Փաստ ինֆո

Երեկ գրավոր ընթացակարգով ընդունել ենք որոշում ՏԻՄ ընտրություններ նշանակելու վերաբերյալ: Կառավարության նիստի մեկնարկին այս մասին ասաց ՀՀ վարչապետ Նիկոլ Փաշինյանը:

ՀՀ տարածքային կառավարման և ենթակառուցվածքների նախարար Գնել Սանոսյանն ասաց, որ ընտրություններն անցկացվելու են հոկտեմբերի 17-ին, նոյեմբերի 14-ին և դեկտեմբերի 5-ին, որի արդյունքում Հայաստանում կունենանք 79 համայնք, ներառյալ Երևանը, Գյումրին և 5 համայնքներ, որոնք բնակեցված են ազգային փոքրամասնություններով և միավորման գործընթացի մեջ չեն ընդգրկվել:

«Այսպիսով 79 համայնքից կունենանք 7-ը, որոնք որևէ մեկի հետ միավորված չեն, մնացածը խոշորացված են: Երեկ ընդունված առաջին որոշմամբ մենք 441 համայնք միավորում ենք 38 համայնքային միավորի փնջերի մեջ: Դրանք են Աշտարակ, Ապարան, Թալին, Արարատ, Արտաշատ, Մասիս, Վեդի, Արմավիրի մարզ Արաքս, Արմավիր, Բաղրամյան, Խոյ, Մեծամոր, Վաղարշապատ, Փարաքար, Գեղարքունիքի մարզ Գավառ, Մարտունի, Սևան, Վարդենիս, Լոռու մարզ՝ Թումանյան, Սպիտակ, Վանաձոր, Փամբակ, Կոտայքի մարզ՝ Աբովյան, Գառնի, Ծաղկաձոր, Նոր Հաճն, Հրազդան, Նաիրի, Շիրակի մարզ ՝ Ախուրյան, Ամասիա, Աշոցք, Արթիկ, Վայոց ձորի մարզ՝ Եղեգնաձոր, Ջերմուկ, Վայք, Տավուշի մարզ՝ Նոյեմբերյան»,-նշեց Գնել Սանոսյանը:

Վերջինս նշեց, որ Արագածոտնի մարզի Արևուտ և Մեծաձոր համայնքներում նույնպես կանցկացվեն ընտրություններ, բայց քանի որ այս համայնքներում ընտրողների թիվը 4000-ից քիչ է, այնտեղ ընտրությունները կիրականացվեն մեծամասնական ընտրակարգով:

Նախարարը նշեց, որ հոկտեմբերի 17-ին համամասնական ընտրակարգով ընտրություններ կկայանան Գյումրիում, Գորիսում, Տաթևում, Տեղում, Մեղրիում և Դիլիջանում: Նոյեմբերի 14-ին համամասնական ընտրակարգով ընտրություններ կանցկացվեն Իջևանում, Ստեփանավանում և Կապանում, իսկ մեծամասնական ընտրակարգով՝ Արզնիում և Լերմոնտովո համայնքում:

Նիկոլ Փաշինյանը նշեց, որ խոշորացումից հետո ընտրությունները տեղի են ունենալու նոր ընտրակարգով:
«Սրանով խոշորացման այս փուլն ամփոփվում է»,-նշեց վարչապետը:

Աղբյուր` Փաստինֆո