Փաստ ինֆո

ԲԴԽ-ն գտնվեց իրավագիտության բարձունքում և ցույց տվեց, որ վեթինգի մասին հանրության սպասումներն աստիճանաբար արդարանում են։ Այս մասին լրագրողների հետ զրույցում ասաց ՀՀ արդարադատության նախարար Կարեն Անդրեասյանը՝ անդրադառնալով դատավոր Ռաֆիկ Մելքոնյանի լիազորությունները դադարեցնելու մասին ԲԴԽ որոշմանը։

«Մենք դեպքեր ենք ունեցել, երբ ԲԴԽ-ն մերժել է մեր միջնորդությունը կամ բավարարել, և շատ դրական ենք գնահատում թե՛ բավարարման, թե՛ մերժման դեպքերը, քանի որ հավատում ենք, որ ԲԴԽ-ն հենց այն մարմինն է, որը պետք է որոշի՝ արդյոք դատավորը կոպիտ խախտում թույլ տվել է, թե ոչ»,- նշեց Անդրեասյանը՝ ավելացնելով, թե ԲԴԽ-ի կողմից խախտման արձանագրումը նպաստում է դատական համակարգի առողջացմանը։

Նրա խոսքով՝ կարգապահական վարույթների հարուցումը հենց այն սահմանադրական գործընթացն է, որը թույլ է տալիս արդարացնելու հանրային սպասումները, այսինքն՝ զտել օրինական որոշումներ կայացրած դատավորներին՝ ապօրինի որոշումներ կամ խախտումներ թույլ տված դատավորներից։ Անդրեասյանի կարծիքով՝ զտման գործընթացում տեսնում են արդյունքներ և իրենք՝ որպես նախարարություն, աջակցում են այդ գործընթացին։

Ըստ նրա՝ այս պահին ուսումնասիրում են մոտ 200 բողոք, որոնք ստացվել են քաղաքացիներից, դատախազությունից և այն բոլոր շահառուներից, որոնք առնչվում են դատական համակարգի թերացումների հետ։

Ինչ վերաբերում է դժգոհություններին, որ վարույթներ հարուցվում են դատավորների կայացրած որոշման հետևանքով՝ Անդրեասյանն ասաց, որ գործընթացից փոքր-ինչ տեղյակ մարդիկ շատ լավ գիտեն, որ եթե կա դատական ակտի ապօրինություն, ապա հենց դա նաև պետք է հիմք լինի կարգապահական վարույթի և լիազորությունների դադարեցման համար։

«Երբ ակնհայտ ապօրինություն է տեղի ունենում դատարանում, մարդկանց ոչինչ չի մնում անելու քան բողոքել դատավորից ու այն ինստիտուտից, որը կոչված է պաշտպանելու մարդկանց և մարդկանց իրավունքները, իսկ դատավորին դատում է ԲԴԽ-ն և, ինչպես մենք ենք տեսնում՝ վերջին ժամանակներում՝ շատ արդարացի և շատ օբյեկտիվորեն»,- նշեց Անդրեասյանը։

Արձագանքելով հարցին, թե արդյոք դատավորի կողմից կայացրած որոշումը չպետք է բողոքարկվի վերադաս ատյանում՝ նախարարը պատասխանեց, թե դատավորի կողմից որոշում կայացնելու ամեն դեպքը չեն ստանում որպես բողոք. «Դատավորը կարող է որոշակի մեկնաբանության հետ խնդիր ունենալ, կարող է իր որոշման հետ համաձայն չլինեն մարդիկ, կողմերից մեկը միշտ կարող է անհամաձայնություն ունենալ դատավորի հետ, բայց մեզ բողոքում են, երբ նույնիսկ փաստաբանի ու քաղաքացու, դատախազության համար ակնհայտ է, որ այդտեղ կա կոպիտ օրենքի խախտում, բայց դա քիչ է, որ մենք վարույթ հարուցենք։ Բացի այդ՝ վարույթ հարուցելը դեռ չի նշանակում, որ գործը կհասնի ԲԴԽ։ Հարուցելուց հետո գաղտնի է պահվում, որ դատավորի հեղինակությունը որևէ կերպ չվարկաբեկենք։ Մենք հարցնում ենք դատավորին, իր մեկնաբանություններն ենք ստանում և որոշում՝ կարճենք վարույթը, թե ոչ»։

Իսկ թե արդյոք մոնիթորինգ է իրականացվել՝ հանրության սպասումների մասին խոսելու համար, նախարարը հայտնեց, թե բազմաթիվ սոցիոլոգիական հարցումներ կան, որ վերջին 10 տարիների ընթացքում հանրային ամենացածր վստահությունն ունեցել է դատական իշխանությունը։

«Դա մեր երկրի ամոթն է, խարանն է և հանրային վստահությունը վերականգնելու միակ ճանապարհը՝ ոչ արդար գործող դատավորներին դատական համակարգից դուրս մղումն է»,- հայտարարեց Անդրեասյանը՝ հավելելով, թե իրականացվում են ոչ թե 200 քաղաքացու պահանջ, այլ՝ հանրության հսկայական զանգվածի պահանջը։

Աղբյուր` Փաստինֆո