Փաստ ինֆո

Լելե-Թեփեի ռազմական գործողության արդյունքում մենք ունեցանք հարյուրավոր զոհեր, կրեցինք նյութատեխնիկական հսկայական կորուստներ, իսկ ադրբեջանաթուրքական կողմը ստացավ մեծ առավելություն։ Ո՞վ է այս ողբերգական ծանր հետևանքներով ռազմական գործողության հիմնական պատասխանատուն և մեղավորը, Դուք՝ որպես գերագույն գլխավոր հրամանատար, Ձեզ մեղավոր ճանաչու՞մ եք, թե ոչ։ Այս մասին ԱԺ-ում ասաց «Հայաստան» խմբակցության պատգամավոր Արմենուհի Կյուրեղյանը՝ դիմելով Նիկոլ Փաշինյանին։ 

Հիշեցնելով ուղիղ մեկ տարի առաջ ռուսական «РБК» հեռուստաընկերությանը տրված հարցազրույցը, որով Փաշինյանը հայտարարել էր Լելե-Թեփեի օպերացիայի մասին՝ Կյուրեղյանը հետաքրքրվեց՝ Փաշինյանն իրեն մեղավոր ճանաչում է, թե ոչ, թե դա էլ՝ «ես մեղավոր չեմ, ինձ սխալ էին զեկուցել շարքից է»։ Կյուրեղյանն ընդգծեց, որ հոկտեմբերի 5-ին Փաշինյանն Արցախում էր և չէր կարող տեղեկացված չլինել գործողության մանրամասների մասին։

Արձագանքելով պատգամավորի հարցին՝ Նիկոլ Փաշինյանը նշեց, որ բազմիցս հայտարարել է, որ ամեն ինչի մեղավորն էլ, պատասխանատուն էլ ինքն է, իսկ ինչ վերաբերում է նշված դրվագին, ապա Փաշինյանի խոսքով, ինքը եղել է Ստեփանակերտում, հրավիրել խորհրդակցություն, լսել մարդկանց կարծիքները, թե ինչ կարող են անել իրադրությունը փոխելու վերաբերյալ, իսկ առաջարկները լսելուց հետո ինքը հանձնարարել է, որ զինվորականները գնահատեն առաջարկները, կայացնեն որոշում։ «Զինվորականները քննարկել են, կայացրել են որոշում և ինձ զեկուցել են կայացրած որոշման ընթացքի մասին»,- նշեց Փաշինյանը՝ հավելելով, որ ինքը Լելե-Թեփե անունը երբեք չի տվել, Լելե-Թեփե օպերացիա հասկացություն ընդհանրապես չի եղել, դա հետո է առաջացել՝ պրոպագանդիստական նկատառումներով։

Արմենուհի Կյուրեղյանն էլ արձագանքեց՝ նշելով, որ Փաշինյանն ինչպես միշտ հմտորեն հարցը շրջանցում է և բերում է այն համատեքստին, որը ցանկալի է իր համար, ինքը չէր խնդրել բացատրել Լելե-Թեփե են ասել, թե ոչ, ինքը հետաքրքրվել էր՝ մեղավոր ճանաչում է իրեն, թե ոչ։

«Դուք հայտարարեցիք, որ այո, Դուք Ձեզ մեղավոր ճանաչում եք և նորից ամրապնդեցիք այն կոնտեքստը, որ ես մեղավոր չեմ, ինձ սխալ են զեկուցել։ Լավ, Դուք մեղավոր էիք, Ձեզ սխալ են զեկուցել, այդքանից հետո՝ հոկտեմբերի 7-ին առաջարկված պատերազմը դադարեցնելու առաջարկն ինչու հերքվեց, ինչու մերժվեց, ով է պատասխան տալու դրանից հետո եկած հազարավոր զոհերի համար։ Ի՞նչ պատասխան եք տալու այն ծնողներին, որոնց աչքերին նայելով պետք է ասեք՝ գիտեք, ես այդ մեծ քաղաքական կամքը չունեցա պատերազմը դադարեցնելու, թեկուզ՝ դավաճան անվանելու գնով։ Միևնույնն է, այսքանից հետո Ձեզ էլի դավաճան ու կապիտուլյանտ են համարում »,- նշեց Կյուրեղյանը։

Կյուրեղյանի դիտարկմանն արձագանքելով՝ Փաշինյանը հայտարարեց, թե վերջիններիս ավելի մեծ դավաճան ու կապիտուլյանտ են համարում, ինչի մասին վկայում են նաև ընտրությունների արդյունքները, դավաճան և կապիտուլյանտ լինելու մասին հետագայում քննարկումներ կլինեն։ Փաշինյանի խոսքով՝ ինքն իրեն մեղավոր է ճանաչում, այդ թվում՝ բանակը կոռումպացված տարրից չազատելու համար։

Նիստը նախագահող ԱԺ փոխխոսնակն էլ նկատողություն հայտարարեց պատգամավորին՝ ոչ կոռեկտ արտահայտությունների համար։

Աղբյուր` Փաստինֆո