Փաստ ինֆո

«Կառավարությունը ստում է։ Մենք հույս չունենք, իրենց անգործության պատճառով մեկ տարի է մեզ տնից հանել են, հասցրել ձմեռվա բերան ու մեզնից հրաժարվել։ Խնդրում ենք գոնե բնակվարձով ապահովեն։ Ո՞նց պետք է ապրենք՝ կոմունալներ վճարենք, չենք էլ խոսում ձմեռվա շորերի մասին»։ Կառավարության շենքի մոտ են հավաքվել 44-օրյա պատերազմից հետո Հադրութից բռնի տեղահանված բնակիչները։ Նրանք 8 ամսից ավելի է մշտական բնակության վայր չունեն, պատերազմից հետո կորցրել են իրենց բնակարանները։ ՀՀ և ԱՀ կառավարություններից պահանջում են իրենց ապահովել բնակարաններով ։

«13,5 մլրդ դրամ գումար են հատկացնում ԱՀ-ին՝ տեղահանվածների համար։ Ստեփանակերտում մեր հայրենակիցներից 1960 մարդ հյուրանոցներում ու հյուրատներում են բնակեցրել ու տրամադրվում է օրական 4000-6000 դրամ յուրաքանչյուրին։ Ստացվում է՝ շնչին ամսական 150 հազար դրամ են տրամադրում։ Ի՞նչն է խանգարում, որ այստեղ չեն տրամադրում գումարը։ Դա փողերի լվացում չէ՞, բա ուրիշ ի՞նչ ձև կարող ենք վերագրել։ Էնտեղ անգամ սեփական տներ կա, որտեղ մեր բնակիչներին եկել, հանել են, ասել, որ դա ձևակերպում են որպես հյուրատուն ու եթե նախկինում 100 հազար դրամ էին վարձ վճարում, այսօր այդ մարդը 900 հազար դրամ է վերցնում։ Դա ո՞վ պետք է վերահսկի»,- ասաց հադրութցի տղամարդը։

ՀՀ փոխվարչապետ Մհեր Գրիգորյանի հետ հանդիպման ժամանակ բնակիչները հույս ունեին, որ կարող է դրական փոփոխություն լինել, սակայն ԱՀ-ից ներկայացուցիչները հայտարարեցին, թե ՀՀ-ում չեն կարող իրենց բնակարանով ապահովել։ Հադրութցիները հույս չունեն, որ ԱՀ կառավարությունը քայլեր կանի՝ իրենց բնակարանով ապահովելու համար։

«Քաղաքացիներին հաշվառում չեն կատարում։ Սեպտեմբերի 1-ի դրությամբ 2500 հադրութցի էր լքել ՀՀ–ն, իսկ վերջին մեկ ամսում այդ թվին ևս 500 մարդ է ավելացել։ Հադրութից ՀՀ-ն տարբեր պատճառներով լքել է 3000 մարդ։ Հիմնականում արտագաղթում են երիտասարդները։ Մի նախագիծ են առաջարկել, որտեղ տարեց մարդիկ, թոշակառուները դրանից չեն օգտվում, այսինքն իրենք պետք է գնան մեռնեն, կոտորվեն։ Եթե մեր խնդիրները չլուծվեն, ես էլ կարտագաղթեմ` բա ի՞նչ անեմ։ Ձմեռվա բերան ուղղակի հրաժարվում են մեզնից»,- լրագրողներին հայտնեց հադրութցին։

Բողոքի ակցիայի մասնակիցներն ասում են` որևէ հույս չունեն պատկան մարմիններից, հատկապես կառավարությունից։

Աղբյուր` Փաստինֆո