Փաստ ինֆո

Առուշ Առուշանյանը չի կռվել, պարոն Խաչատրյան, դու՞ ես կռվել, մի տուփ ծխախոտ զինվորին տված կա՞ս, որ ուզում ես Գորիսում քո կամքը թելադրես։ Գորիսեցին իր խոսքն ասելու է։ Այս մասին հայտարարել է Գորիսի համայնքապետ Առուշ Առուշանյանի պաշտպան Արմեն Մելքոնյանը՝ անդրադառնալով ՔՊ-ական պատգամավոր Արմեն Խաչատրյանի հայտարարություններին։ 

Նշենք, որ այս օրերին իշխանական պատգամավորը գտնվում է Գորիսում ու ակտիվ մասնակցություն ունենում ՏԻՄ ընտրությունների քարոզարշավին՝ փորձելով անցկացնել իշխանական թեկնածուին։

«Մարդը, որ իրավաբան է, չի պատկերացնում, թե ինչ բան է կալանավորումը և ազատազրկումը, հայտարարում է, որ Առուշ Առուշանյանն ազատազրկված է։ Ես պարզ ասեմ, պարոն Խաչատրյան, էդ քո աչքը լույս չի տա, դու դա չես տեսնելու, իսկ թե ով է ազատազրկվելու, ժամանակը ցույց կտա»,- նշեց Մելքոնյանը՝ հավելելով, որ կալանավորվելն այլ բան է, շատ կալանավորված անձինք հետո արդարանում են, շատ մեղադրանքներ հօդս են ցնդում։

«Մեկը չկա ասի, որ դու հակաօրինական, սուտ քարոզարշավով այս ընտրություններին ինչու՞ ես հանդես գալիս, դու ԱԺ պատգամավոր ես։ Եթե դու այդքանը չես հասկանում, բա մեր տված հարկերով քեզ ինչու՞ ենք պահում, պարոն Խաչատրյան, բայց ես հասկանում եմ, որ դու հասկանալով ես դա անում»,- հայտարարեց փաստաբանը։

Ինչ վերաբերում է Առուշ Առուշանյանի՝ պատերազմին մասնակցությանը, Մելքոնյանը նշեց, որ ինքն Առուշանյանի հետ կռվողներից մեկն է եղել. « Ջաբրայիլում կռված տղաներ, դուք Խաչատրյան Արմեն տեսե՞լ եք, բա ես երևանցի տղա, եկել էի Գորիսը պաշտպանելու, քեզ խի՞ չտեսա, ու՞ր էիր դու»։

Աղբյուր` Փաստինֆո