Փաստ ինֆո

Մերժելի և դատապարտելի է այն գռեհիկ ձևը, որով կառավարության ղեկավարն արտահայտում է իր մտքերը: Եթե անգամ հանրության համար ամենալավ բանն էլ այդկերպ ներկայացվի, դա արդեն սխալ է: «Փաստինֆո»-ի հետ զրույցի ժամանակ ասաց ՀՀ առաջին ՄԻՊ Լարիսա Ալավերդյանը՝ անդրադառնալով պատվաստումների վերաբերյալ ՀՀ վարչապետ Նիկոլ Փաշինյանի հայտարարություններին:

Դիտարկմանը, որ ՀՀ առողջապահության նախարարությունը քննարկում է չպատվաստվածների համար կորոնավիրուսի բուժումը վճարովի դարձնելու հարցը, մինչդեռ ԵԽԽՎ-ն նոր բանաձևում հստակ նշում է, որ պատվաստումը պարտադիր չէ, և չի կարող իրականացվել քաղաքական կամ սոցիալական ճնշման ներքո, Լարիսա Ալավերդյանը նկատեց՝ կառավարության կողմից նման հայտարարությունն ինքնին հակասահմանադրական է:

«Իշխանություններն այնպես պետք է անեն, որ այդ կարևոր միջոցառումը տեղի ունենա իրավական դաշտում, այլ ոչ թե պարտադրանքով կամ ստիպողաբար: Պետք է կարողանան Սահմանադրությունը չխախտելով՝ համոզել հասարակությանը: Այստեղ վստահության պակաս կա: Նրանց քայլերն այնքան վստահ պետք է լինեն, որ գործը չհասնի նման կոպտագույն խոսքերին»,-նշեց Լարիսա Ալավերդյանը:

Վերջինս նկատում է՝ քաղաքացիները հստակ կարող են պնդել, որ հակասահմանադրական է այն պահանջը, որ չպատվաստվածները պետք է բուժման համար վճարեն: Նա նաև նշեց, որ հաշվի առնելով իրավիճակը՝ և՛ քաղաքացիները, և՛ իշխանությունը պետք է ոչ թե իրար հետ սպառնալիքներով խոսեն, այլ մեկ ուրիշ տարբերակ գտնեն:

«Տվյալ դեպքում իշխանության ընտրած ձևը մերժելի ու դատապարտելի է: Դա ուղղակի անթույլատրելի է: Քաղաքացիները պետք է պահանջեն, որ այն ամենը, ինչն արտահայտվում է բանավոր, անպայման ունենա գրավոր պոզիտիվ իրավունքի նորմեր, որ դա էլ չլինի Ալիևի հետ բանավոր պայմանավորվածությունների նման մի բան»,-նշեց Լարիսա Ալավերդյանը:

Նրա կարծիքով ցուցադրաբար խախտվում են իրավական պետության սկզբունքներն ու նորմերը: Եթե անգամ որևէ բան իրականացվում է հօգուտ հասարակության, ապա նախ իշխանությունը պետք է կարողանա իր կառավարման մեթոդներով համոզել ու վստահություն ձեռք բերել քաղաքացիների կողմից, ինչպես նաև հիմնվել օրենքի և իրավունքի վրա:

«ԵԽԽՎ-ն երբեք չի հանդուրժելու խտրական վերաբերմունքը պատվաստված ու չպատվաստված քաղաքացիների բուժման հետ կապված: Իշխանությունների գործողություններն անօգնականության մասին են վկայում: Այնքան պրիմիտիվ, ոչ հետևողական են: Նրանք հասարակության մոտ իրենց նկատմամբ վստահությունը վերականգնելու խնդիր ունեն»,-ասաց Լարիսա Ալավերդյանը:

Նշենք, որ ՀՀ առողջապահության նախարարությունից հայտնել էին, որ քննարկվում է տարբերակ, երբ չպատվաստված քաղաքացիների կորոնավիրուսի դեմ բուժումը կարող է դառնալ վճարովի: Կառավարության հոկտեմբերի 7-ի նիստի ժամանակ ՀՀ վարչապետ Նիկոլ Փաշինյանը ևս նմանատիպ ակնարկ արեց՝ ասելով, թե քաղաքացիների որոշ հատված բողոքում է, որ մարդիկ չեն պատվաստվում և իրենց հարկերից գոյացող միջոցներով բուժվում են կորոնավիրուսից: Այնուհետև հայտարարեց կիրառել բոլոր գործիքները՝ պատվաստումներն առաջ տանելու համար: Ինչպես տեսնում ենք, Առողջապահության նախարարությունը նիստից անմիջապես հետո գործի է անցել:

Ընդ որում՝ առողջապահության նախարարությունը հայտարարել է, որ կորոնավիրուսի բուժման միջին գինը կարող է լինել 800 հազար դրամ, այսինքն՝ մի քանի անգամ թանկ, քան մասնավոր կլինիկաներն են առաջարկում։ Վարդանանց ԲԿ-ում «COVID-19-ի բուժում տնային պայմաններում» շատ ավելի մատչելի է, քան այսօր պետությունն է ներկայացնում՝ քրոնիկ այլ հիվանդություն ունեցող քաղաքացիների համար փաթեթի 14 օրն արժե 350.000 հազար դրամ, ընդ որում տնային պայմաններում, երբ իրենք են գալիս տուն եւ ապահովում պատշաճ բուժումը, իսկ «COVID-19-ի բուժում տնային պայմաններում Light» փաթեթի 14 օրն արժե 148 հազար դրամ։

Աղբյուր` Փաստինֆո