Փաստ ինֆո

Հայաստանի և Ադրբեջանի արտաքին գործերի նախարարները ԵԱՀԿ ՄԽ համանախագահների մանդատի ներքո կրկին հանդիպելու պայմանավորվածություն են ձեռք բերել: Այս մասին ԱԺ-ում կառավարության հետ հարցուպատասխանի ժամանակ ասաց ԱԳ նախարար Արարատ Միրզոյանը՝ մանրամասներ ներկայացնելով Նյու Յորքում ԵԱՀԿ Մինսկի խմբի համանախագահների և Ադրբեջանի ԱԳ նախարարի հետ վերջերս տեղի ունեցած հանդիպմանը:

Միրզոյանի խոսքով՝ կայանալիք հանդիպման ընթացքում քննարկվելու են հումանիտար հարցեր, որոնք վերաբերվում են մասնավորապես Ադրբեջանում պահվող հայ ռազմագերիների և քաղաքացիական անձանց խնդրին:

ԱԳ նախարարը ողջունեց ԵԱՀԿ Մինսկի խմբի ձևաչափով բանակցային գործընթացի վերսկսումը և ընդգծեց, որ դրանք բխում են Հայաստանի և Արցախի շահերից:

«Մեկ անգամ ևս փաստում ենք, որ խնդիրը լուծված չէ: Ադրբեջանը սիրում է ասել, թե խնդիրն այլևս գոյություն չունի: Կարծում եմ՝ սա միջազգային հանրության կողմից ևս մի հավաստիացում է, որ խնդիրը գոյություն ունի և լուծում պահանջում է, և լուծման փնտրտուքը պետք է տեղի ունենա ԵԱՀԿ Մինսկի խմբի համանախագահության ֆորմատով, միջազգային ճանաչում ստացած միակ մանդատ ունեցող մարմնով»,-ասաց Արարատ Միրզոյանը:

Նա կարևորեց ԵԱՀԿ Մինսկի խմբի համանախագահության մանդատի ներքո խնդրի լուծումը՝ նշելով, որ դա ինչ-որ փուլում ենթադրում է ամենաէական հարցերի քննարկում:

«Դրական եմ համարում, որ ըմբռնում կար, թե ելնելով լարվածությունից, ելնելով բազմաթիվ չլուծված և օրեցօր ծագող զանազան հարցերի առկայությունից՝ պայմանավորվածություն ենք ձեռք բերել նորից հանդիպել և առաջնային քննարկման առարկա դարձնել հումանիտար հարցերը: Իհարկե, առաջին հերթին խոսքը վերաբերում է Ադրբեջանում ապօրինաբար պահվող ռազմագերիների և քաղաքացիական անձանց հարցին, հաստատման սպասող գերիների առկայության հարցին, ԼՂ-ում հումանիտար առաքելությունների, միջազգային կազմակերպությունների հասանելիության հարցին, բազմաթիվ այսպիսի խնդիրներին: Կարծում եմ, որ այս խնդիրների դրական լուծումը առաջին հերթին Ադրբեջանի կողմից կառուցողական դիրքորոշման վկայություն կլինեն, և կստեղծեն այնպիսի մթնոլորտ, որտեղ կարող ենք ամենակարևոր հարցերը քննարկել ժամանակի ընթացքում»,-ասաց ԱԳ նախարարը:

Միրզոյանն առաջարկեց ուշադրություն դարձնել համանախագահների տարածած հայտարարության մեջ տեղ գտած ձևակերպումներին: Ըստ նրա՝ ամեն ինչ դրանով ասված է:

Աղբյուր` Փաստինֆո