ոլորտում աշխարհի առաջատար եռյակը՝ Moody’s-ը, Fitch-ը և Standard and Poor’s-ը։ Ընդ որում եթե Moody’s-ի և Fitch-ի վարկանշավորումը սուվերեն էր և վերաբերում էր միայն ՀՀ վարկունակությանը, ապա Standard and Poor’s-ի այս վարկանիշի առանձնահատկությունն այն է, որ սուվերենից բացի այն միաժամանակ սահմանել է նաև փոխանցման և փոխարկելիության գնահատական, ինչը կարևոր է մասնավոր հատվածի համար։

Վերջինս սահմանել է B, B-, ինչը նշանակում է՝ Հայաստանի մասնավոր հատվածի ձեռնարկություններն ու ֆինանսական հաստատությունները Standard and Poor’s-ի կողմից վարկանշվելու դեպքում կարող են ստանալ Հայաստանի սուվերեն վարկանիշից մեկ մակարդակ բարձր վարկանիշ»,-նշեց Տիգրան Խաչատրյանը։

Վերջինս նշեց, որ Standard and Poor’s-ի սուվերեն վարականիշի դրական հեռանկարն արտահայտում է կազմակերպության գնահատականն այն մասին, որ Հայաստանում տնտեսության վիճակի բարելավմանն ուղղված գործոնները գերակշռող են և առաջիկա 12 ամիսների ընթացքում կարող են բերել Հայաստանի սուվերեն վարականիշի բարձրացման։

«Այս վարկանիշի հիմնական առանձնահատկությունը այն է, որ մեր մասնավոր հատվածը ներկայացնող կազմակերպություններն ավելի մատչելի միջազգային վարկանիշ ստանալու հանարավորություն են ստացել, և դրա ներքո և՛ հայաստանյան, և՛ արտաքին շուկաներում ավելի հարմար ու հասանելի պայմաններով ֆինանսական միջոցներ են կարողանալու ներգրավել»,-ասաց Տիգրան Խաչատրյանը։

Աղբյուր` Փաստինֆո