Փաստ ինֆո

Երևանի ընդհանուր իրավասության դատարանի նախագահ Արթուր Մկրտչյանը «Պատիվ ունեմ» դաշինքի Քանաքեռ-Զեյթուն վարչական շրջանի նախընտրական շտաբի պետի կողմից ենթադրյալ ընտրակաշառք բաժանելու գործը դատավոր Արման Հովհաննիսյանին մակագրելու փոխարեն մակագրել է դատավոր Մնացական Մարտիրոսյանին։ «Փաստինֆո»-ի հաղորդմամբ՝ Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, կայացել է այդ գործով դատական առաջին նիստը, որի ընթացքում պաշտպանության կողմը բարձրացրել է դատավորի բացարկման հարցը։

Հիշեցնենք, որ նշված քրեական գործի շրջանակներում մեղադրյալները երկուսն են՝ Գևորգ Նավոյանը, որ ընտրություններին եղել է «Պատիվ ունեմ» դաշինքի Քանաքեռ-Զեյթուն վարչական շրջանի շտաբի պետը և քաղաքացի Անահիտ Գրիգորյանը։ Գևորգ Նավոյանը մեղադրվում է ՀՀ քրեական օրենսգրքի 154.2-րդ հոդվածի 2-րդ մասով՝ ընտրակաշառք տալու հատկանիշներով, վերջինիս նկատմամբ որպես խափանման միջոց է ընտրվել կալանավորումը, որն անփոփոխ է մնացել՝ գործը դատարան ուղարկելուց հետո։ Անահիտ Գրիգորյանը մեղադրվում է կաշառք ստանալու մեջ, նրա նկատմամբ որպես խափանման միջոց է ընտրվել ստորագրությունը՝ չհեռանալու մասին։

Այսօր կայացած դատական նիստին պաշտպանության կողմը միջնորդություն է ներկայացրել՝ նախագահող դատավոր Մնացական Մարտիրոսյանին ինքնաբացարկ հայտնելու մասին՝ կասկածի տակ դնելով մակագրման գործընթացը։ Գևորգ Նավոյանի պաշտպան Արտակ Նավասարդյանը գտնում է, որ Մնացական Մարտիրոսյանը սույն քրեական գործով չի հանդիսանում օրենքի հիման վրա ստեղծված դատարան, ուստի, պետք է հայտնի ինքնաբացարկ։ Խնդիրն այն է, որ արդեն տևական ժամանակ է, ինչ գործերը մակագրվում են ոչ թե էլեկտրոնային մակագրման համակարգի, այլ՝ դատարանների նախագահների կողմից, ինչը չի բացառում մարդկային գործոնը։

Փաստաբանը ներկայացրեց դատարան մուտքագրված գործերը, որոնք ձեռքով մակագրման պարագայում պետք է ըստ հաջորդականության բաշխվեին դատավորներին՝ այբբենական հերթականությամբ, մինչդեռ, պաշտպանության կողմի դիտարկմամբ, սույն գործի դեպքում խախտվել է հաջորդականությունը և գործը դատավոր Արման Հովհաննիսյանին մակագրվելու փոխարեն մակագրվել է Մնացական Մարտիրոսյանին այն դեպքում, երբ հաջորդիվ մուտքագրված գործը նույն օրը մակագրվել է Հովհաննիսյանին, վերջինս արձակուրդում չի գտնվել։ Պաշտպանի խոսքով՝ եթե նույնիսկ գործը դատավոր Արման Հովհաննիսյանին չմակագրվեր, պետք է մակագրվեր դատավոր Հարություն Մանուկյանին՝ կրկին նկատի ունենալով այբբենական հաջորդականությունը։

Պաշտպանության կողմը դիմում է հասցեագրել նաև դատարանի նախագահին՝ պահանջելով պարզաբանումներ, ինչին ի պատասխան հայտնել են, որ սույն քրեական գործի բաշխման այբբենական կարգը խախտվել է՝ դատարանի գրասենյակի աշխատանքային ծանրաբեռնվածությամբ և տեխնիկական խնդիրներով պայմանավորված։ Պաշտպանը հայտնեց, որ գործերի շրջապտույտի մեջ խախտվել է միայն Մնացական Մարտիրոսյանի դեպքում։ Մեղադրող դատախազ Հրանուշ Բաղդասարյանը հայտնեց, որ այդ տեխնիկական սխալի հանգամանքները քննության առարկա են՝ նախապատրաստվող նյութերի շրջանակներում, համապատասխան հանցագործության մասին հաղորդում կա ներկայացված, դեռևս որոշում չի կայացվել՝ քրեական գործ հարուցելու կամ քրեական գործի հարուցումը մերժելու մասին։ Դատարանը որոշեց հետաձգել միջնորդության լուծումը։

Հեղինակ՝ Իզաբել Սահակյան

Աղբյուր` Փաստինֆո