Փաստ ինֆո

ՀՀ նախկին փոխվարչապետ, «Հայաստան» խմբակցության պատգամավոր Արմեն Գևորգյանի պաշտպան Լուսինե Սահակյանը լքեց դատական նիստերի դահլիճը՝ ի նշան դատավոր Աննա Դանիբեկյանի գործողությունների դեմ բողոքի։

«Փաստինֆո»-ի հաղորդմամբ՝ Արմեն Գևորգյանի պաշտպան Լուսինե Սահակյանը, որն այս գործով բոլորովին վերջերս է ներգրավվել որպես պաշտպան, արդեն տևական ժամանակ է, ինչ բարձրաձայնում է գործի նյութերին ծանոթանալու անհրաժեշտության մասին։ Խնդիրն այն է, որ դատարանը դեռևս ամբողջությամբ չի տրամադրել քրեական գործի ողջ նյութերի պատճենները, ինչի մասին կողմը խնդրել էր դեռևս նախորդ նիստերին։ Ընդ որում՝ դատարանը որոշել էր, որ պետք է տրամադրի 46 հատորից բաղկացած նյութեր, սակայն կողմին տրամադրվել է ընդամենը մի քանի էջ, չի տրամադրվել նաև բազմաթիվ միջնորդություններ, դրանց վերաբերյալ որոշումներ, որոնք կարող են վերաբերելի լինել։

«Դատարանի պարտականությունն է պատճենները տրամադրելը, ինչը մենք խնդրել ենք։ Ես չեմ պատկերացնում՝ պատճենահանում չի իրականացվե՞լ ֆինանսական միջոցներով պայմանավորված, սկանավորելու հնարավորություն չունե՞ք։ Չեմ պատկերացնում, պետք է ասեք, որ իմանանք, թե մեր երկրին աջակցենք, որ կարողանանք մեր պաշտպանությունն իրականացնել։ Արդյո՞ք դա ֆինանսական միջոցներով է պայմանավորված, թե ոչ, եթե ոչ, ապա ոչ մի տրամաբանություն չկա, որ դատարանը պետք է որոշի՝ 46 հատորից որքանն է ինձ համար կարևոր»,- նշեց Սահակյանը՝ նկատելով, որ դատարանը և դատարանի աշխատակազմն իրավունք չունի փաստաբանի փոխարեն որոշելու, թե ինչն է կարևոր պաշտպանության կողմի համար, ինչը՝ ոչ։

Պաշտպանը հայտնեց նախագահող դատավորին ինքնաբացարկ հայտնելու վերաբերյալ միջնորդություն ներկայացնելու մտադրության մասին, սակայն արձանագրեց, որ այս պահին զրկված են նույնիսկ այդ միջնորդությունը ներկայացնելու հնարավորությունից, քանի որ դատարանը չի տրամադրել ամբողջ նյութերը։

Նախագահող դատավոր Աննա Դանիբեկյանը նշեց, թե նյութերի տրամադրման հետ կապված անհրաժեշտ պարզաբանումներ արդեն արվել են նախկինում, չի անդրադառնում այդ հարցին, իսկ ինչ վերաբերում է դատավորի ինքնաբացարկի վերաբերյալ միջնորդությունների որոշումներին, դատավորը հորդորեց ծանոթանալ «Դատալեքս» տեղեկատվական համակարգից։

Դանիբեկյանը հայտարարեց, որ դատարանն անցնում է մեղադրական եզրակացության հրապարակմանը, սակայն պաշտպան Լուսինե Սահակյանն արձագանքեց՝ նշելով, որ եզրակացությունը չի կարող հրապարակվել, որովհետև Արմեն Գևորգյանը նիստերի դահլիճում մնում է առանց պաշտպան, ինքը լքում է նիստերի դահլիճը։ Սահակյանը նշեց, որ այն պահից հետո, երբ իրեն կտրամադրեն քրեական գործի բոլոր նյութերը, ինքը կծանոթանա դրանց և հնարավորություն կունենա դատավորին ինքնաբացարկի միջնորդություն ներկայացնելու, կներկայանա նիստին։ Իսկ ինչ վերաբերում է ինքնաբացարկի վերաբերյալ որոշումներին «Դատալեքս»-ով ծանոթանալու մասին դատավորի պնդմանը, փաստաբանն արձանագրեց, որ դատավորը՝ որպես իրավաբան պետք է իմանա, որ փաստաբանը պետք է ծանոթանա միջնորդությանը, դրանց հիմնավորումներին։

Մեղադրող դատախազ Պետրոս Պետրոսյանն էլ հայտարարությամբ հանդես եկավ՝ նշելով, թե ակնհայտ է՝  ինչ նպատակ է հետապնդում պաշտպանական կողմի այս վարքագիծը։ Ըստ դատախազի՝ դա պաշտպանական իրավունքի չարաշահման դասական դրսևորում է և փաստաբանը չարամտորեն չի կատարում իր պարտականությունները։ Դատախազը միջնորդեց սանկցիա կիրառել փաստաբանի նկատմամբ։

Դատավոր Աննա Դանիբեկյանը որոշեց դատական սանկցիա կիրառել փաստաբան Սահակյանի նկատմամբ՝ նկատողության տեսքով։ Պաշտպանի բացակայության պայմաններում դատական նիստը չէր կարող շարունակվել, հետևաբար այն հետաձգվեց՝ մինչև հոկտեմբերի 19-ը՝ ժամը 13.00-ն։

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո