Փաստ ինֆո

Դատախազությունը չի հաստատել Արմավիրի նախկին քաղաքապետ Ռուբեն Խլղաթյանի վերաբերյալ քրեական գործով մեղադրական եզրակացությունը և գործը հետ է ուղարկել։ ՀՀ գլխավոր դատախազի՝ ԶԼՄ-ների հետ կապերի գծով խորհրդական Գոռ Աբրահամյանը «Փաստինֆո»-ի հետ զրույցում հայտնեց, որ քրեական գործը հետ է ուղարկվել ՀՔԾ՝ լրացուցիչ քննություն կատարելու համար։

Հիշեցնենք, որ Արմավիրի նախկին քաղաքապետ Ռուբեն Խլղաթյանը 2021թ անցկացվող արտահերթ խորհրդարանական ընտրություններին մասնակցում էր «Պատիվ ունեմ» դաշինքի նախընտրական ցուցակով։ Ռուբեն Խլղաթյանը ձերբակալվել է հունիսի 10-ին՝ ՀՀ քրեական օրենսգրքի 34-154.2-րդ հոդվածի երրորդ մասի հատկանիշներով՝ ընտրակաշառք բաժանելու փորձի կասկածանքով։ Քրեական գործի շրջանակներում Ռուբեն Խլղաթյանին և Գագիկ Պետրոսյանին մեղադրանք է առաջադրվել՝ ՀՀ քրեական օրենսգրքի 34-154,2-րդ հոդվածի 4-րդ մասի 1-ին և 2-րդ կետերով՝ մի խումբ անձանց կողմից ենթադրյալ ընտրակաշառք տալու փորձի հատկանիշներով, որն իրականացվել է երկու կամ ավելի անձի նկատմամբ: Նրանց նկատմամբ որպես խափանման միջոց է ընտրվել կալանավորումը։ Ըստ քրեական գործի՝ խոսքը գնում է 9 մլն ՀՀ դրամի չափով ընտրակաշառք բաժանելու փորձի մասին։

Քրեական գործով նախաքննության ավարտի մասին ՀՔԾ-ն պաշտոնապես տեղեկացրել է դեռևս սեպտեմբերի 15-ին։ Քրեական գործն ուղարկվել էր հսկողություն իրականացնող դատախազին՝ մեղադրական եզրակացությունը հաստատելու և գործը դատարան ուղարկելու համար, սակայն առ այս պահը քրեական գործը դեռևս դատարան չի ուղարկվել։

Պարզվում է՝ քրեական գործով հսկողություն իրականացնող դատախազը չի հաստատել մեղադրական եզրակացությունը և որոշում է կայացրել՝ լրացուցիչ քննություն կատարելու ցուցումով քրեական գործը քննիչին վերադարձնելու մասին։ Նման որոշում դատախազը կայացրել է սեպտեմբերի 17-ին։

Նշենք, որ Ռուբեն Խլղաթյանն առաջադրված մեղադրանքը չի ընդունում։ Ըստ նրա՝ քրեական գործը շինծու է։

Հեղինակ՝ Իզաբել Սահակյան

Աղբյուր` Փաստինֆո