Փաստ ինֆո

Գորիսի համայնքապետ Առուշ Առուշանյանի կալանավորումն անփոփոխ թողնելու և գրավի միջնորդությունը մերժելու մասին ընդհանուր իրավասության դատարանի որոշման դեմ բողոքը կքննի Վերաքննիչ քրեական դատարանի դատավոր Մհեր Արղամանյանը։ 

Ինչպես արդեն տեղեկացրել ենք՝ Սյունիքի մարզի ընդհանուր իրավասության դատարանում՝ դատավոր Գնել Գասպարյանի նախագահությամբ, սեպտեմբերի 10-ին քննարկվել է Առուշ Առուշանյանի նկատմամբ ընտրված խափանման միջոց կալանավորումը գրավով փոխարինելու մասին միջնորդությունը։

Պաշտպանության կողմը միջնորդության հիմքում դրել էր այն հանգամանքը, որ քրեական գործով նախաքննությունն ավարտվել է և նվազել է քննությանը խոչընդոտելու հավանականությունը, որն ավելի վաղ հաստատված էին համարել դատարանները, քանի որ քրեական գործով բոլոր վկաներն արդեն հարցաքննվել են, այդուհանդերձ, դատարանը մերժել է միջնորդությունը՝ անփոփոխ թողնելով Առուշանյանի նկատմամբ ընտրված խափանման միջոց կալանավորումը։

Պաշտպանության կողմը վերաքննիչ բողոք է ներկայացրել՝ պահանջելով բեկանել դատարանի որոշումը և անհապաղ ազատ արձակել։ Վերաքննիչ բողոքը դատարանի նախագահ Տիգրան Սահակյանի կողմից այն մակագրվել է դատավոր Մհեր Արղամանյանին, որը մասնագիտական հանրությունում դասվում է այս իշխանություններին բազում ծառայություններ մատուցած և վերջիններիս յուրաքանչյուր քմահաճույք կյանքի կոչող դատավորների շարքում։ Ընդ որում՝ իշխանություններն էլ իրենց հերթին չեն «նեղացնում» իրենց դատավորին, մասնավորապես, վերջինիս փաստաբան որդին՝ Դավիթ Արղամանյանը, առաջիկայում կդառնա դատավոր, թեև Կոռուպցիայի կանխարգելման հանձնաժողովի կողմից տրվել էր բացասական եզրակացություն, ինչի վրա, փաստորեն, աչք է փակվել։

Պարզվում է՝ Դավիթ Արղամանյանը, նախարարի օգնական լինելու ժամանակ ավելի քան մեկ տարի եղել է անհատ ձեռնարկատեր, որը ԿԿՀ-ի կողմից գնահատվել է որպես անհամատեղելիության պահանջի խախտում։ Մինչդեռ ԲԴԽ-ն, թեև քննարկել է այս հարցը, սակայն, այն չի համարել Դավիթ Արղամանյանի՝ դատավորի կարգավիճակ ձեռքբերելուն խոչընդոտող հանգամանք։ Մինչդեռ, համեմատության համար հարկ է նշել, որ օրերս դադարեցվել են Վերաքննիչ քաղաքացիական դատարանի դատավոր Գագիկ Խանդանյանի լիազորությունները՝ նույն հիմքով։

«Փաստինֆո»-ի հաղորդմամբ՝ Վերաքննիչ դատարանը Առուշ Առուշանյանի խափանման միջոցի հարցը կքննի հոկտեմբերի 13-ին։
Հիշեցնենք, որ արտահերթ խորհրդարանական ընտրությունների ավարտից հետո հարուցվել էր քրեական գործ՝ «Հայաստան» դաշինքի օգտին քվեարկելու համար ընտրակաշառք տալու վերաբերյալ, ընդ որում, ըստ ՀՔԾ-ի, որպես ընտրակաշառք է ներկայացվել դրամական աջակցությունը։

Քրեական գործի շրջանակներում նախ՝ հուլիսի 5-ին ձերբակալվել էր Գորիս համայնքի Քարահունջ բնակավայրի վարչական ղեկավար Լուսինե Ավետյանը՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով, ապա կալանավորվել, իսկ օրեր անց՝ դատախազի որոշմամբ գրավի դիմաց ազատ արձակվել։

Ընդ որում՝ մամուլում շրջանառվող տեղեկությունների համաձայն՝ Լուսինե Ավետյանը գործարքի է գնացել իրավապահ մարմինների հետ՝ ցուցմունք տալով Գորիսի համայնքապետ Առուշ Առուշանյանի դեմ, ինչի դիմաց ազատ է արձակվել։ Ավելին՝ Առուշանյանի դեմ ցուցմունք տալուց հետո Ավետյանի ազգականներից մեկն աշխատանքի է անցել դատախազությունում։ Ավետյանի ցուցմունքի հիման վրա Առուշ Առուշանյանին մեղադրանք է առաջադրվել ՀՀ քրեական օրենսգրքի 35-154.2-րդ հոդվածի 4-րդ մասի 2-րդ կետի, 38-149-րդ հոդվածի 2-րդ մասի 4-րդ կետի և 38-154.2-րդ հոդվածի 3-րդ մասի (քվեարկության գաղտնիությունը խախտելը, ընտրական իրավունքի իրականացմանը խոչընդոտելը) հատկանիշներով։

Առուշ Առուշանյանի նկատմամբ որպես խափանման միջոց է ընտրվել կալանավորումը։ Քրեական գործով նախաքննությունն ավարտվել է, գործն այժմ գտնվում է Սյունիքի մարզի ընդհանուր իրավասության դատարանի դատավոր Գնել Գասպարյանի վարույթում։

Հեղինակ՝ Իզաբել Սահակյան

Աղբյուր` Փաստինֆո