Փաստ ինֆո

Զենքի մատակարարմամբ զբաղվող Դավիթ Գալստյանի՝ «Պատրոն Դավո»-ի նկատմամբ կալանավորումը որպես խափանման միջոց ընտրելու մասին որոշման դեմ վերաքննիչ բողոք է ներկայացվել։ Այս մասին «Փաստինֆո»-ի հետ զրույցում հայտնեց Գալստյանի պաշտպանական խմբի անդամ Արմեն Անդրիկյանը։ 

Ինչպես արդեն տեղեկացրել ենք՝ զենքի մատակարարմամբ զբաղվող գործարար Դավիթ Գալստյանը՝ «Պատրոն Դավոն» կալանավորվել է սեպտեմբերի 30-ին՝ Երևանի ընդհանուր իրավասության դատարանի դատավոր Կարեն Ֆարխոյանի որոշմամբ։

Պաշտպանության կողմը վերաքննիչ բողոքի շրջանակներում վիճարկել է ինչպես հիմնավոր կասկածի, այնպես էլ՝ կալանավորման հիմքերի առկայության հարցը։ Մասնավորապես, փաստաբան Արմեն Անդրիկյանն ընդգծեց, որ ի սկզբանե հայտարարվել է այն մասին, որ Դավիթ Գալստյանին մեղադրանք առաջադրելն ամբողջությամբ անհիմն էր, մեղադրանքի որոշման մեջ նշված հանգամանքները չեն համապատասխանում իրականությանը, հետևաբար՝ բացակայում է նաև հիմնավոր կասկածը՝ կալանավորման պայմանը։ Ինչ վերաբերում է կալանավորման հիմքերին, ապա պաշտպանը հայտնեց, որ առաջին ատյանի դատարանը կալանավորման հիմքում դրել էր հնարավոր փախուստը և գործի քննությանը խոչընդոտելը, մինչդեռ, դա դատարանի կողմից պետք է հերքվեր՝ գործում առկա ապացույցներով։

Ըստ փաստաբանի՝ դատարանը պետք է հաստատված համարեր, որ Դավիթ Գալստյանը, գտնվելով ազատության մեջ, կդրսևորեր պատշաճ վարքագիծ։ Դատարանը պետք է նման եզրահանգման գար՝ նկատի ունենալով այն հանգամանքը, որ քրեական գործը հարուցվել է շուրջ 6 ամիս առաջ և այս ընթացքում Գալստյանը հրավիրվել և հարցաքննվել է։ Մասնավորապես, փաստաբանը նշեց, որ այս քրեական գործը հարուցվել է դեռևս ապրիլին, հետագայում՝ սեպտեմբերի 29-ին հարուցվել է ևս մեկ քրեական գործ, որոնք միացվել են մեկ վարույթում։

Հարուցված քրեական գործի շրջանակներում Դավիթ Գալստյանը հրավիրվել և ներկայացել է հարցաքննության, և, ըստ փաստաբանի, Գալստյանի՝ նախաքննական մարմին ներկայանալով հստակ կանխորոշվում է, որ ինքը որևէ կերպ փախուստի չի դիմի և ցանկացած կանչով կներկայանա նախաքննական մարմին։ Բացի այդ, փաստաբանը նշեց, որ վարույթն իրականացնող մարմինը չի ներկայացրել որևէ փաստ, որ շուրջ վեց ամիս ընթացող նախաքննության ընթացքում Դավիթ Գալստյանը նույնիսկ փորձ է արել խոչընդոտելու կամ խոչընդոտել է։
Պաշտպանի փոխանցմամբ՝ Գալստյանը նախկինում հարցաքննվել է վկայի կարգավիճակով՝ կասկածանքի շուրջ, սակայն, նախաքննության գաղտնիությունից ելնելով, չմանրամասնեց, թե քանի անգամ է հարցաքննվել Գալստյանը և արդյոք առերեսվել է, թե ոչ։

Ինչ վերաբերում է Գալստյանի առողջական վիճակին, ապա փաստաբանը զերծ մնաց մանրամասներ հայտնելուց՝ նշելով, որ դա բժշկական գաղտնիք հանդիսացող տեղեկություն է և չունի Գալստյանի համաձայնությունը՝ դրանք հրապարակելու համար, սակայն տեղեկացրեց, որ Գալստյանն ունեցել է լուրջ առողջական խնդիրներ, տարբեր ժամանակաշրջանում հետազոտություններ է անցել և այժմ համապատասխան հետազոտություններ անցնելուց հետո, եթե հայտնաբերվեն կալանավորման հետ անհամատեղելի առողջական խնդիրներ, համապատասխան միջոցներ կձեռնարկվեն։

Հիշեցնենք, որ ՀՀ ՊՆ նախկին նախարար Դավիթ Տոնոյանը և զենքի մատակարարմամբ զբաղվող գործարար Դավիթ Գալստյանը՝ Պատրոն Դավոն ձերբակալվել են ԱԱԾ-ում քննվող քրեական գործի շրջանակներում և կալանավորման միջնորդություն ներկայացրել դատարան, որոնք բավարարվել են։ Ըստ ԱԱԾ տարածած հաղորդագրության՝ Դավիթ Տոնոյանը և Դավիթ Գալստյանը որպես մեղադրյալ են ներգրավվել 2,277,323,840 ՀՀ դրամ գումար հափշտակելու և կեղծիքներ, հանրորեն վտանգավոր արարքներ կատարելու համար։

Քրեական գործի շրջանակներում ձերբակալվել, ապա կալանավորվել է նաև ՀՀ ԶՈՒ ԳՇ պետ Ստեփան Գալստյանը: Նա մեղադրվում է նյութական ծանր հետևանքներ առաջացնող պաշտոնեական դիրքի չարաշահման և պաշտոնեական կեղծիք կատարելու մեջ:

Հեղինակ՝ Իզաբել Սահակյան

Աղբյուր` Փաստինֆո